« bullarium-franciscanum-1586 »

URBANUS &c.

Ad futuram rei memoriam.

Sol ille verus perpetuo fulgore coruscans, lux quidem clarissima summæ lucis, & fons luminis defectum, vel immutationem penitus nescientis Fidelium corda in hac ima, & caliginosa valle sub carnis mole degentium infusione invisibili suæ admirabilis claritatis illustrat; & sæpe Nobiles, & potentes micantioribus contingens radiis in eorum mentes lucem ingerit potiorem &c.a Hac siquidem luce perfusi nobiles Viri Lodderengus de Andalo, Gruamons de Cazanimicis Cives Bononienses, Selanca Civis Mutinensis, & alii pluresb de Civitatibus eorumdem, qui hujus seculi spretis vanitatibus in otio dulcis contemplationis Divinis perseveranter vacare laudibus ferventi spiritu appetunt; Nobis devote ac humiliter supplicarunt, ut eis & omnibus inclytum Christo cum ipsis cupientibus impendere famulatum aliquam certam Regulam, seu vivendi regulariter formulam specialem, sub cujus observantia salubri virtutum Domino magis placere valeant, statuere, ac condere curaremus. Nos itaque piis eorum supplicationibus, & salubribus desideriis favorabiliter annuentes infrascriptam Regulam studiose compositam præfatis Nobilibus, omnibusque illam profiteri, & sub ipsa Divinis omnino se beneplacitis dedicare volentibus concedimus de fratrum nostrorum consilio perpetuis temporibus observandam: quam utique Regulam appellari volumus Ordinem Militiæ B. Mariæ Virginis gloriosæ, ut qui professi fuerint hanc Regulam, tamquam speciali & perpetuo designato Ordine taliter nuncupentur, videlicet Fratres Ordinis Militiæ Beatæ Mariæ Virginis gloriosæc.

Regula vero talis est: Fratres Milites Clerici & Laici, qui in Conventibus seu Conventualibus Ecclesiis dicti Ordinis fuerint, professionem regularem faciant secundum Regulam B. Augustini, prout in forma inferius adnotata expressum esse dignoscitur: vivant sub obedientia Prælati sui in omnimoda castitate, & in habitu honesto, & in aliis etiam honestatibus eis competentibus: infrascriptum modum jejunandi, & cibariorum usum observent; & proprium a se studeant abdicare. Non vadat aliquis sine socio Fratre, vel Religiosa persona videlicet ipsius Ordinis de loco ad locum, neque septa Monasterii sui absque licentia sui Prioris egredi quoquo modo præsumat. Omnes simul in communi Dormitorio jaceant, & in communi Refectorio commedant, infirmis, & hospitibus, ac etiam laborantibus dumtaxat exceptis, qui remaneant in provisione Prioris, sive eorum Prælati. Possint etiam Clerici Fratres præter Mantellum, & Guascapum habere Cappamd clausam de Camelino, vel de alio panno grisci colorise, illaque uti, quando voluerint. Clerici autem Camisia de panno lineo, aut Guarnellof albo, vel superpelliciis, & Cappa clausa utantur, quibus etiam liceat pro loco, & tempore uti superpelliciis sine Cappa &c. Nullus recipiatur in Ordine de hæret. prav. suspectus, aut ęre alieno gravatus.

Modus, & forma circa receptionem Conventualium Fratrum, Clericorum, & Laicorum firmiter observetur: recipiendus vero probationis habeat annum unum, quo finito secundum subscriptam formam professionem faciat, & ad obedientiam admittatur. Forma autem talis est: Ego Frater N. promitto Deo, & Beatæ Mariæ semper Virgini in manibus N. Prioris, vel Prælati, & tibi N. modo Priori, sive Prælato, tuisque successoribus canonice intrantibus obedientiam secundum Regulam B. Augustini, servata tamen forma institutionis vitæ Fratrum Ordinis Militiæ B. Virginis gloriosæ eisdem Ordini, ac Fratribus a SS. Patre Domino Urbano Papa Quarto tradita, & concessa. Nulli autem liceat ab hujusmodi Ordine, seu Religione exire, nisi forsitan ad arctiorem &c. Fratres Milites, qui in Conventibus commorantur, habeant tunicam interiorem de panno laneo albo, vel pignolato, super qua uti possint Guarnatiag similis coloris, aut de camelino, seu alio panno coloris grisci. Habeant etiam de panno hujusmodi grisci coloris, vel de camelino, vel albo colore Mantellum; & hi, qui voluerint uti caputiis, habeant illa, dummodo sint de panno albo, aut de panno grisci coloris, seu de camelino: quando vero equitant, Guascapis grisci coloris uti valeant; Manicas &c. Habeant quoque Corrigias de corio non manubriatas; & pellibus tantum agninis utantur. Habeant insuper scuta, & galeas, sellas, & alia insignia militaria albi coloris cum Cruce rubea, & duabus Stellis similiter rubeis: utraque vero Stella sit super utrumque brachium Crucis, una videlicet a dextro latere, & alia a sinistro. Frena Equorum suorum non sint deaurata, vel argentata, sed simplicia tantum; & habeant calcaria nullatenus deaurata, vel deargentata. Liceat autem eis arma portare pro defensione Catholicæ Fidei, & Ecclesiasticæ libertatis, cum eis per Romanam Ecclesiam fuerit specialiter demandatum: pro sedandis etiam tumultibus Civitatum arma protegentia tantum de sui Diœcesani licentia portare valeant, & in manu virgam ligneam sine ferro &c. Jejunent Fratres in omnibus jejuniis ab Ecclesia institutis &c. Nullo vero tempore die Lunæ, aut die Mercurii carnes comedantur a Fratribus in Conventu, nisi &c. Caveant omnes Fratres ne vadant ad convivia Militum, seu &c. Non recipiant officia publica scilicet Potestarias Civitatum, vel Castrorum, aliorumque locorum; aut aliud officium, quod pertineat ad Commune: nec associent aliquos aliorum locorum regimina exercentes: non sint de consilio Civitatum, seu &c. Nullum Potestatibus, seu Rectoribus Civitatum, seu locorum quorumcumque aliorum exhibeant juramentum; & a quocunque alio juramento, quantum cum Deo poterunt, studeant abstinere &c. Singulis annis fiat Capitulum generale &c.

Fratres prædicti Ordinis conjugati, & aliih, qui in domibus propriis voluerint commorari, promissionem faciant secundum formam inferius adnotatam: vivant sub obedientia Prælatorum suorum, salvo jure matrimonii contracti, aut etiam contrahendi; & in conjugali, vel perpetua castitate, si non habentes uxores sine uxoribus voluerint permanere &c. Possint hujusmodi Fratres præter Mantellum, & Guascapum Ordinis habere Cappam clausam de panno grisci coloris, aut etiam de Camelino (parum diverso).

Semel vel bis in mense secundum beneplacitum sui Prælati conveniant hujusmodi Fratres cum Conventualibus in domo Conventuali &c. ad audiendum verbum Dei, & ad tractandum de his, quæ ad honestatem status sui viderint expedire &c. Si qui hujusmodi Fratrum, qui in domibus suis vivunt, voluerint Conventuales effici, & professionem facere Regularem juxta formam B. Augustini superius adnotatam, sine contradictione aliqua recipiantur in aliquo Conventu secundum beneplacitum Generalis Prælati. Hoc autem in uxoratis locum habeat, postquam uxores eorum mortuæ fuerint, aut Religionem intraverint, seu fuerint in tali ætate constitutæ, quod de ipsis, si in seculo remanserint, aliqua non possit haberi suspicio &c. Uxores hujusmodi Fratrum induantur vestibus de Camelino, vel de aliquo panno grisci, vel albi coloris &c. Hujusmodi autem Fratres uxorati, & alii, qui in suis Domibus morabuntur, in omnibus, & per omnia subsint propriis Episcopis, & aliis Prælatis Ecclesiast., sicut prius &c. Singulis annis visitentur Fratres omnes tam Conventuales, quam alii in singulis locis eorum per Generalem Prælatum, vel per aliquem alium &c. Ne Prælati, vel Majores dicti Ordinis voluntate pro lege utantur in corripiendis excessibus subditorum &c.i Nulli ergo omnino hominum liceat hanc paginam nostræ concessionis infringere, vel ei ausu temerario contraire: Si quis autem hoc attentare præsumpserit, indignationem Omnipotentis Dei, & Beatorum Petri & Pauli Apostolorum ejus se noverit incursurum.

Datum Viterbii decimo Kal. Januarii, Pontificatus Nostri Anno Primoj.