Général
-
Alexandre IV (1254-1261)
-
Promissionem de Conventu S. Hilari Fesulano a Guardiano Tudertino Abbati Vallisumbrosæ factam sine consensu eorum, quorum intererat, nullam esse pronunciat. (Ex Authographo in Archivo nostri Conventus S. Fortunati Tuderti asservato sub plumbo.)
-
Anno 1255. die 24. Martii.
-
1255
-
ALEXANDER &c.
Dilectis filiis Conventui Fratrum Minorum Tudertin.a Salutem, & Apostolicam Benedictionem.
Significastis Nobis, quod olim Ecclesiam vestram Sancti Michaëlisb, & locum de Tuderto vobis, & ... Guardiano vestro cum ... Abbate, & Monachis Monasterii S. Fortunati loci ejusdem pro eodem Monasterio de assensu, & voluntate ... Abbatis Monasterii Vallisumbrosæ, ad quem idem Monasterium Sancti Fortunati dicitur pertinere, ad invicem permutantibusc; idem Guardianus sine mandato nostro, qui tunc in minori officio constituti eramus a Sede Apostolica curæ vestri Ordinis deputati; ac sine licentia & voluntate Ministri Provincialis, & assensu, ac requisitione vestra dicitur promisisse; quod nisi libera, & pacifica possessio Monasterii Sancti Ylari Fesulan. Diœcesisd pro augmento permutationis dicti Monasterii Sancti Fortunati Monasterio Vallisumbrosæ infra certum terminum per vos propriis vestris expensis assignari contingeret, dictis Abbati & Conventui Monasterii Vallisumbrosæ liberum esset ad possessionem præfati Monasterii Sancti Fortunati absque alicujus contradictione redire. Cum igitur hæc promissio ejusdem Guardiani de assignatione possessionis dicti Monasterii Sancti Ylari Monasterio Vallisumbrosæ vestris expensis infra certum terminum facienda, si sic absque mandato nostro, & voluntate præfati Ministri, nec non assensu, & requisitione vestra facta extitit, nullam habere valeat firmitateme, per quam scandalorum materia oriretur; & vestra quies, ac tranquillitas turbaretur, quos non involvi brigiisf, sed sanctæ contemplationis otio expedit plus vacare; Nos eandem nullam esse penitus nunciantes vos, & Ordinem vestrum ad observationem ipsius auctoritate præsentium decernimus non teneri. Nulli ergo omnino hominum liceat hanc paginam nostræ nunciationis, & constitutionis infringere, vel ei ausu temerario contraire. Si quis autem hoc attemptare præsumpserit, indignationem &c.
Dat. Neapoli viiii. Kal. Aprilis Pontificatus Nostri Anno Primo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XXXVI., p.28
-
(a) FF. Minorum Tudertin.: De quibus in notis ad epist. Quanto amplius &c. superiori anno die 28. Decembr. dat.
-
(b) S. Michaelis: Alias S. Angeli de Fontanellis.
-
(c) Permutantibus: Præcedenti anno mense Majo ex supra cit. not. ad dictas litteras.
-
(d) S. Ylari Fesul. Diocesis: Cujus Monasterii nulla apud veteres nostri Ordinis Catalogos, nec Vallis umbrosæ monumenta mentio reperitur; nisi sit illud de Rezuolo nuncupatum Ordinis Vallis umbrosæ Diœcesis Fesulanæ in Diplomatibus Eugenii IV., & Pii II. memoratum apud Waddingum ad an. 1464. n. 55.
-
(e) Firmitatem: Quia ejus regimen in œconomicis minime monarchicum est, sed a primoribus Conventus, & optimatibus dependet.
-
(f) Brigiis: Rixis nimirum, & contentionibus.