« bullarium-franciscanum-2917 »

NICOLAUS &c.

Dilecto filio nobili Viro Raynerio Munaldia Raynerii Stephani Civi Urbevetano Sal. & Ap. Ben.

In nostra proposuisti præsentia constitutus, quòd cum tu olim in hæreticorum errores, suggerente inimico humani generis, incidisses, bonæ memoriæ Bartholomæus Episcopus Grossetanus,b & dilectus filius Benevenutusc Minorum Ordinis Professores tunc Inquisitores hæreticæ pravitatis in Urbevetana Civitate, & Romana Provincia a Sede Apostolica deputati, in te propter hoc excommunicationis sententiam promulgarunt, te fuisse fautorem, & credentem hæreticorum sententialiter judicantes, tibique quasdam pœnas pro pœnitentia injungentes. Cumque tu postmodum supernæ lucis gratiâ illustratus, hæreticæ pravitatis nube omnino propulsa, reatum tuum humiliter recognoscens ad Ecclesiæ unitatem, & observationem orthodoxæ fidei rediisses, & eisdem Inquisitoribus, necnon & dilecto filio Fratri Leonardo de Tibured prædicti Ordinis Inquisitori hæreticorum a præfata Sede in prædictis Civitate, ac Provincia deputato ad præsens Inquisitionis hujusmodi officium in eisdem Civitate, ac Provincia exercenti, devote in executione commissæ sibi hujusmodi Inquisitionis fideliter astitisses, prædictos hærecos pro viribus persequendo, iidem Inquisitores hoc provide attendentes te ab eadem excommunicationis sententia in te, ut prædicitur, promulgata, & ab illa etiam, quam, pro eo quòd incideras in prædictos errores, incurreras ipso facto, necnon a memoratis pœnis misericorditer absolverunt, imposita tibi alia pœnitentia salutari, prout in Instrumentis publicis inde confectis pleniùs dicitur contineri. Nos itaque tuis devotis supplicationibus inclinati hujusmodi processus dictorum Inquisitorum in eo, quòd te absolverunt a præfatis excommunicationis sententiis, atque pœnis, ratos, & gratos habentes illos auctoritate Apostolica confirmamus, & præsentis scripti patrocinio communimus. Et ut eò devotiùs, & ferventiùs in Fidei Christianæ observantia persistere delecteris, quò potiorem a Nobis super hoc fueris misericordiam consecutus, omnem maculam, sive infamiam, & quamlibet aliam inhabilitatis notam, quam occasione præmissorum nosceris incurrisse, & quæ tuis filiis, & posteris posset impingi, de Apostolicæ potestatis plenitudine abolemus. Decernentes quòd occasione prædicta nullum tibi, dictisque filiis, & posteris possit fieri præjudicium, vel impedimentum præstari, aut obstaculum interponi, quominus tu, ac iidem filii, & posteri possitis ad actus legitimos, & honores assumi. Nulli ergo omnino hominum liceat hanc paginam nostræ confirmationis, abolitionis, & constitutionis infringere &c. Datum ut supra &c.