« bullarium-franciscanum-140 »

GREGORIUS &c.

Dilectis filiis ..... Priori, & Fratribus Eremi Camaldulen. a , & Monachis Fontis boni b Salutem, & Apostolicam Benedictionem.

Quia illos verè diligimus, quorum patienter ineptias non portamus; & sanitas in toto non læditur, cum subortis in parte languoribus obviatur. Non est, in quo vestra caritas offensam reputare se debeat, si nostræ dilectionis affectus vobis adversantia non acceptat; si Camaldulen. Ordinis decus offuscari non patitur; si virtutes vestras perfectius æmulantes vitiis indignamur: Nam & Deus Omnipotens a principio lucem communicare tenebris non perpessus durum vibravit in Angelorum pravitate judicium; sed unde pars reproba corruit, inde confirmata, quæ non peccaverat, exultavit. Hominum quoque delinquentem protinus correxit originem; & eorum, cum quibus esse delicias reputat, culpas sine pœnitentia non relaxat. Econtra verò Jerusalem, quam repulerat, jam non irascitur; nec ejus adulteriis, ac fornicationibus adversatur; & cum Pharao post desideria sui cordis ire dimittitur, occulto, sed metuendo judicio, per eum, a quo relinquitur, induratur. Non est igitur adversum Nos justa vobis occasio murmuris super iis, quæ de Monasterii Sancti Cosmæ c negotio retulistis, quod ea nunc intentione subduximusd, qua vobis antea dederamuse. Volentes enim decori vestro præstare virtutem in optimo Urbis solof curavimus vestræ vitis plantare propaginem, quæ correcta regularis falcibus disciplinæ, ac alligata nexibus præceptorum uberes perseverantiæ luxuriaret in palmites; frondes produceret honestatis; botros dulcedinis ederet; & vinum jucunditatis communi expectationi, & desiderio propinaret. Sed personæ, quas ibidem, innocentiæ vestræ pace servata, minus providè direxistis, coram Apostolica Sede, Urbis multitudine, vel Orbis ad Romanam Curiam confluentis Monasticæ Religionis odorem fœtere fecerunt; plus scandali, plus horroris, & tristitiæ suscitantes, quam illaturæ Nobis ædificationis, suavitatis, & gaudii putabantur. Nullis igitur, nisi vestris, id quod secutum est, imputetis; quia Nos ex dispensatione Divina facti Judices omnium in scandalum multitudinis errata tueri non possumus aliquorum. In ceteris vero Congregationis vestræ negotiis Sedem Apostolicam consueta fiducia requiratis; ex eo potius Nos credentes in priori circa profectus, & affectus vestros proposito, & caritate persistere, quo memoratas injuriarum causas festinavimus amputare; quia impunita temeritas prædictorum nimis in dolorem nostrum, scandalum plurimorum, & vestrum crevisset opprobrium; si non esset ei taliter obviatum.

Datum Laterani iii. Nonas Julii Pontificatus Nostri Anno Septimo.