Général
-
Alexandre IV (1254-1261)
-
Monasterium sub Sedis Apostol. protectione suscipit, & pluribus privilegiis communit. (Ex Reges. Vatic. epist. 206. apud Waddingum in Reges. Pontif. num. 56.)
-
Anno 1258. die 31. Julii, al. 12. Augusti.
-
1258
-
ALEXANDER &c.
Dilectis in Christo filiabusa ‥ Abbatissæ Monasterii Sancti Eustachii de Clavarob , ejusque Sororibusc præsentibus, & futuris regularem vitam professis in perpetuum Salutem, & Apostolicam Benedictionem.
Religiosam vitam eligentibus &c.d (usque) enervet. Eapropter, dilectæ in Christo filiæ, vestris justis postulationibus clementer annuimus, & Monasterium Sancti Eustachiie de Clavaro Januen. Diœcesis, in quo Divino estis obsequio mancipatæ, de speciali gratia Sedis Apostolicæ ab omni jurisdictione, potestate, ac dominio tam Archiepiscopi Januen., qui pro tempore fuerit, quam cujuslibet alterius Prælati, seu Ecclesiasticæ personæ totaliter ex certa scientia eximentes, illud in jus, & proprietatem Beati Petri, & prætactæ Sedis assumimus, & præsentis scripti privilegio communimus. In primis siquidem statuentes, ut Ordo Monasticus, qui secundum Deum, & Beati Benedicti Regulam, atque Institutionem Monialium inclusarum Sancti Damiani Assisinat., & formulam vitæ vestræ a fel. recor. Gregorio Papa prædecessore nostro Ordini vestro traditam, cum adhuc esset in minori officio constitutus, in Monasterio vestro institutus esse dignoscitur, perpetuis ibidem temporibus inviolabiliter observetur. Præterea quascumque possessiones, quæcumque bona idem Monasterium in præsentiarum juste, & canonice possidet, aut in futurum concessione Pontificum, largitione Fidelium &c. (usque) illibata permaneant. In quibus hæc propriis duximus exprimenda vocabulis, locum ipsum, in quo prætactum Monasterium situm est cum omnibus pertinentiis suis; unam petiam terræ sitam juxta Burgum Clavarif: Domos, quas habetis in Villa, quæ vocatur Levi: terras, quas habetis in territorio Villæ ipsius: Domos, & terras, quas habetis in territorio Plebis de Lavaniag: terras, quas habetis in territorio Clavari in locis, quæ ad Valles, & Rivaria nuncupantur: terras, quas habetis in Villa, quæ vocatur de Calasco, in loco, qui dicitur Denegacum: terras sitas in territorio Villæ de Sancta Julia: petiam unam terræ sitam in territorio Sancti Salvatoris in loco, qui vocatur ad Costam: terras sitas in territorio Villæ Sancti Petri de Clavaro: terras sitas in territoriis Villarum, quæ Revercon., Maxena, & Breranata vulgariter nominantur: terras, quas habetis in territorio de Sigestroh cum pratis, vineis, terris, nemoribus, usuagiis, & pascuis in bosco, & plano, in aquis, & molendinis, viis, & semitis, & omnibus aliis libertatibus, & immunitatibus suis. Liceat quoque vobis personas liberas &c. (usque) exercere. Præterea omnes libertates, & immunitates a Ven. Fratre nostro Januen. Archiepiscopoi Monasterio prætacto concessasj; nec non libertates, & exemptiones Sæcularium exactionum, a quibuslibet Christifidelibus rationabiliter vobis indultas auctoritate Apostolica confirmamus, & præsentis scripti privilegio communimus. Decernimus ergo, ut nulli omnino hominum &c.k (usque) Sedis Apostolicæ auctoritate. Ad indicium autem, quod idem Monasterium specialiter Beati Petri juris existit, unam libram ceræ Nobis, nostrisque Successoribus annis singulis persolvetis. Si qua igitur &c. (usque) ultioni. Cunctis autem &c. (usque) inveniant. Amen, Amen.
Datum Viterbii per manum Magistri Jordani Sanctæ Romanæ Ecclesiæ Notarii, & Vice-Cancellarii ii. Idus Augustil, Indictione I. Incarnationis Dominicæ Anno mcclviii. Pontificatus vero Domini Alexandri Papæ Quarti Anno Quartom.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CDXXXVII., p.304
-
(a) Filiabus ...: Cæciliæ Sanvitalis Guillelmi Flisci Card. S. Eustachii consobrinæ e Monasterio Parmensi evocatæ, teste Pansa in Vita Innocentii PP. IV.
-
(b) De Clavaro: Oppido in orientali ora ditionis Genuæ prope Ostium fluminis Entellæ vulgo Lavagna sito, olim Burgo longo appellato, ab urbe Genuæ mill. 25. & a Rapallo 5. dissito, quo in loco ferunt ortum habuisse Innocentium IV., quod esset juris familiæ Fliscæ una cum Oppido Lavaniæ.
-
(c) Ejusque Sororibus: Ordinis S. Damiani Assisiaten., ut infra.
-
(d) Eligentibus &c.: V. hujus Pontificis Bullam anno 1255. die 30. Aprilis pro Monasterio S. Catharinæ Genuen. editam.
-
(e) Monasterium S. Eustachii: Fundatum a Gulielmo Flisco ex Comitibus Lavaniæ Innocentii IV. nepote S. R. E. Cardinali Diacono S. Eustachii a patruo anno 1244. creato, annoque 1256. Romæ post multas pro Apostolica Sede legationes obitas defuncto; idque egit circa annum 1254. ex Paulo Pansa in Vita Innocentii IV. apud Waddingum ad eum annum n. 49., qui tamen errant, cum ajunt, Monasterium fundasse Lavaniæ, nisi intellexerint ad oppidum Lavaniæ proximum, ut est Clavarum vulgo Chiavari.
-
(f) Juxta Burgum Clavari: Hinc vere a Baudrando dictum fuit, olim hunc locum Burgi longi nomen tulisse, nunc autem Oppidum est satis cultum etiam Claverium appellatum.
-
(g) Plebis de Lavania: Al. Lebonia Oppidum orientalis oræ Ligusticæ ad Ostium fluminis Entellæ nunc Lavagna inter Clavarum, & Segestam Tiguliorum vulgo Sestri di levante hinc atque hinc 4. mill., ab urbe Genuæ 30. fere mill. pas. distans.
-
(h) De Sigestro: Al. Segesta vulgo Sestri di Levante in ora orientali Liguriæ a Lavaniæ oppido 4. circiter mill. pas. in Ortum distante.
-
(i) Januen. Archiepiscopo: Gualtero de Vezzano, qui ab anno 1253. usque ad ann. circiter 1271. sedit ex Ughello tom. 4. Ital. Sacræ n. 6. al. xxxi. Genuen. Archiepisc.
-
(j) Concessas: Tempus hujus concessionis nobis nondum innotuit certe post annum 1252.
-
(k) Omnino hominum &c.: Ut in supracitata Bulla anni 1255.
-
(l) ii. idus Augusti: 11. Kal. Augusti habet codex Vaticanus, ut notavit librarius illius loci.
-
(m) Hujus Monasterii meminit Fr. Salimbene Parmensis Ord. Min. in Chron. Ms. quod usque ad annum 1287. deduxit, p. 233., ubi ait, dominum Guillelmum Card. Innocentii IV. nepotem ædificare fecisse prope Lavaniam, nempe fluvium, ditissimum Monasterium, in quo & Fratres Minores, & Sorores habitabant antiquo more seorsum; hinc in veteri Provinciali Ordinis apud autorem Polychronici, & Barthol. Pisanum Conform. xi. secundus al. tertius Conventus Custodiæ & Provinciæ Genuæ est Clavarum, non Lavania.