Général
-
Innocent IV (1243-1254)
-
Ut Magistro Bartholomæo Clerico Mediolanen. in Ecclesia, vel Diœcesi Comensi Præbendam aliquam assignet. (Ex Regesto Vatic. epist. 108. ann. 5.)
-
Anno 1247. die 6. Julii.
-
1247
-
INNOCENTIUS &c.
Venerabili Fratri a … Archiepiscopo Mediolanen. Salutem, & Apostolicam Benedictionem.
Apostolicæ Sedis ampla benignitas, quæ nonnunquam extraneis, & ignotis exhibere se consuevit in provisionis gratia liberalem; illis debet libentius hujusmodi gratiæ munificentiam elargiri; quos & familiaris sibi conversatio notos reddit, & habet per eorum experientiam comprobatos. Hinc est, quod dilecto Filio Magistro Bartholomæo Clerico Mediolanensi, qui in Curia Nostra laudabiliter conversatus, probitate sua, qua redditur omnibus gratiosus, ad Nostram meruit notitiam pervenire, volentes facere gratiam specialem, mandamus, quatenus in aliqua Ecclesiarum Civitatis, vel Diœcesis Cuman.b recipi eum facias in Canonicum, & in Fratrem; & Præbendam, si qua in Ecclesia, in qua receptus fuerit, vacat ad præsens, vel quamprimum ad id se facultas obtulerit, eidem conferas, & assignes. Non obstantibus certo Canonicorum numero juramento, vel confirmatione Sedis ejusdem, aut quacunque firmitate alia roborato; sive nos ibidem direximus scripta Nostra pro aliis, quibus nolumus præjudicium generari; aut si ad mandatum dilecti Filii G.c de Montelongo Subdiaconi, & Notarii Nostri Legati Sedis ipsius in eadem Ecclesia, vel per ejus Capitulum recepti sint aliqui, quibus præfatum Magistrum volumus in assecutione Præbendæ præferri; vel si dictus Magister alias beneficiatusd existat, seu quolibet alio, per quod hujusmodi gratia impediri valeret. Contradictores per Censuram Ecclesiasticam appellatione postposita compescendo.
Datum Lugduni ii. Nonas Julii, Pontificatus Nostri Anno Quinto.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCXVII., pp.468-470
-
(a) Ven. Fratri …: Leoni Mediolanensi, de quo supra.
-
(b) Dioecesis Cuman.: Rectius Comensis, ubi Episcopus erat Ubertus Sala e Monteferrato a Gregorio IX. circa annum 1227. huic Ecclesiæ promotus, mortuusque anno 1252. ex Ughello tom. 5. Ital. Sac.; cur autem Archiepiscopo Mediolani, cui Comensis Episcopatus nequaquam suberat, sed Patriarchæ Aquilejensi parebat, injungitur de Canonicatibus, Præbendisque illius Ecclesiæ, atque Diœcesis collatio, ac dispositio, nondum comperi: forsan Episcopus Como aberat aliqua de causa, illiusque Ecclesiæ cura & administratio Archiepiscopo propinquiori commissa fuerat.
-
(c) G.: Gregorius, cujus non semel mentio facta est in superioribus Epistolis.
-
(d) Beneficiatus: Nempe beneficio Ecclesiastico præditus.