« bullarium-franciscanum-1591 »

URBANUS &c.

Dilectis filiis Fratri Rorico de Wernesperga de Ordine Fratrum Minorum in Conventu Treveren., Boemundo Canonico Treveren., & Magistro Alberto de Parma Scriptori, & Nuntio nostro Sal., & Apost. Benedict.

Intellecto, quod Henricus Treveren. Electusb tempore fel. record. Alexandri Papæ c prædecessoris nostri, se promisisset Petro Benencasæ, ac Dino Perini Mercatoribus Florentinis duo milia Marcarum sterlingorumd nomine Cameræ Apostolicæ soluturum; nec inde postmodum Mercatoribus ipsis, vel prædecessori, aut Nobis fuisset aliquid persolutum; dilecto filio Henrico de Bollandiae Archidiacono Treveren. nostris dedimus litteris in mandatis, ut Electum moneret eumdem, quatenus usque ad Dominicam Palmarum proximo præteritam, tunc futuram Andreæ Jacobi, Fatio Junctæ, & Bonsignori Raynerii sociis dilectorum filiorum Orlandi Bonsignoris, Bonaventuræ Bernardi, & Raynerii Jacobi Civium, & Mercatorum Senensium in Francia commorantibus, vel eorum uni, præfatam Marcarum quantitatem nomine nostro, cessante qualibet occasione, solvere procuraret. Alioquin ex tunc in personam ipsius, auctoritate nostra, sublato appellationis obstaculo, excommunicationis sententiam proferens eum tamdiu singulis diebus Dominicis, & festivis, pulsatis campanis, & candelis accensis, excommunicatum publice nuntiaret; & faceret per loca, in quibus expedire videret, similiter nuntiari, & ab omnibus evitari arctius; donec de præfata Marcarum quantitate foret Cameræ nostræ integre satisfactum. Quod si forte dictus Electus hujusmodi excommunicationis sententiam per duos menses præsumeret sustinere; idem Archidiaconus ex tunc ministerialesf Ecclesiæ Treveren. a juramento fidelitatis, quo Electo tenentur eidem, auctoritate prædicta fretus absolveret; ac eis sub pœna excommunicationis districtius inhiberet, ne dicto Electo in hujusmodi contumacia perduranti aliquatenus intenderent, vel etiam obedirent. Sed idem Archidiaconus tanquam minus obediens, & remissus in executionem hujusmodi mandati nostri procedere, sicut intelleximus, prætermisit. Quocirca discretioni vestræ in virtute obedientiæ sub pœna suspensionis per Apostolica scripta præcipiendo mandamus; quatenus, si forte prædictus Archidiaconus nondum est mandatum in hac parte Apostolicum executus; nec ab Electo ipso de præfata pecunia satisfactum; Vos omnes, aut duo, vel unus vestrum per vos, vel alios, seu alium dictum Electum ex parte nostra monere sine dilatione curetis, ut præfatam Marcarum quantitatem infra Octavas Beati Johannis Baptistæ proximo venturas prædictis Mercatoribus Senen. juxta præscriptam formam solvere non postponat: Alioquin ex tunc contra præfatum Electum procedatis per vos, vel alium ad excommunicationem, & alia juxta prædictarum litterarum continentiam ad eumdem Archidiaconum directarum; & tam Electum, quam Archidiaconum memoratos ex parte nostra citantes, præfigatis eis terminum peremptorium competentem, infra quem compareant personaliter coram Nobis, hic pro contumacia, ille vero pro inobedientiæ, seu negligentiæ culpa mandatum Apostolicum recepturi; non obstante, quod Ordini Fratrum Minorum a Sede Apostolica est indultumg, ut ipsius personæ de causis cognoscere, vel mandata exequi minime teneantur, quæ ipsis a Sede committuntur eadem. Diem autem citationis, & formam, & quicquid inde feceritis, Nobis per vestras patentes litteras intimetis totam præsentium seriem continentes.

Datum Viterbii xv. Kalend. Aprilis, Pontificatus Nostri Anno Primo.