« bullarium-franciscanum-1803 »

CLEMENS &c.

Dilectis filiis Fratribus Prædicatorum & Minorum Ordinum Inquisitoribus hæreticæ pravitatis per Italiam auctoritate Sedis Apostolicæ deputatis, & in posterum deputandis Salutem, & Apostolicam Benedictionem.

Ad extirpanda de medio Populi Christiani hæreticæ pravitatis zizania, quæ abundantius solito succreverunt sic perseminante illa licentius his diebus homine inimico, tantò studiosius juxta commissam nobis solicitudinem insudare proponimus, quantò perniciosius negligeremus, eadem in necem Catholici seminis pervagari. Ut autem adversus hujusmodi nequitiæ operarios consurgant, stentque firmiter Ecclesiæ filii, & orthodoxæ fidei Zelatores; Constitutiones quasdama fel. record. Innocentius Papa IV. prædecessor noster ad extirpationem hæreticæ Pestis ediditb, & tam ipse, quam fel. memoriæ Alexander PP. prædecessor nosterc dilectis filiis Potestatibus, Rectoribus, Consulibus, Capitaneis, Ancianis, Consiliis, & Communitatibus Civitatum, Castrorum, aliorumque locorum per Italiam constitutis mandarunt, ut Constitutiones ipsas in suis conscribi Capitularibusd facerent, & exacta diligentia observarent. Unde prædictis Potestatibus, sive Rectoribus, Consulibus, Capitaneis, Ancianis, Consiliis, & Communitatibus damus nostris litterise in mandatis; ut ipsi, & singuli eorum Constitutiones easdem cum quibusdam adjectionibus, modificationibus, & declarationibus per dictum Alexandrum prædecessorem nostrum, & etiam per Nos factis conscribi in suis Capitularibus facientes, nullis indè temporibus abolendas, secundum eas contra omnem hæresim se adversus hanc sanctam Ecclesiam extollentem, sine aliqua omissione procedant. Quocirca si dicti Potestates, sive Rectores, Consules, Capitanei, Anciani, Consilia, & Communitates mandatum nostrum super hoc neglexerint adimplere, vos, & singuli vestrum illos, & singulos eorum infra designatos vobis limites per excommunicationem in personas, & interdictum in terras eorum monitione præmissa, appellatione remota, cogatis, non obstante, si aliquibus a Sede Apostolica sit indultum, vel in posterum indulgeri contingat, quod personæ excommunicari, ac Civitates, Castra, Terræ, & loca ipsorum interdici non possint; sive qualibet alia Indulgentia Sedis ejusdem, per quam effectus præsentium impediri valeat, vel differri; & de qua, cujusque toto tenore de verbo ad verbum specialem, & expressam in nostris litteris oporteat fieri mentionem; & Constitutione de duabus dietis edita in Concilio Generalif.

Datum Perusii xv. Kalend. Februarii, Pontificatus Nostri Anno Primo.