« bullarium-franciscanum-2101 »

NICOLAUS &c.

Dilectis Filiis Hieronymo quondam Minorum Fratrum Ordinis Generalis Ministro Sanctæ Romanæ Ecclesiæ Presbytero Cardinali, & Fratri Johanni Magistro Ordinis Prædicatoruma , Sal., & Apost. Bened.

Litteræ vestræ circumspectionis, & cedulæ, quas Nobis dilectus Filius Frater Johannes de Viterbiob Ordinis Fratrum Prædicatorum ipsius Ordinis Prædicatorc ad Nos deferendas, a vobis sibi commissas sollicitudine laudanda præmisit; ea, quæ circa commissum industriæ vestræ ab Apostolicâ Sede negotium acta sunt post reditum Nuntii per vos ad Carissimi in Christo Filii Nostri … Regis Castellæ, ac Legionis illustris præsentiam destinati; nec non & causas, ac modos, per quos inter Carissimum in Christo Filium Nostrum … Regem Francorum illustrem, & ipsum Regem Castellæ possent pacis fædera efficaciùs reformari, plenè, ac sollicitè descripserunt, super quo diligentiam vestram, & studium multipliciter acceptantes in Domino commendamus. Sanè dum damna & pericula gravia, quæ Religioni Christianæ ingerit periculosa inter eosdem Reges excitata discordia, meditamur, dum utilitates, & commoda, quæ inter ipsos, Deo auspice, reformanda concordia repromittit, attentè pensamus; adeo affectus accenditur; adeo cor nostrum in meditationis scrutinio concalescit; ut nullo modo conscientia patiatur, nos in incepti tractatus reconciliandæ inter dictos Reges pacis prosecutione tepescere, assumptum remittere qualitercumque propositum, vel Nostris, aut vestris in hoc opportunis laboribus indulgere. Verùm nostis, quod memoratus Rex Francorum tanquam devotus Princeps, & benedictionis Filius Nostris persuasionibus acquiescens, & primitias Nostrarum precum per litteras Nostras, & memoratum Fratrem Johannemd sibi porrectarum effectu carere non sinens terminum de recolligendis aciebus suis a Kalendis instantis usque ad Kalendas subsequentis Maji prorogavit; nihilominus interim, ut suis verbis utamur, aggressurus acerbum, ad quod impellente ipsum inimicorum atrocitate non fuerit provocatus. Nec latere vos volumus, quòd sicut per litteras dilecti Filii Fratris Benvenutie Ordinis Minorum, quem ad præfatum Regem Castellæ super eodem negotio duximus destinandum, accepimus; idem Rex Castellæ multæ in hoc devotionis exhibens argumenta, Nostris se offert in sæpefato negotio acquiescere monitis, ac parere mandatisf. Et ad hoc pleniùs explicandum Venerabilem Fratrem Nostrum ..... Episcopum Ovetensemg citò se vestris præsentaturum conspectibus, ad Nostram decrevit præsentiam destinare; sicut hæc per eumdem Fratrem Benvenutum, qui se ad Nos per Franciam rediturum in prædictis litteris suis asseruit, ad notitiam vestram pervenient, vel jam forsitan pervenerunt. Ex iis itaque spe de Clementiâ Divinâ conceptâ, quod actor pacis, & salutis amator opus imperfectionis ignorans, qui jam Regum ipsorum animos ad talia inclinavit, quod cæpit, ipse perficiet, & usque ad perfectum non solum præparatoria concordiæ inchoata inter Reges eosdem, sed & veram solidamque concordiam suâ pietate perducet, a cæptis non putavimus desistendum; præsertim cum ante prædictorum Fratrum Johannis, & Benvenuti ad Nos reditum plenè de hujusmodi negotii circumstantiis instrui non possimus, & vos, sicut scripsistis, ad sæpefatum Regem Castellæ Nuntium miseritis iteratò, cujus responsionem secundum præmissam ipsius Fratris Benvenuti assertionem potestis cum meliori fiduciâ, & omnino expedit, expectare. Ideoque præsentium vobis auctoritate mandamus, quatenus nullo modo vos prosecutioni ejusdem negotii subtrahatis, sed insistatis instanter, donec denuò receperitis de beneplacito Nostro mandatum. Si tamen negotium sæpefatum, vel per adventum memorati Fratris Benvenuti; vel per reditum prædicti vestri Nuntii ad eumdem Regem Castellæ ultimò destinati; seu aliàs ad eum statum sit fortè deductum, quòd nullum in ipso periculum, nullave desperationis conjectura possit ex absentiâ vestrâ timeri: Volumus, quod Tu, Fili Cardinalis, ad Sedem Apostolicam redeash; Tu verò, Fili Magister, sicut memoratus Frater Johannes petiit, ad Generale Capitulum dicti tui Ordinis, quod instati, accedas, Nostram, finito eodem Capitulo, præsentiam celeriter aditurus. Hoc autem conscientiis vestris committimus; & eas exinde oneramus; sperantes, quod propter aliquam privatam occasionem nequaquam alicui discrimini tantum negotium exponetis.

Datum ut supra.