Général
-
Honorius IV (1285-1287)
-
Ut fundum Fratribus Sistaricen. O.M. ad eorum Cœnobium ampliandum vendant, indulget, & a juramento non alienandi solvit. (Ex Vatic. Reges. Pontif. ep. 188. an. 2.)
-
Anno 1286. die 17. Novembris.
-
1286
-
HONORIUS &c.
Dilectis Filiis Præposito, & Capitulo Ecclesiæ Sistaricen.a Salutem, & Apostolicam Benedictionem.
Considerantes attentiùs, quòd Ordo Fratrum Minorum virtutum varietate circumamictus in medio Ecclesiæ quasi Solis radius relucescat; ea libenter concedimus, per quæ ipsius Ordinis professores in suis justis desideriis consolentur. Exposuerunt siquidem Nobis dilecti Filii Guardianus, & Fratres Sistaricensesb ejusdem Ordinis, quòd eis locum, quem apud Sistaricum habent, in quo propter sui arctitudinem commorari nequeunt juxta ipsius Ordinis honestatis exigentiam, proponentibus ampliare, Nos ipsorum supplicationibus inclinati, Universitatem vestram rogandam per Nostras litterasc sub certâ formâ duximus, & hortandam, ut quemdam fundum, sive agrum ad vos pertinentem, sine quo nequit ipsius loci amplatio provenire, eisdem Guardiano, & Fratribus vendere pro competenti pretio curaretis. Verùm juramento, quòd præstitistis de non vendendis Ecclesiæ vestræ possessionibus, obsistente, nequitis, ut asseritis, preces Nostras in hac parte liberaliter adimplere. Nos itaque volentes, ut hujusmodi eorumdem Guardiani, & Fratrum pium desiderium optatum consequatur effectum; vobis concedimus, quòd hujusmodi fundum, sive agrum eisdem Guardiano, & Fratribus juxta tenorem dictarum litterarum, juramento non obstante hujusmodi, vendere, aut cum eis permutare liberè valeatis, juramento ipso post hujusmodi venditionem in suo nihilominus robore duraturo. Ita tamen, quòd pretium, quod ex hujusmodi venditione receperitis, in utilitatem ejusdem Ecclesiæ convertatis.
Datum Romæ apud Sanctam Sabinam xv. Kalendas Decembris, Pontificatus Nostri Anno Secundo.
-
Bullarium Franciscanum romanorum pontificum, tomus III, n°LXVII., p.586
-
(a) Sistaricen.: al. Cistaricen. in 1. hujus Operis tomo pag. 580. (d) commemoratæ.
-
(b) Fratres Sistaricen.: Qui ea in Civitate locum obtinent tantæ antiquitatis, ut jam anno 1260. esset caput Custodiæ sui nominis in Provincia Provinciæ ex alias cit. distributione. seu recensione Provinciarum & Custodiarum nostri Ordinis eo anno Narbone in Comitiis Gen. facta; etsi fundatio ignoratur, & Waddingus anno tantum 1289. num. 49. ejus parce meminit: ita pariter Monasterii Clarissarum. illius urbis meminit primum ad ann. 1330. num. 19., cum tamen fundamentum fuerit anno 1281., vel, ut fundaretur, petita licentia ex monumento in tom. 1. Galliæ Christianæ P. Dion. Sanmarth. pag. 91. Istrumen.
-
(c) Nostras litteras: Quæ non habentur.