« bullarium-franciscanum-401 »

INNOCENTIUS &c.

Dilectis in Christo Filiabus Abbatissæ, & Conventui Sororum inclusarum Monasterii S. Silvestri de Pereto a Ordinis S. Damiani Marsicanæ Diœcesis Salutem, & Apostolicam Benedictionem.

Cum a Nobis petitur, quod justum est, & honestum; tam vigor æquitatis, quam ordo exigit rationis, ut id per sollicitudinem officii nostri ad debitum perducatur effectum. Exhibita quidem Nobis vestra petitio continebat, quod cum quondam Matthæus Abbas, & Conventus Monasterii Farfensis vobis Ecclesiam Sancti Silvestri de Pereto Marsicanæ Diœcesis olim ipsis pleno jure subjectam, in qua Divinis obsequiis sub regulari observantia desudatis, pro ut spectabat ad eos, cum omnibus juribus, & pertinentiis suis perennis obtentu prœmii contulisset:b Nobilis vir A. de Pontibusc quondam Patronus ejusdem Juspatronatus ipsius, & omnia, quæ ratione juris ejusdem, vel alio modo sibi competebant in illa, vobis provida liberalitate remisit, submittens se, ac hæredes suos, certa pœna interposita, jurisdictioni spirituali Venerabilis Fratris nostri N.d Episcopi Ostiensis, & Successorum ejus; si contra prædicta dictus A. vel hæredes sui præsumpserint attentare; pro ut in publico Instrumento super hoc confecto pleniùs continetur. Nos igitur vestris precibus inclinati, quod super hoc piè, ac providè factum est, auctoritate Apostolica confirmamus, & præsentis Scripti patrocinio communimus. Tenorem autem ipsius Instrumenti de verbo ad verbum præsentibus fecimus annotari, qui talis est: “In nomine Dei æterni, & Salvatoris nostri Jesu Christi. Anno ab Incarnatione ejusdem Mccxxxviii. xi. Indictione mensis Decembris xxviii. regnante Domino nostro Friderico Romanorum Imperatore xviii. anno feliciter. Amen: Ego Andreas de Pontibus considerans, quod omnia, quæ in hoc seculo fiunt, præter Deo servire, sunt transitoria, & caduca; cupio saltem in aliquo pro redemptione peccatorum, quæ infelix commisi, per aliqua pietatis opera meæ saluti animæ subvenire. Ideoque nullo dolo ductus, nec vi, nisi Divino amore coactus propria, & libera voluntate hac die præsenti pro me, meisque hæredibus, & Successoribus, & omnibus a Nobis submissis, & submittendis personis renuncio generaliter, & refuto tibi Dominæ Ymillæ Sorori meæ Abbatissæ Sancti Silvestri de Pereto recipienti pro ipsa Ecclesia, te, & aliis Dominabus Regulam Ordinis Sancti Damiani Assisinatensis degentibus, præsentibus, & futuris in perpetuum; idest, omne jus, & actionem, conditiones, consuetudines, redditus, usus, debitum, adjectiones, exactiones, & omnes alias exceptiones utiles, & directas, tacitas, & expressas, generales, & speciales, reales, & personales, quæ, vel quas in ipsa Ecclesia Sancti Silvestri, & ejus pertinentiis ego, vel Progenitores mei habuimus usque in hodiernum diem; quocumque jure, vel consuetudine, immo ipsam Ecclesiam cum Vassallis, redditibus, domibus, terris, vineis, pratis, pascuis, silvis, aquis, & omnibus, & singulis suis pertinentiis, cultis, & incultis, vacuis, & plenis, præsentibus, & futuris per te ipsam Dominam Ymillam perpetuò libero, & perpetuam libertatem cedo; & ab omni mea, meorumque hæredum, & Successorum super prædictis omnibus eximo perpetuò, potestate nulla, jure, consuetudine, vel conditione aliqua mihi, vel meis hæredibus, & juris successionis in ipsa Ecclesia, & suis pertinentiis reservatis. Item cedo, & simplici donatione, quæ dicitur inter vivos, dono, & corporaliter investiens trado, ac concedo tibi eidem Dominæ Ymillæ recipienti pro te, & ipsa Ecclesia, & Dominabus Sororibus tuis præsentibus, & futuris in ipsa Ecclesia prætactam Regulam, & vitam Ordinis Sancti Damiani habentibus in perpetuum, idest terram positam sub Ecclesia Sancti Petri cum omnibus introitibus, & exitibus, usibus, & utilitatibus, pertinentiis, & omni suo, sicut infra suos concluditur fines: A primo latere tenet Dominus Oderisius Tallamanduca; a superiori latere via publica; a tertio latere est fossatus; & si qui alii adsunt affines ad habendum, intrandum, tenendum, possidendum, fruendum, colendum in perpetuum. Quod si, absit, in eadem Ecclesia ipse Ordo, vel Regula non haberetur; dicta Ecclesia in eodem statu, ac conditione, qua nunc est, dirigatur; & terra prætacta ad jus, & proprietatem meam, & hæredum meorum redeat ipso jure. Ut autem hæc omnia per nos facta robur semper obtineant firmitatis; promittens pro me, meisque hæredibus, & Successoribus stipulatione solemni tibi Fratri Raynaldo Cappellano Venerabil. Patris, & Domini Raynaldi Ostiensis, & Velletrensis Episcopi recipienti pro eodem Domino Episcopo, ejusque in suo Episcopatu Successoribus prædicta omnia rata, & firma habere; & contra non venire, & legitimè ab omni persona defendere, si opus fuerit, & necesse; obligo me, meosque hæredes, & Successores, si prætacta omnia non servaverimus, aut si contravenire præsumpserimus, per te Fratrem Raynaldum eidem Domino Episcopo, ejusque Successoribus sub pœna centum librarum Bonon. den. Senatuse; quam si commiserimus, promittimus solvere per stipulationem eamdem, & Spirituali nihilomiuus ex hoc, si quod eidem Domino Episcopo Ostiensi ferre placuerit, vel ejus Successoribus, sententiæ subjacere, & pœna soluta, vel non, hæc charta nihilominus firma permaneat. Testes rogati ab utraque parte sunt hi: Presbyter Nicolaus, Presbyter Odericus, Dominicus Petrus Tallamanduca, Miles Berardus, Miles Joannes Carbonus, Miles Framundus, Miles Joannes Raynardi, Miles Giraldus, Aliothus, Bartholomæus de Spoleto, Matthæus Domini Sinibaldi, Petrus Joannis Ramboti Amiterninus; Ego Joannes Giraldi de Arce-bucis publicus Imperialis Notarius ab utraque parte rogatus hoc Instrumentum propria manu subscripsi, & signum nominis mei feci.” Nulli ergo omnino hominum liceat hanc paginam nostræ confirmationis infringere, vel ei ausu &c.

Datum Laterani xviii. Kal. Januarii Pontificatus Nostri Anno Primo.