Général
-
Urbain IV (1261-1264)
-
Ut Rectori Patrimonii Beati Petri assistat, & obsistentes ei censura Eccles. coerceat. (Ex Vatic. Reges. Pontif. ep. 350. to. 3.)
-
Anno 1264. die 10. Januarii.
-
1264
-
URBANUS &c.
Dilecto filio Fratri Bartholomæo de Ameliaa Ordinis Minorum Inquisitori hæreticæ pravitatis Romanæ Provinciæ Salut., & Apostol. Benedict.
Volentes personam aliquam Ecclesiasticam, industriam, & fidelem in fulcimentum regiminis dilecti filii nobilis viri Guiscardi de Petrasca Rectoris Patrimonii B. Petri in Tuscia in eodem Patrimonio deputareb, te, de cujus circumspectione, ac prudentia plenam in Domino fiduciam obtinemus, ad hoc specialiter duximus eligendum, Discretioni tuæ mandantes, quatenus eidem Rectori efficaciter præsidio favoris assistens in eos, qui sibi, suoque regimini contradictores fuerint, & rebelles, censuram Ecclesiasticam studeas exercere; ita quod, spirituali gladio afferente suffragium temporali, dictus Nobilisc commissum sibi regimen utilius, & commodius exequi valeat ad laudem, & gloriam Divini nominis, honorem Ecclesiæ, ac totius Provinciæ statum prosperum, & tranquillum. Nos enim sententiam, quam rite in hujusmodi rebelles tuleris, super quo plenam tibi concedimus auctoritate præsentium potestatem, ratam habebimus, & faciemus, auctore Domino, inviolabiliter observari.
Datum apud Urbemveterem iv. Idus Januarii, Pontificatus Nostri Anno III.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CXVIII., pp.533-534
-
(a) De Amelia: Al. de Ameria, de quo dictum est in no. (a) ad Bullam 579. Alexandri IV. Discretioni vestræ &c. anno 1260. die 24. Septembr. editam.
-
(b) Deputare: Sententiam autem aliqua de causa Pontifex mutasse videtur, nam Raynaldus ad hunc ann. 15. ex Reges. Pontif. ostendit, in Tusciam ac Patrimonium B. Petri missum esse Matthæum S. Mariæ in porticu Diac. Cardinalem; at id nonnisi æstivo tempore ex litteris Pontificis, ideoque res interim variatas dicemus.
-
(c) Dictus Nobilis: Videlicet Guiscardus de Petrasca.