Général
-
Grégoire IX (1227-1241)
-
De eadem re subjungit, & mandat, ut si pecunia ab Archiepiscopo Senonen., & Fratre Willelmo collecta non sufficeret, ipse suppleat de ea, si quam habet pro Terra S. depositam. (Ex
Regesto Vatic.ep. 279. num. 11.) -
Anno 1237. die 27. Novembris.
-
1237
-
GREGORIUS &c.
Dilecto filio a ‥ Magistro militiæ Templi Jerosolimit. Salutem, & Apostolicam Benedictionem.
Cum nobilis virb ‥ Comes Montisfortis Constabularius Franciæ, in armis strenuus, & belli exercitio circumspectus assumpserit Crucis signaculum, & in manu forti in Terræ Sanctæ proponat transire succursum, Venerabili Fratri nostro‥ Archiepiscopo Senonen., & dilecto Filio Fratri W. Pœnitentiario nostro nostris dedimus litteris in mandatis, ut redemptiones votorum Crucesignatorum Terræ suæ, & Provinciæ Senonen., quos propter paupertatem, infirmitatem, seu debilitatem, & alias viderint ad subsidium præfatum inhabiles, exceptis illis, qui in Terris aliorum Comitum, & Baronum Crucesignatorum existunt, usque ad tria millia Marcarum argenti nomine dicti Comitis fideliter colligentes, si tantum ex hujusmodi redemptionibus haberi non possit, ex aliis prædictæ Terræ subsidio in eadem Provincia deputatis supplere curent, contradictores per Censuram Ecclesiasticam appellatione postposita compescendo; & ipsi, postquam in prædictam Terram transiverit, easdem Marcas, exceptis mille libris Turonen., quas ante ipsius transitum pro apparatu suo concedant; eidem per Fratres militiæ Templi Jerosolimitani faciant integre assignari. Verum quia contingere poterit, quod ex prædictis redemptionibus, & aliis tantum colligi in Provincia prædicta non possit; mandamus, quatenus si tibi per litteras dictorum Archiepiscopi, & Pœnitentiarii constiterit, quod ex redemptionibus ipsis, & aliis prædictam pecuniæ quantitatem pro prædicto Comite colligere nequiverint, tu illam de pecunia, si qua apud te pro prædicta Terra deposita fuerit, dicto Comiti supplere procures.
Datum Laterani v. Kal. Novembris Pontificatus Nostri Anno Undecimoc.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCXLI., p.229
-
(a) Dilecto filio: Hermanno de Perigord. Latinis Petrocoricensis in Gallia, qui anno 1229. erat Præceptor Domus Templi in Sicilia, & Calabria ex Roccho Pirro tom. ii. Sicil. sac. p. 640., & an. 1239. Magnus ejusdem Ordinis Magister dicitur ab Alberico in Chronico, ejusque epistolam super Regni Hierosolym. statu descripserunt Parisius, & Trivettus sub anno 1244., quo ille a Saracenis cæsus asseritur; idque ex Catalogo Magistrorum hujus Ordinis a Dom. Cangii vulgato in suo med., & inf. Latin. Glossario v. Templarii; ubi addit, hunc
Hermannumforsan esse, quem cit. Albericus fuisse ait sub ann. 1237. patria Pictavinum natione Gallum; & qui paulo ante, nempe post festum Nativitatis S. Joannis Bapt. in transmarinis partibus, sive Syria prope Aleppum a Saracenis cladem acceperat, centum viginti Fratribus cum Archariis, & Balistariis in magna quantitate omnibus captis, aut occisis, præter novem Fratres, qui cum Magistro evaserunt ex cit. Alberico illius temporis scriptore in Chronico, & Godefrido in Annal. apud Raynaldum ad hunc annum n. 84. -
(b) Nobilis vir: Albericus, ut in not. ad præcedentem epistolam.
-
(c) Alias litteras Innocentius IV. incip. Sua nobis nobilis &c. anno 1243. die 23. Decembris Militibus Templariis pro hoc ipso negotio, vel ejus complemento dedit, ut ibi videre est.