« bullarium-franciscanum-291 »

GREGORIUS &c.

Dilectis filiabus Abbatissæ a , & Conventui inclusarum Ancillarum Christi Monasterii Sancti Francisci Pragensis Ordinis S. Damiani Salutem, & Apostolicam Benedictionem.

Pia meditatione pensantes, quod Patris æterni filius de utero gloriosæ Virginis Mariæ pro salute humani generis incarnatus, cuncta cum suavitate disponens suorum universitati Fidelium remedia diversa protulit, per quæ in ipsius laudibus per vota persistere delectetur; libenter ad id volumus haberi solliciti, per quæ, Deo juvante, circa Divinæ legis observantiam in vobis devotionis fervor, & perseverantiæ gratia valeant adaugeri. Cum igitur ex frigida dispositione patriæ, in qua estis sub disciplina regularis observantiæ ad Redemptoris gloriam constitutæ proveniat, quod rigorem concessæ vobis Regulæ non possitis in omnibus, ut cupitis, sustinere; de æterna benignitate providendum duximus, ut austeritatem hujusmodi salutaris moderantiæ studio temperemus. Vobis itaque præsentium auctoritate concedimus, ut non obstante, quod omni tempore secundum eamdem Regulam in cibo quadragesimali jejunare debetis, diebus Dominicis, & quinta feria bis commedere, & lacticiniis refici valeatis. In omni vero Pascha, & solemnitatibus Beatæ Mariæ Virginis, ac etiam Apostolorum, sive in festo Nativitatis Domini, nec non tempore manifestæ necessitatis, utpote infirmitatis, nulla vestrum ad jejunium teneatur. Et si forte aliqua ex vobis infirma fuerit, Abbatissa, vel Soror major nihilominus cum ipsa de jejunio, & cibo dispensandi habeat potestatem. Præterea volumus, quod diebus illis, quibus in Quadragesima majori, & minorib, secundum Regulam in pane, & aqua tenemini jejunare, refectionem in omnibus, sicut aliis diebus quadragesimalibus habeatis. Ceterum habendi duas tunicas, Scapularia, & Mantellum cum pellibus, & Subularesc, & utendi fisconibusd plenis fœno, vel palea, nec non cervicalibus vobis licentiam impertimur. Nulli ergo omnino hominum liceat hanc paginam nostræ concessionis infringere, vel ei ausu temerario contraire. Si quis autem hoc attentare præsumpserit, indignationem Omnipotentis Dei, & Beatorum Petri, & Pauli Apostolorum ejus se noverit incursurum.

Datum Laterani iii. Nonas Maii Pontificatus Nostri Anno Duodecimo.