Général
-
Clément IV (1265-1268)
-
Eximit eos a solutione Collectarum, præstationum, aut subsidiorum quorumcumque etiam Sedis Apostol. Legatorum, aut Nunciorum. (Ex Archivo nostri Conventus S. Francisci apud Nursiam.)
-
Anno 1266. die 28. Martii.
-
1266
-
CLEMENS &c.
Dilectis filiis … Custodi, & Fratribus Hospitalis Leprosorum Sancti Lazari de Valle Collisa Ordinis Fratrum Minorum Spoletanæ Diœcesis Salutem, & Apostolicam Benedictionem.
Paupertati vestræ, quam propter Deum voluntariè sustinetis, & quieti paterna in posterum sollicitudine providere volentes ad instar fel. record. Urbani Papæ b prædecessoris nostri auctoritate vobis præsentium indulgemus, ut vos ad præstationem procurationum Legatorum Sedis Apostolicæ, vel Nuntiorum ipsius, aut exactionum, vel collectarum, seu subsidiorum quorumcumque minimè teneamini; nec ad ea solvendo per litteras dictæ Sedis Legatorum, Rectorum, vel Nunciorum ejusdem, cujuscumque tenoris existant, aut cujuscumque auctoritate in perpetuum compelli minimè valeatis. Nos enim decernimus irritas, & inanes Interdicti, Suspensionis, & Excommunicationis sententias; si quis propter hoc in vos, vel in vestrum aliquos, aut Hospitale vestrum in posterum contigerit promulgari. Nulli ergo omnino hominum liceat hanc paginam nostræ Confirmationis infringere, vel &c. Si quis autem &c.
Datum Perusii v. Kalendas Aprilis, Pontificatus Nostri Anno Secundo.
-
Bullarium Franciscanum romanorum pontificum, tomus III, n°LXXIV., pp.76-77
-
(a) De Vallecollis: Al. De Valencellis, ut in Bulla Nicolai IV. anno 1290. Idibus Novembris eisdem verbis hanc Clementis IV. confirmantis; at in illa Urbani IV., ut & in ista dicitur de Vallemcollis, lego tamen de Vallecollis.
-
(b) Urbani Papæ: Nempe IV. anno 1262. die 23. Maji per litteras, quæ quidem desunt, habentur tamen aliæ incip. Cum a nobis petitur &c. eodem die & anno datæ, quas iteravit, confirmavitque Nicolaus IV. eodem anno, ac die, quibus præsentes, ut infra suo loco: forsan & ab hoc Clemente confirmatæ, ut verisimile, etsi non apparent.