Général
-
Boniface VIII (1294-1303)
-
Ut ad nulla teneantur tributa, aut subsidia exhibenda. ex Vat. Reg. epist. 228. apud Vaddingum in Reges. Pont. n. 18. & in Spec. Min. trac. 2. f. 44.
-
Anno 1296. die 4. Julii.
-
1296
-
BONIFACIUS &c.
Dilectis in Christo filiabus universis Abbatissis, & Conventibus Monialium inclusaruma Ordinis Sanctæ Claræ, sive Sancti Damiani, sive Minorissæ dicantur Salutem, & Apost. Bened.
Laudabilis Sacra Religio, quæ in Monasteriis vestris a vobis, & aliis personis in eis degentibus sub onere voluntariæ paupertatis jugiter colitur, sic a vobis mundanæ dissolutionis relegavit illecebras, ut inter alia claustralis abstinentiæ noxibus relegatæ puritate fulgeatis observantiæ Regularis, & voluntatis libitum coarctantes, omnino sub obedientiæ debito dignam, & sedulam exhibeatis Domino servitutem. Hinc est, quòd Nos pium, & congruum reputantes, ut vos illâ prosequamur gratiâ, quæ vestris necessitatibus fore conspicimus opportuna, vobis universis, & singulis auctoritate præsentium indulgemus, ut ad præstationem decimarum de quibuscumque possessionibus, & aliis omnibus bonis vestris, quæ in præsentiarum habetis, & justis modis præstante Domino acquisiveritis in futurum, vel ad contribuendum in procurationibusb quorumlibet Ordinariorum, & etiam Legatorum, & Nunciorum Sedis Apostolicæ, & quibuslibet talleisc, & collectis; ac ad exhibendum pedagia, teloniad, & alias actiones quibusvis Regibus, Principibus, seu aliis personis Sæcularibus minime teneaminie, nec ad id compelli aliquatenus valeatis. Nulli ergo omnino hominum liceat hanc paginam nostræ concessionis infringere, vel ei ausu temerario contraire. Si quis autem hoc attentare præsumpserit indignationem Omnipotentis Dei, ac BB. Petri & Pauli Apostolorum ejus se noverit incursurum. Datum Anagniæ IV. Nonas Julii, Pontificatus nostri Anno Secundo.
-
Bullarium Franciscanum romanorum pontificum, tomus IV, n°LXXVII., p.401
-
(a) Monialium inclusarum: Temporis progressu diversum Sanctimoniales istæ sortitæ sunt nomen; Quandoque enim Moniales inclusæ, interdum pauperes inclusæ, modò Damianitæ, modò Minorissæ, nunc Clarissæ appellatæ sunt. Qua de re sæpius in superioribus.
-
(b) Procurationibus: de quarum significatione in 1. tomo hujus Bull. pag. 633. (b), & 724. (i).
-
(c) Talleis: de quibus in 1. tom. pag. 126. (e), & 621. (g).
-
(d) Telonia: collectæ, pedagia, ac telonia sunt quoddam tributi genus, de iisque Du-Cange in Glossario ad has voces.
-
(e) Minime teneamini: consimile privilegium eis concessere Alexander IV. & Clemens IV. ille per epistolam Paupertati vestræ die 12. Febr. anno 1255. & 13. Aprilis ejusdem anni, hic verò per epistolam: Quantò studiosiùs die 20. Novembr. 1265.