Général
-
Célestin V (1294)
-
Suam ad Summum Pontificatum promotionem significat, seque eorum orationibus apud Deum adjuvari peroptat. ex Reg. Vat. Pontif. epist. 1. apud Raynaldum ad hunc ann. n. 15.
-
Anno 1294. die ... Augusti.
-
1294
-
CÆLESTINUS EPISCOPUS Servus Servorum Dei
Venerabilibus fratribus ‥ Archiepiscopoa Ravennati, ejusque Suffraganeisb Salutem, & Apostolicam Benedictionem.
Mirabilia Dei judicia, quorum scrutationes multa tremenda pariter & stupenda mortalibus sic ingerunt, sic intellectum tenuem nostræ imbecillitatis excedunt, quòd cum sit super omnes Terræ terminos lumen ejus, ad contemplandam altitudinem divitiarum, ac scientiæ suæ immensæ nec comprehensiones humanæ sufficiunt, nec depressi sensus nostræ humilis fragilitatis attingunt &c.c Piæ siquidem recordationis Nicolao Papa IV. d prædecessore nostro debitum naturæ solventee, ejusque corpore honorificentiâ debitâ Ecclesiasticæ tradito sepulturæ, habitus est a Fratribus nostris de futuri Pastoris substitutione tractatus, in quo successive, proh dolor! ipsa Romana Ecclesia per non modica spatia temporum viduitatis incommoda deploravit &c.f Ipsi namque Fratres denuo de sola providentia summi Patris, & ejus permissione mirabili in humilitatem nostram omnes unanimiter concordantes Nos tunc Fratrem Petrum de Murroneg Ordinis S. Benedicti ad summi Apostolatus apicem evocarunth, Nobis decretum evocationis hujusmodi per speciales eorum Nunciosi destinantes. Quamquam autem tanti oneris moles nostris debilibus importabilis humeris, utpote qui in humili statu positi, & solitudine eremi longissimis educati temporibus, mundanorum negotiorum curâ depositâ, elegeramus semper pro tutiori consilio in domo Domini solitarii abjici, nostram insufficientiam stupore nimiùm tremendæ discussionis invaderet, considerantes tamen, quòd prolixior mora in subrogatione Pastoris trahebat Ecclesiæ, ac gregi Dominico periculosum per universa Mundi climata nocumentum &c. ac sperantes in eo, qui nunquam deserit inconsultos, & a quo vocationem nostram hujusmodi processisse fideliter supponimus, & humiliter confitemur, impositum Nobis onus ipsum assumpsimus, ac in eo Divinæ misericordiæ nostrum subjecimus imperfectum, sperantes quòd ipsa benigniùs in beneplacito suo diriget actus nostros ad sui laudem, & gloriam, exaltationem ipsius Matris Ecclesiæ, ac statum prosperum Fidei Christianæ &c.j Universitatem itaque vestram monemus, rogamus, & obsecramus in Domino Jesu Christo, quatenus diligentiùs attendentes, quòd vos in quamdam sollicitudinis nostræ partem injunctum vobis officium, & cura singularis electionis evocarit, sic Nobis cum orationum suffragiis, aliisque placantibus Majestatem Divini Nominis continuatis intercessionibus assistatis, quòd tanti ponderis molem vix ministerio humano portabilem per illius suffragium supportare possimus &c. Ceterum Fratres, & filii affectum vobis charitativæ benignitatis expandimus, & sinum charitatis solidæ aperimus proponentes in quibus cum Deo poterimus, honori vestro deferre, ac vestra, & Ecclesiarum vestrarum commoda, pro quibus ad Nos recurrere cum securitate poteritis, in promptitudine benevolentiæ promovere. Datum Aquilæ &c.k
-
Bullarium Franciscanum romanorum pontificum, tomus IV, n°I., p.330
-
(a) Archiepiscopo: Fr. Bonifacio ex Ordine Prædicat. assumpto anno 1274. a B. Gregorio X. annoque 1295. defuncto, quem fere omnes patria Genuensem e veteri familia Flisca natum esse scribunt; sed Fr. Salinbene Parmensis O. M. auctor æqualis a nobis sæpe citatus in suo Chronico MS. pag. 241. hunc dicit patria Parmensem, & Gregorii X. affinem; cumque alio loco scribat Innocentium IV. e gente Flisca 4. Sorores Parmæ nuptas habuisse; conjicimus fuisse eum Fliscum, & Parmensem ex parte matris; ex parte verò genitoris Gregorii X. affinem.
-
(b) Suffraganeis: ex quibus Regiensis tunc erat Fr. Guillelmus Bobiensis ex Ordine Minorum anno 1290. promotus, & anno 1301. e vivis sublatus.
-
(c) Attingunt &c.: ut apud cit. Raynaldum.
-
(d) Nicolao Papa iv.: antea jam Ordinis Minorum alumno.
-
(e) Solvente: anno 1292. pridie Nonas Aprilis.
-
(f) Deploravit: annis duobus, tribus mensibus, & dies duos.
-
(g) De Murrone: monte supra Sulmonam Aprutii civitatem sito 2. mil. pass. hinc distante.
-
(h) Evocarunt: quinto idus Julii die 6. post ejus electionem edito decreto apud cit. Raynaldum n. 7. legendo.
-
(i) Eorum nuncios: Archiepiscopum Lugdunen. Urbevetanum, & Portuensem Episcopos ex cit. Raynaldo.
-
(j) Christianæ &c.: ut apud prædictum Raynaldum.
-
(k) Aquilæ &c.: deest dies, & mensis, quo litteræ datæ sunt; sed exaratæ putantur paulò post ejus coronationem in fine mensis Augusti, aut initio Septembris.