Général
-
Nicolas III (1277-1280)
-
Eligitur Episcopus Tullensis in Belgio, eique Ecclesia commendatur. (Ex Reges. Vatic. epist. 167. apud Waddingum ad hunc ann. num. 23. Reges. Pontif.)
-
Anno 1279. die 4. Octobris.
-
1279
-
NICOLAUS &c.
In supremæ dignitatis specula &c.c Sanè vacante dudùm Ecclesiâ Tullen. per obitum bonæ memoriæ Gilonis Episcopi Tullen., primò de quondam Joanne de Fronteneto ipsius Ecclesiæ Canonico, qui hujusmodi electionis prosequendo negotium apud Sedem Apostolicam diem clausit extremum; & postmodum de Rogero Archidiacono de Portu in eâdem Ecclesiâ fuerunt electiones inibi celebratæ. Opponentibus itaque se quibusdam ex Canonicis Ecclesiæ prædictæ hujusmodi electioni de Archidiacono supradicto, super ipso negotio ad Sedem prædictam deducto extitit apud Sedem eamdem diutiùs litigatum; & tandem eodem Archidiacono liberè resignante omne jus, quod sibi ex electione hujusmodi competebat; Nos eâ vice provisionem ejusdem Ecclesiæ Nobis duximus reservandam; & paternâ volentes sollicitudine eamdem Ecclesiam a dispendiis, quæ sibi ex vacatione diutinâ imminere poterant, præservari: Te tunc Ministrum Fratrum Ordinis Minorum superioris Alemanniæd licet absentem prædictæ Tullen. Ecclesiæ, de Fratrum Nostrorum consilio, & Apostolicæ Sedis plenitudine potestatis in Episcopum præfecimus, & Pastorem, administrationem ejusdem Ecclesiæ tibi spiritualiter, & temporaliter plenariè committentes. Quocirca Discretioni tuæ per Apostolica scripta mandamus &c.e
Datum Viterbii iv. Nonas Octobris, Pontificatus Nostri Anno Secundof.
-
Bullarium Franciscanum romanorum pontificum, tomus III, n°CXXXIV., pp.422-423
-
(a) Fr. Conrado: Tubingano O. M. de quo videnda est not. (a) ad epistolam 32. Intima mentis &c. anno superiore nonis Junii scriptam.
-
(b) Tullen.: In Lotharingia sub Archiepiscopo Trevirensi.
-
(c) Specula &c. Ut in Bulla 102. hoc anno die 25. Februarii pro Fr. Ægidio Episcopo Valvensi usque gaudii plebs lætetur.
-
(d) Superioris Alemanniæ: Al. Argentinæ, quæ illius Provinciæ caput erat; ut in Narbonensi distributione Provinciarum anno 1260. facta, si sincera est: nam in epist. B. Gregorii X. anno 1274. dicitur Provincia Alemanniæ apud Waddingum ad eum annum n. 33., Argentinæ verò primum legitur in veteri Provinciali Ordinis apud Jordanis Chronicon Ms. Vatic. circa ann. 1334. editum; cum in encyclicis litteris anni 1322. apud Waddingum n. 52. extet H. Minister superioris Germaniæ.
-
(e) Mandamus &c. Ut in dicta Bulla usque consequi merearis.
-
(f) Agit de hoc Episcopo Waddingus & ad hunc ann. n. 27., & ad ann. 1296., quo ex hac vita migravit, n. 7., priorique loco ait quosdam asserere, eum dignitatem dimisisse; alios vero depositum fuisse anno 1287., eo quod in Concilio Herbipolensi eo anno die 18. Martii a Legato Pontificio coacto eidem Legato 4. partem proventuum Eccles. per quatuor annos exposcenti se opposuerit, ita ut nihil obtinere quiverit, & quidem de ejus oppositione omnes coævi, supparesque Scriptores consentiunt; de depositione vero non omnes: at Chronica dumtaxat ab Heterodoxis vulgata, interpolataque; ut mihi verisimilius sit non depositum, sed eum dignitatem serò deposuisse, cum illum inveniam anno 1289. mense April. Romæ in Aula Pontif. cum pluribus aliis Antistitibus Indulgentias contulisse Capellæ S. Cuniberti, & paulo post Reate Monasterio SS. Morandi & Christophori ex Bollandi Continuat. Act. SS. ad diem 9. April. & 3. Junii, annoque 1295. cum 22. Præsulibus Romæ extantibus Indulgentias concessisse Ecclesiæ S. Martini Glanderien. Metensis Diœcesis Ordinis S.B. ex tom. 1. Anecd. Martene &c. col. 1275. Postea ex Vatic. Tabul. oblatum est nobis Bonifacii VIII. diploma, quod insequenti tomo dabitur, & quo constat, eum anno 1295. dumtaxat, & paulo ante mortem postulasse a Pontifice facultatem dimittendi Episcopatum.