Général
-
Innocent IV (1243-1254)
-
Prohibet receptionem Fratrum Prædicatorum ad Institutum Franciscanorum. (Ex Summario Pontific. in Speculo Minor. apud Waddingum in Regesto Pontif. num. 17. & Regest. Vatican. epist. 141.)
-
Anno 1244. die 21. Aprilis.
-
1244
-
INNOCENTIUS &c.
Dilectis Filiis Ministro a , & Fratribus Ordinis Fratrum Minorum Salutem, & Apostolicam Benedictionem.
Quo vos in Christo sinceriori caritate diligimus, eò plenius, ut in cunctis providi sitis, & vigiles, affectamus; turbationis non modicæ spiritum assumentes, si de vobis quandoque contrarium ad Nos relatu perveniat aliquorum. Sanè admirantes accepimus, quod vos non absque offensa rectitudinis, quæ in vestris debet actibus haberi continuè specialis, Fratres Prædicatores, & eorum Ordini obligatos frequenter ad vestrum recipitis unitatem Spiritus in pacis vinculo non servantes. Verum cum ex hoc scissuræ possit, & scandali exoriri materia, quæ solatium pacis æternæ quærentibus debet omnibus modis existere peregrina: Universitati vestræ per Apostolica Scripta in virtute obedientiæ præcipiendo mandamus, quatenus tam Fratres eosdem, quam eorum Ordini voto, vel juramento etiam obligatos nullatenus de cetero prætextu indulgentiæ alicujus, seu aliquarum litterarum obtentarum a Sede Apostolica, vel etiam obtinendarum imposterum; quæ de præsentibus expressam non fecerint mentionem; nisi prius petita Ministrib sui fuerit, & obtenta licentia, recipere præsumatis: alioquin decernentes irritum, & inane quidquid per vos in hac parte contra præceptum nostrum contigerit attentari; præsentium auctoritate statuimus, ut hujusmodi præsumptores incurrant excommunicationis sententiamc ipso facto, a qua nequaquam absolvi valeant, nisi se apud Sedem Apostolicam personaliter repræsentent ab ea, sicut visum fuerit, absolvendi. Nulli ergo omnino hominum liceat hanc paginam nostræ Constitutionis infringere, vel ei ausu temerario &c.
Datum apud Civitatem Castellanam viii. Kalendas Juliid Pontificatus Nostri Anno Primoe.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°XXXVI., p.328
-
(a) Ministro: Nempe Generali Fr. Haymoni Anglo.
-
(b) Ministri: Leg. Prioris, qui titulus est in Ordine Prædicatorum, Ministri vero in Ordine Minorum, ut in Bulla Clementis IV.
-
(c) Sententiam: In epist. Meminimus vobis, quæ insequenti anno dabitur, exponit Pontifex quinam sint, qui excommunicationem incurrant.
-
(d) Datum apud Civitatem Castellanam viii. Kalendas Julii: Est Scriptoris, aut Collectoris additamentum; cum enim hæc epistola citetur in alia hujus Pontificis dat. iisdem Fratribus
apud Civitatem Castellanamviii. Kalendas Julii Pontif. anno primo, in qua dicitur:Meminimus vobis olim in virtute obedientiæ per nostras litteras præcepisse &c.: nequit eodem die data esse, quæolimdata asseritur: unde scripta est hoc anno 1244. die 21. April., ut asserit Waddingus ad hunc annum num. 30., & quidemLaterani, ubi tunc Pontifex morabatur xi. Kal. Maji, & ut habet apographum sub plumbo in Archivo Conventus S. Francisci Constantiæ in Svevia datum tamen OrdiniPrædicatorum; & aliud in 4. Conventuum Ordinis Prædicat. ex Bull. 69. Innoc. IV. in Bullario dicti Ordinis tom. I. datum OrdiniMinorum; cumque Tabularii Vatic. Scriba moneat in Regest. Innoc. IV. esse epistolam hanc 607. dat. xvi. Kal. Maji, apparet Waddingum aliam epistolam vidisse. -
(e) In eumdem modum scripsit & Ordini Prædicatorum ex cit. epistola Meminimus vobis, ut infra videbitur; sicut & Alexander IV. anno 1255. die 22. Maji Clemens vero IV. anno 1267. die 22. Decembris hanc Innocentii Constitutionem misit Fratribus Ord. Minorum; ejusque meminit Barthol. Pisanus Conform. ix. in expositione capitis 2. Regulæ Fratrum Minorum.