« bullarium-franciscanum-2585 »

NICOLAUS &c.

Dilecto filio ... Custodi Fratrum Minorum Velletren.a Salutem, & Apostolicam Benedictionem.

Ex parte Communis Civitatis Velletren. Nobis extitit intimatum, quòd dudum inter Progenitores, & Consanguineos Nobilis Viri Petri Nicolai Angeli, & Nobilis Mulieris Margaritæ natæ quondam Thomasii Frederici de Velletro suscitatæ inimicitiæ diutiùs, & protractæ populum, & statum pacificum ipsius Civitatis, non sine personarum, & rerum periculis multipliciter vexaverunt, propter quod dicti Nobiles, qui se quarto Consanguinitatis gradu contingunt, ad procurandum in eadem Civitate pacis commodum, & tranquillitatis solatium desiderantes se matrimonialiter copulare, salvo beneplacito Sedis Apostolicæ, per verba de futuro sponsalia ad invicem contraxerunt. Quare dictum Commune Nobis humiliter supplicarunt, ut cum ex hujusmodi Matrimonio in ipsa Civitate tranquillitatis resultet commodum, & si non fiat, suscitatur exinde ingentis turbationis procella, providere super hoc de opportunæ dispensationis remedio dignaremur. Nos itaque, qui pacem optamus universis, & maxime in terra Ecclesiæ constitutis, gerentes in Domino de tua circumspectione fiduciam pleniorem, discretioni tuæ per Apostolica scripta mandamus, quatenus si præmissa, super quibus tuam intendimus conscientiam onerare, inveneris veritate subnixa, cum dictis Nobilibus, quòd impedimento non obstante prædicto matrimonium insimul libere contrahere valeant, & in contracto licite remanere, dispensare auctoritate nostra procures. Non obstante indulgentia, qua tibi, vel Ordini tuo a Sede Apostolica dicitur esse concessum, quòd non tenearis te intromittere in quibuscumque negotiis, quæ tibi per ipsius Sedis litteras committuntur, nisi in eis de indulto hujusmodi plena, & expressa mentio habeatur. Datum ut supra.