« bullarium-franciscanum-2 »

Acte | bullarium-franciscanum/notice/151462
plus d'informations

Général

  •  
    Honorius III (1216-1227)
  •  
    Fratres Ordinis Minorum Pontifex Ecclesiarum Prælatis commendat. (Ex S. Antonino Chron. part. 3. tit. 24. cap. 7., & ex Monumentis Ordinis Tract. 1. fol. 22. Firmamentis Trium Ordinum Tract. 1. part. 2. fol. 10., Speculo Minorum Tract. 1. fol. 2., Rodulphio lib. 2. fol. 237., Roderico in Collect. Privilegiorum Honor. Bulla 2., & Waddingo in Annal. Min. ad An. 1219. num. 18.)
  •  
    An. 1219. die 11. Junii.
  •  
    1219

  •  

    HONORIUS &c.

    Venerabilibus Fratribus Archiepiscopis, & Episcopis, ac Dilectis Filiis Abbatibus, Decanis, Archidiaconis, & aliis Ecclesiarum Prælatis salutem, & Apostolicam Benedictionem.

    Cum dilecti filii Frater Franciscus, & Socii ejus de vita, & religione Minorum Fratrum, abjectis vanitatibus hujus Mundi, elegerint vitæ viam a Romana Ecclesia meritò approbatama; ac serendo semina Verbi Dei Apostolorum exemplo diversas circumeant mansiones; Universitatem vestram rogamus, & hortamur in Domino, per Apostolica Vobis scripta mandantes, quatenùs latores præsentium de prædictorum Fratrum Collegio existentes, cum ad vos duxerint declinandum, ipsos recipiatis, sicut Catholicos, & Fideles; aliàs eis ob reverentiam divinam, & nostram exhibentes vos favorabiles, & benignos. Datumb ..... iii. Jdus Junii; Pontificatus Nostri Anno Tertioc.
  •  
    Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°II., pp.2-3
  •  
    (a) Approbatam Regulam, nimirum primam a S. Francisco compositam, & primum ab Innocentio iii. anno Mccx. approbatam, testibus tribus S. P. Sociis, & Thoma a Celano ejusdem Discipulo in suis de ipso S. P. Historiis: deinde in Oecumenico Concilio Lateranensi anno Mccxv. confirmatam, ut asserunt memorati tres Socii, & B. Angelus Clarenus in proæmio, & cap. I. Expositionis in Regulam Minorum; post istos vero Alexander Alensis, Sanctus Bonaventura, Jordanus de Saxonia, Sanctus Antoninus, & Chronicon magnum Belgicum. Sed & in principio primæ ipsius Regulæ idem S. P. adjecit: Hæc est vita, quam Frater Franciscus petiit sibi concedi, & confirmari a Domino Papa Innocentio, & concessit, & confirmavit eam sibi, & suis Fratribus habitis, & futuris &c, idemque testatur ipsemet Honorius Papa in xiv. Bulla: Solet annuere &c., qua scribit anno Mccxxiii. se confirmare Fratribus Minoribus Regulam a bonæ memoriæ Innocentio Papa Prædecessore nostro approbatam, verbo quidem, non scripto, quod sciatur. Anonymus etiam Synchronus Auctor Chronici Montis Sereni prope Halam Saxoniæ usque ad annum 1225. perducti, inter Scriptores rerum Germanicarum Menkenii tom. 2. inquit ad annum 1224. Duo novæ conversationis in Provincia, & in ipsa Civitate Magdeburg. haberi cœperunt; unus eorum, qui Sanctos Prædicatores se nominant, alter eorum Minores Fratres appellantur; de quibus ferunt, quod ante hoc tempus xx. annis instituti, & ab Innocentio Papa fuerunt confirmati.
  •  
    (b) Datum &c. Excusi codices nullum assignant hujus concessionis locum, sed ex aliis Honorii Litteris toto hoc mense datis constat Viterbii eum resedisse, non Perusii, uti scripsit Marianus Florent. inquit Waddingus ad hunc annum num. 29. ex Regesto Honorii: verum ex hujus Regesto apud Raynaldum ad ann. 1219. num. 27. 28. 38. & 45. & in novissimo Bullario Romano Coquelines Tom. iii. liquet Honorium fuisse Romæ usque ad xv. & x. Kalend. Julii; mense autem Julio, Augusto, ac Septembri Reate, & postea Viterbium se contulisse: data est itaque hæc Bulla Romæ: cum etiam Richardus a Sancto Germano in Chronico correctiori sub ann. 1219. habeat: Hoc anno Honorius Papa mense Junio (exeunte) Vrbem exiens ivit Reate, ibique moram faciens usque ad mensem Octobris, inde ivit Viterbium, & tandem Romam reversus est &c.
  •  
    (c) Obtentæ sunt hæ litteræ in Comitiis generalibus hoc anno Assisii coactis, vel paulo post ea de causa, quod multi Fratres ex Transalpinis partibus, qui accesserant, assererent, se durius in multis locis receptos, quod authenticas nullas, quibus suam vitam, Institutumque ab Ecclesia fuisse ratum probarent, litteras non haberent; nec propterea ab Ecclesiarum Rectoribus ad verbi divini ministerium admittebantur. Has litteras commemorat etiam Raynaldus in Annal. Eccles. ad hunc annum num. 50., aitque similes Pontificem Ordini Prædicat. contulisse, epist. videlicet 647. Regest. Vatic., at similes quidem quoad argumentum, non autem quoad exemplum; cum hoc incipiat. Si personas Religiosas &c. hoc anno dat. Laterani 6. Kal. Maji Pontif. anno ii., & iterum hoc anno Viterbii die 17. Kal. Decembr. Pontif. ann. iv., suntque in Bullario O. P. Bul. 8. & 9. Honorii iii. tom. 1. primum omnibus, deinde Hispanis Prælatis Eccles. missæ.

Informations

Acte
bullarium-franciscanum admin (IRHT), dans  Bullarium Franciscanum
Bullarium Franciscanum romanorum pontificum, dir. I. Heullant-Donat, éd. électronique TELMA (IRHT), Orléans, 2021 [en ligne], acte n. 151462 (bullarium-franciscanum-2), http://telma.irht.cnrs.fr/chartes/bullarium-franciscanum/notice/151462 (mise à jour : 15/12/2020).
http://telma.irht.cnrs.fr/chartes/bullarium-franciscanum/notice/151462
bullarium-franciscanum/notice/151462
XML  JSON