« bullarium-franciscanum-2310 »

MARTINUS &c.

Dilecto Filio Fratri Angelo de Perusioa Ordinis Fratrum Minorum Salutem, & Apost. Benedictionem.

Contigit hactenus, quòd propter graves, & multiplices excessus perpetratos, & continuatos diutiùs per dilectos Filios … Potestatem, … Capitaneum, Consilium & Commune Perusin. contra Fulginates, & Ecclesias, & Ecclesiasticas personas, & terras, ac bona ipsorum; Nos, exigentibus eorum culpis, & contumaciis, in eosdem … Potestatem, … Capitaneum, Consiliarios, & certas singulares personas ipsorum Civitatis excommunicationis, & in Civitatem ipsam interdicti sententias promulgavimusb; & ipsis nonnullas pœnas pecuniarias infliximus; ac etiam inter alia privavimus illos omnibus privilegiis, indulgentiis, gratia, feudis, bonis, castris, villis, possessionibus, nemoribus, pratis, lacu, juribus, vel jurisdictionibus, quæ a Romanâ, vel aliis tenent Ecclesiis, vel Monasteriis. Judices quoque specialiter, ac Tabelliones judicatus, ac tabellionatus officiis; alios insuper singulares Civitatis ejusdem omnibus officiis, ita quòd in Potestates, vel Capitaneos, aut Rectores, vel ad quodcumque aliud officium, vel regimen Civitatum, Castrorum, vel locorum ubilibet non possent assumi; & si assumerentur, etiam assumentes essent excommunicationis sententiâ innodati; & quamdiù tales præessent, Civitates, Castra, & loca prædicta, quæ sic ipsos reciperent, interdicto Ecclesiastico subjacerent; mandata insuper, præcepta, ordinationes, & statuta, omnesque processus, quæ facerent, & sententias, quas ferrent; ac quicquid penitùs in contractibus, & obligationibus, sive in quibuscumque aliis actibus agerent sic assumpti, nulla, irrita, & vacua essent; ac nihilominus instrumentis, quæ dicti tabelliones ex tunc facerent in judiciis, vel extra, nulla fides foret aliquatenus adhibenda. Præterea mandavimus Interdictum hujusmodi per Venerabilem Fratrem Nostrum … Episcopum, & dilectos Filios Clerum Perusin. tam Religiosos, quàm Seculares observari; & eisdem … Potestati, … Capitaneo, Consilio, aliisque personis eorum Civitatis, nisi dumtaxat Baptismum parvulis, & pœnitentiam morientibus, Sacramenta Ecclesiastica nullatenus ministrari; & demum eorum contumaciis excrescentibus, Episcopum, & Clerum eosdem de Civitate ipsâ exire, ad illam sine Nostrâ licentiâ nullatenus reversuros sub certis modis, & formis, prout in Nostris processibus pleniùs continetur. Et tandem ipsis ad mandata Nostra humiliter redeuntibus, Nos ad eos, & illorum Civitatem misericordiæ gratiam convertentes mandavimus præter alia sub certâ formâ Interdictum hujusmodi relaxari; & singulares personas præfatæ Civitatis, & Diœcesis Perusin. a prædictâ sententiâ excommunicationis absolvi; ac prædictis Episcopo & Clero redeundi ad Civitatem eamdem, ac ibidem quæ ad suum spectant officium, exercendi liberè sicut priùs, licentiam ad certum tempus fecimus elargiri. Postmodum autem ..... Potestas, … Capitaneus, Consilium, & Commune prædicti Nostris beneplacitis per amplioris devotionis studia coaptantes, & pro satisfactione injuriarum, & excessuum prædictorum, in quantum Nos, & Ecclesiam prædictam contingunt, per dilectum Filium Simonem Guidalotti Concivem, & Syndicum eorum ad hoc speciale, ac plenum mandatum habentem, satisfactionem plenariam exhibentes supplicarunt Nobis humiliter, ut eosdem Nostros processus, & sententias relaxare, ac pœnas, privationes, & condemnationes, quas propter præmissa incurrisse noscuntur, remittere; ac ipsos ad statum pristinum reducere dignaremur. Nos autem more pii Patris offensarum immemores, ubi ad hoc pœnitentiæ signis congruentibus invitamur, ut in devotione, quam ad Nos, & prædictam Ecclesiam repromittunt, efficiantur promptiores; immò rememorantes potiùs devotionis constantiam, qua erga prædictam Ecclesiam ab antiquis temporibus viguerunt; & damna plurima, & incommoda, quæ pertulisse dicuntur constanter in devotione ipsius Ecclesiæ persistentes; ipsis paternæ benignitatis affectum liberaliter exhibemus. Ipsorum igitur supplicationibus inclinati per alias Nostras litteras eisdem Episcopo, & Clero morandi liberè sicut priùs in Civitate prædictâ; & ibidem, quæ ad suum spectant officium, exercendi licentiam elargimur; & præfatas sententias, ac prædictos, & omnes alios processus Nostros tàm spirituales, quam temporales in præmissis hac occasione habitos, quatenus illos, Civitatem, Diœcesim, Districtum, Territorium, & & eorum Jurisdictionem contingunt; nec non privationes, pœnas, condemnationes, quoad ipsos, & alios, qui eorumdem Diœcesis, Districtus, Territorii, & Jurisdictionis existunt, auctoritate Apostolicâ ex certâ scientiâ totaliter remittimus, ac etiam relaxamus; & a prædictis sententiis, pœnis, privationibus, & condemnationibus ipsos, & alios eorumdem Diœcesis, Districtus, Territorii, & Jurisdictionis nihilominus absolventes, eosdem … Potestatem, … Capitaneum, Consilium, ac Commune, & eorum Civitatem ad prædicta privilegia, & ad pristinum statum Apostolici favoris & gratiæ, quo erant ante hujusmodi mota discordia inter eos, & Fulginates prædictos; Judices quoque, ac Notarios, & alios singulares prædictos ad reintegrationem sui status restituimus de Apostolicæ plenitudine potestatis. Per hujusmodi autem remissionem, relaxationem, absolutionem, & restitutionem non intendimus juribus memoratæ Ecclesiæ quæcumque aliàs in prædictis, & prædictorum quolibet haberet, in aliquo derogare; nec prædictis Fulginatibus, Ecclesiis, & Ecclesiasticis personis, ac aliis damna passis per prædictas absolutionem aliquod præjudicium generari, quominus super damnis ipsis per eosdem … Potestatem … Capitaneum, Consilium, & Commune, & de eorum mandato illatis teneantur plenariè stare juri. Ut igitur saluti cujuslibet prædictorum per providentiam dictæ Sedis pleniùs consulatur, ita quòd nulli ex prædictis expertes gratiâ mansuetudinis Nostræ remaneant; per Apostolica tibi scripta mandamus, quatenus illis de Civitate, Diœcesi, Districtu, & Territorio prædictis, quos prædictâ excommunicationis sententiâ ligatos, & ab eâ nondum absolutos inveneris, cum ab eis & eorum quolibet fueris humiliter requisitus, hac vice juxta formam Ecclesiæ per te, vel alium, seu alios beneficium absolutionis impendasc, rescripturus Nobis fideliter quicquid in hac parte duxeris faciendum; non obstante Indulgentiâ &c.d

Datum apud Urbemveterem xi. Kalendas Julii, Pontificatus Nostri Anno Quarto.