« bullarium-franciscanum-1696 »

URBANUS &c.

Dilectis filiis ‥ Priori Provinciali Prædicatorum in Lombardia, & ‥ Guardiano Minorum Fratrum Asten.a Salutem, & Apostol. Benedictionem.

Eo solertius insequi, & studiosius corrigere in Prælatis excessus Nos convenit, quo in eis gravius scandalizantur subditi; & pernitiosius excessus hujusmodi recipiunt in exemplum. Sane ad audientiam nostram pervenit, quod Venerabilis Frater noster ‥b Placentinus Episcopusc tanquam sibi molestum existeret, quod in devotione Romanæ Ecclesiæ Placentina Civitas persistebat, ipsam Uberto Pelavicinod indevotionis filio, & ejusdem persecutori Ecclesiæ manifesto dedit; ipsumque Ubertum in dictam Civitatem eum addestrando, seu ipsius lateri assistendo induxit; atque processionaliter recepit eumdem, postposita prorsus Pontificis gravitate. Licet igitur prurientes non habeamus aures in delectationibus Prælatorum, quantum cum Deo possumus, deferentes eisdem; quia tamen hæc non est culpa, quæ possit, vel debeat sub dissimulatione transiri, discretioni vestræ mandamus, quatenus super iis apud Civitatem prædictam, si secure poteritis, vel alibi in loco Civitati vicino eidem, ad quem tam idem Episcopus, quam producendi testes secure possint accedere; inquiratis sollicite veritatem; & eam fideliter conscribentes sub sigillis vestris Nobis transmittatis inclusam, præfixo eidem Episcopo peremptorio termino competenti, quo per se, vel per Procuratorem idoneum Apostolico se conspectui repræsentet. Non obstante indulgentiae Sedis Apostolicæ, qua dicitur Ordinibus vestris esse concessum, ut Fratres ipsorum Ordinum cognoscere non possint inviti, seu se intromittere de negotiis, quæ ipsis a Sede committuntur eadem; nisi commissionis hujusmodi litteræ de ipsis indulgentia, & Ordinibus plenam & expressam de verbo ad verbum fecerint mentionem.

Datum apud Urbem veterem vii. Kalendas Martii, Pontificatus Nostri Anno Tertio.