« bullarium-franciscanum-603 »

INNOCENTIUS &c.

Dilecto filio Fratri Laurentio a de Ordine Fratrum Minorum Pœnitentiario Nostro Apostolicæ Sedis Legato Salutem, & Apostolicam Benedictionem.

Juxta desiderium Nostrum, & fiduciam de tua sinceritate conceptam ad hoc diceris omni fuisse virtute sollicitus, quod Venerabilis Frater Noster Patriarcha Græcorumb, ejusque Suffraganei redirent ad Sanctæ Romanæ Ecclesiæ unitatem. Cum autem in hujusmodi prosecutione negotii sit procedendum sollicitudine diligenti, ita quod ex hoc gloria Deo, & honor Ecclesiæ proveniat, ac injuriosum, seu præjudiciale alicui non existat; volumus, & per Apostolica tibi scripta mandamus, quatenus mentem habens ad cuncta vigilem, quæ rectitudinem in hac parte retineant, & sapiant honestatem, de Prælatis Græcis ad devotionem, & reverentiam ipsius Ecclesiæ redire volentibus sic provideas, & disponas, ut illic ex eis, qui Antiochen., seu Patriarchæ Hierosolymitan., qui fuere pro tempore, aut aliis Prælatis Latinis olim subjecti fuisse noscuntur, ipsi adstricti ad bebitam obedientiam, & reverentiam teneantur. Illos autem, quos eisdem Patriarchis, seu Prælatis noveris non fuisse subjectos, ad obedientiam Ecclesiæ Romanæ recipias, aliorum per omnia, jure salvo. Ceterum prædicto Patriarchæ Græcorum ex nostra parte suadeas diligenter, ut prævio salutis angeloc Apostol. Sedem adeat in ejus unitatem, & plenam gratiam admittendus; itaut si nobis constiterit, eum alicui Patriarcharum, & Prælatorum ipsorum subjectione aliqua non teneri, ipse cum suis suffraganeis, qui fruuntur libertate simili, Sedi Apostolicæ nullo medio sint subjecti; si verò ipse nostram personaliter nequiverit adire præsentiam, personas idoneas pro ipso, & suffraganeis memoratis satisfaciens in hac parte mandatum habentes ad Sedem transmittat eamdem; & si fortè ipse, vel alii ad hoc pro expensarum defectu extiterint impotentes, tu ipsis expensas necessarias de bonis nostræ Cameræ largiaris.

Datum Lugduni vii. Idus Augusti, Pontificatus Nostri Anno Quinto.d