Général
-
Grégoire IX (1227-1241)
-
Terminum transfretandi in succursum Terræ Sanctæ proroget Rodulpho de Grifenstein a Fr. Raynerio O. M. impositum, quem si ille non servaverit, excommunicationis sententia percellat. (Ex Regesto Vatic. epist. 323. anno 11.)
-
Anno 1237. die 23. Decembris.
-
1237
-
GREGORIUS &c.
Intellecta dudum atrocitate horrendi facinoris, quod nobilis vir Rodulphus de Grifenstein lator præsentium in necem bonæ memoriæc ‥ Curien. Episcopid diabolo instigante commisit; & eodem Rodulpho cum humilitate petente reconciliari Ecclesiæ matri suæ; inter cetera, quæ sibi dilectus filius Frater Raynerius e Pœnitentiarius noster post impensum ei juxta formam Ecclesiæ beneficium absolutionis sub debito præstiti juramenti mandavit, injunxit eidem, ut signo crucis assumpto in proximo tunc generali passagiof statuendo a Romana Ecclesia transfretaret in subsidium Terræ Sanctæ per certum terminum in ejusdem Terræ obsequio moraturus. Nos quoque suggesto Nobis postmodum, quod indulta ei dilatio esset periculum allatura, tibi dicimur mandavisseg, ut ipsum ad transfretandum absque moræ dispendio per Censuram Ecclesiasticam sublato appellationis obstaculo coarctares. Ceterum quia, sicut ex parte sua fuit propositum coram Nobis, sic ipsum ad transfretandum in assignatione termini arctavisti, lata in eum, & prædictos, qui cum eo fuerant, excommunicationis sententia, si cum eis in assignato sibi termino non transiret; quod nec sarcinulas suas componere, nec alias sibi poterat in necessariis providere; mandamus, quatenus si est ita, lata in eum excommunicationis sententia juxta formam Ecclesiæ relaxata, terminum ei usque ad Festum B. Joannis proximo venturumh studeas prorogare; mandans eidem Nobili, ut exinde non recedat absque Sedis Apostolicæ licentia speciali. Si vero transire in prædicto termino non curavit, ipsum dilatione, ac excusatione cessantibus in excommunicationis sententiam reducere non postponas; & facias eam per loca, in quibus expedire videris, solemniter publicari, processurus nihilominus contra eos, prout videris expedire.
Datum Laterani x. Kalend. Januarii Pontificatus Nostri Anno Undecimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCXLII., p.230
-
(a) Ven. Fratri: Uberto Sala e Monteferrato antea Canonico Vercellensi, & Cappellano Pontificio.
-
(b) Episcopo Cuman.: Alias & rectius
Comen., seu Novocomen. Insubriæ urbis ad lacum Larium inter Mediolanum, & Curiam Rhætiorum sub Patriarcha Aquilejensi; de qua urbe, atque prædicto Episcopo agit Ughellus tom. 5. Italiæ Sacræ num. 54. Episc. Comen., aitque promotum a Gregorio IX. anno 1223. -
(c) Bonæmemoriæ: Bertholdi Canonici Constantiensis assumpti anno 1226., annoque 1233. in pago Reumadensi necati ex Catalogo Episcoporum illius Ecclesiæ.
-
(d) Curien. Episcopi: Vulgo Coira olim Rhæthiæ primæ civitatis sub Archiepiscopo Mediolanensi; nunc vero Grisonum primariæ, & sub Maguntino Archiepiscopo.
-
(e) Frater Raynerius: O. M., cujus est mentio in pluribus hujus Pontificis epistolis; diximusque de eo ad illam Exhibita nobis &c. anno 1234. die 8. Febr. scriptam.
-
(f) Generali passagio: Seu itinere, ac transfretatione in Terram Sanctam, idest Palæstinam.
-
(g) Tibi dicimur mandavisse: Litteris forsan anno 1235. datis, quas citat Raynaldus in Annal. Eccles. ad eum annum n. 19., nisi sint aliæ.
-
(h) B. Johannis proximo venturum: Nempe
Baptistædie 24. Junii anno 1238.