« bullarium-franciscanum-1798 »

CLEMENS &c.

Dilectis filiis ‥ Generali, & Provincialibus Ministris, ac universis Fratribus Ordinis Fratrum Minorum Salutem, & Apostolicam Benedictionem.

Ad consequendam gloriam Cælestis Patriæ sic Divina pietas humilitatem vestram per suam gratiam cernitur allexisse; quod semper ad hoc intenti estis, & vigiles, ut illam vobis, & proximis per innocentis vitæ studium acquiratis: hæc enim, & alia sancta pauperrimæ Religionis vestræ merita Nos inducunt, quod sumus ex intimo cordis affectu solliciti, ut in omnibus, quæ ad Dei laudem, & tranquillum statum devotionis vestræ cupitis, habeamus providentiæ studium efficacis. Sanè non sine quadam perturbatione animi frequenter audivimus, quod inter vos, & Religiosos aliquos illa de causa æmulationis, & dissensionis materia oriretur; quod ipsi Domos, & Ecclesias Regulares juxta loca vestra non sine vestro gravi præjudicio, & dispendio manifesto quandoque construere præsumebant. Cum itaque ad Apostolici spectet officii dignitatem de regno militantis Ecclesiæ cujuslibet scandali materiam abolere; Nos dignè volentes, quod hujusmodi æmulationis, & dissentionis occasio per diligentiæ nostræ studium amputetur; auctoritate præsentium ordinamus, & districtè inhibemus; quod nulli liceat amodo de Prædicatorum, Pœnitentiæ Jesu Christia, Beatæ Mariæ de Monte Carm li, Eremitarum S. Augustini, Sanctæ Claræ, aliisque Ordinibus in paupertate fundatisb; nullique mulierum de prædictis, seu quibuscumque aliis Ordinibus aliquod Monasterium, Ecclesiam, vel Oratorium ædificare, seu construere; nulli quoque seculari, vel Religioso cujuscumque professionis Ecclesiam, vel Monasterium, seu Oratorium jam ædificatum in aliquem transferre de Ordinibus memoratis infra spatium ccc. cannarum a vestris Ecclesiis mensurandarum per aerem, etiam ubi alias recte mensurari loci dispositio non permittit. Præterea statuimus, ut quid quid contra hujusmodi ordinationis, & inhibitionis nostræ tenorem ex nunc in antea ædificatum fuerit, diruaturc. Et ne de notitia Ordinum, & quantitate cannarum hujusmodi aliqua possit dubitatio exoriri; illos Ordines intelligi volumus in paupertate fundatos, qui ex Regulad, vel Constitutionibuse suis extra septa Ecclesiarum, Monasteriorum suorum, vel officinarum earum, & clausurum ipsorum nullas debent possessiones habere. Quod si aliquis de Ordinibus ipsius possessiones in aliquibus membris suis habere, in aliis verò non habere noscaturf; eum quoad ordinationem, inhibitionem, & statutum hujusmodi prædictis Ordinibus in paupertate fundatis annumerari volumus; & quamlibet cannarum ipsarum octo palmarum longitudinem continere, non obstantibus varia locorum consuetudine; sive privilegiis, indulgentiis, seu litteris quibuscumque tam supradictis Ordinibus, quam mulieribus, vel eorum alicui ab Apostolica Sede sub quacumque forma concessis, seu etiam concedendis, quæ de præsentibus specialem, & expressam non fecerint mentionem. Nulli ergo omnino hominum liceat hanc paginam nostræ ordinationis, inhibitionis, & constitutionis infringere, vel ei ausu temerario contraire. Si quis autem hoc attentare præsumpserit, indignationem &c.

Datum Perusii ii. Kalendas Decembrisg, Pontificatus Nostri Anno Primoh.