Général
-
Martin IV (1281-1285)
-
Fr. Henrico Bremen. O. M. Gnesnen. Archiepiscopatum admittere renuente sequens Jacobus eligitur, & confirmatur. (Ex Vatic. Reges. Pontif. ep. 50. to. 1. an. 3.)
-
Anno 1283. die 30. Julii.
-
1283
-
MARTINUS &c.
Dilecto Filio Jacobo Electo Gneznen.a Sal., & Apost. Benedictionem.
Recte tunc Ecclesiarum utilitati prospicitur, & indemnitati salubriter præcavetur, cum discretis, & providis ipsarum cura committitur; & viduatarum regimini Pastores ydonei proponuntur. Unde Nos, qui licet insufficientibus meritis in sublimi sumus Apostolici culminis specula, disponente Domino, constituti, curis continuis angimur; ut eædem Ecclesiæ Nostræ sollicitudinis studio per Pastores gubernentur industrios; & per Duces perspicuos in suis gregibus dirigantur. Sanè dudum Gneznensi Ecclesiâ per obitum bonæ memoriæ Martinib Gneznen. Archiepiscopi destitutâ Pastore; dilecti Filii Capitulum ejusdem Ecclesiæ &c.c de dilecto Filio Fratre Henrico de Bremd Ordinis Minorum, quem Nobis de nobilitate generis, litterarum scientiâ, honestate morum, aliisque virtutum meritis fidedignorum testimonia multipliciter commendarunt, de Fratrum Nostrorum consilio, & Apostolicæ plenitudine potestatis prædictæ Gneznen. Ecclesiæ duximus providendum. Verùm prædicto Fratre Henrico renuente provisionem hujusmodi acceptaree; præfati Capitulum ejusdem Ecclesiæ in te tunc Cantorem ipsius Ecclesiæ vota sua unanimiter direxerunt, te in suum Archiepiscopum eligentes. Demùm verò te in Nostrâ, & prædictorum Fratrum Nostrorum præsentiâ in Nostris manibus liberè, ac spontè renuntiante omni juri, si quod tibi per electionem hujusmodi de te factam, fuerat acquisitum; Nos hujusmodi renuntiatione receptâ, periculis, quæ per vacationem diutinam eidem posset Ecclesiæ imminere, provisione celeri occurrere cupientes ad personam tuam, cui de vitâ laudabili, conversatione placidâ, litterarum scientiâ, morum honestate decorâ, spiritualium providentiâ, & temporalium prudentiâ laudabile testimonium perhibetur, Nostræ considerationis oculos duximus dirigendos; ac te de eorumdem Fratrum Nostrorum consilio, & Apostolicæ plenitudine potestatis eidem Gneznen. Ecclesiæ in Archiepiscopum præficimus & Pastorem in eo, qui dat gratiam, & largitur præmia, confidentes, quòd dicta Ecclesia per tuam solertem industriam, & providentiam circumspectam spiritualibus, & temporalibus proficiet incrementis. Quocirca Discretioni tuæ per Apostolica scripta mandamus, quatenus ad eamdem Ecclesiam de Apostolicæ Sedis, & Nostro favore confisus cum Divinæ gratiâ benedictionis accedas, te in curâ ipsius, cujus plenam in spiritualibus & temporalibus administrationem tibi committimus, talem corde sollicito redditurus, quòd grex tuæ Circumspectioni creditus in te salutis ministrum reperiisse gaudeat; & tibi tandem æterni Pastoris benignitas unicuique responsura pro meritis æternæ retribuat gloriam claritatis.
Datum apud Urbemveterem iii. Kalendas Augusti, Pontificatus Nostri Anno Tertio.
-
Bullarium Franciscanum romanorum pontificum, tomus III, n°LIV., p.510
-
(a) Gneznen.: al. Gnesnen. de quo Stephanus Damalevicius in Catal. Archiepis. Gnesnen. num. 25.
-
(b) Martini: De quo consulatur supra relata epist. 15. hujus Pontificis Onerosa pastoralis &c. anno 1281. die 23. Decembris scripta.
-
(c) Ecclesiæ &c. Ut in dicta 15. epist. usque ad Ecclesiæ memoratæ.
-
(d) Fr. Henrico de Brem: Leg. de Brema vulgo Bremen, cujus notitiam habes in cit. 15. epistola (i k).
-
(e) Acceptare: Hoc autem ignoravit Waddingus: & causam crediderim, quam refert Pontifex in epist. Philippo Episcopo Firmano A. S. Legato anno 1279. scripta 23. Decembr. apud Raynaldum ad eum annum n. 43. nimirum illius Ecclesiæ desolationem, & hominum stragem a Paganis editam.