« bullarium-franciscanum-2215 »

NICOLAUS &c.

Venerabili Fratri Gentilia Archiepiscopo Regin.b Salutem, & Apostolicam Benedictionem.

Recte tunc Ecclesiarum utilitati prospicitur, & idemnitati salubriter præcavetur; cum discretis, & providis earum cura committitur; & viduatarum regimini Pastores idonei proponuntur. Unde Romanus Pontifex, cui ex officio Apostolatus incumbit de universis Ecclesiis sollicitè cogitare; hoc maximè circa ipsas attendit, & ad id propensiùs incitatur; ut per bonos, & dignos gubernentur Rectores; per duces perspicuos in suis gregibus dirigantur. Olim siquidem Regin. Ecclesiâ per obitum bonæ memoriæ Jacobic Archiepiscopi Regin. Pastoris regimine destitutâ, dilecti Filii Capitulum ejusdem Ecclesiæ, prout Nobis exponere curaverunt, vocatis omnibus, qui voluerunt, debuerunt, & potuerunt commodè interesse; convenientes in unum, Spiritus Sancti gratiâ invocatâ, dilectum Filium Robertum de Castellione Decanum ipsius Ecclesiæ, quasi per inspirationem in Regin. Archiepiscopum communiter, & concorditer elegerunt; ac idem Decanus suum præstitit hujusmodi electioni consensum; dictique Capitulum facientes Nobis postmodum ejusdem electionis decretum per suos ad hoc Procuratores idoneos, & Nuntios præsentari, & Nobis, ut electionem confirmaremus eamdem, suppliciter postularunt. Nos igitur electionem ipsam, & personam Electi per aliquos ex Fratribus Nostris, prout moris est, examinari fecimus diligenter; & quia invenimus eam de personâ in scientiâ ad regimen ejusdem Ecclesiæ patiente defectum minus canonicè celebratam; electionem eamdem de Fratrum Nostrorum consilio, exigente justitiâ, cassavimus, & irritavimus; & cassam, & irritam nuntiantes Nobis eâ vice provisionem prædictæ Ecclesiæ duximus reservandam. Cæterum periculis, quæ per vacationem diutinam possent eidem Ecclesiæ imminere, provisione celeri occurrere intendentes; ac illam ad ipsius regimen desiderantes personam assumi, cujus essent Nobis virtutum merita non ignota; & per cujus industriam posset eadem Ecclesia in spiritualibus, & temporalibus salubriter gubernari; in te Fratrum Minorum Ordinis professorem direximus Nostræ Considerationis intuitum, quem Nobis de litterarum scientiâ, vitâ laudabili, conversatione placidâ, morum honestate, discretionis, & consilii maturitate, prudentiâ spiritualium, & temporalium providentiâ fide dignorum testimonia, ac familiaris, & diutina experientiad approbasse noscuntur. Quapropter volentes gregi Dominico speciali providere diligentiâ, de prædictorum Fratrum Nostrorum consilio, & Apostolicæ Sedis plenitudine potestatis te prædictæ Ecclesiæ præfecimus in Archiepiscopum, & Pastorem; tibique Consecrationis munus Nostris manibus duximus impendendum; firmam spem, fiduciamque tenentes, quòd dicta Ecclesia per tuam solertem industriam, & prudentiam circumspectam in spiritualibus, & temporalibus, Deo auctore, proficiet incrementis &c.e

Datum Viterbii vii. Idus Octobris, Pontificatus Nostri Anno Secundo.