Général
-
Innocent III (1198-1216)
-
Le prieur de San Tommaso d'Ascoli, Maurizio, et ses frères réguliers tant présents que futurs
-
XIII kalendas aprilis, indictione II, MCXCVIIII, anno secundo
-
-
Latran
-
Privilège solennel
-
[Original] E. ITALIE, Rome, Archivio San Giovanni in Laterano, Q4 A3.
-
Werner Maleczek, d'après E.
-
Innocent III prend sous la protection de saint Pierre l'église San Tommaso d'Ascoli Piceno [APO].
-
Innocentius episcopus, servus servorum Dei, dilectis filiis Mauricio priori ecclesie Sancti Thome, que in civitate Esculana sita est, eiusque fratribus tam presentibus quam futuris regularem vitam professis.
In perpetuum. Quotiens a nobis petitur, quod religione et honestati convenire dinoscitur, animo nos decet libenti concedere et petentium desideriis congruum suffragium impertiri. Eapropter dilecti in domino filii vestris iustis postulationibus clementer annuimus et prefatam ecclesiam sancti Thome, que in civitate Esculana sita est, in qua divino mancipati estis obsequio ad exemplar predecessorum nostrorum felicis recordationis Lucii, Urbani, Clementis et Celestini Romanorum pontificum sub beati Petri et nostra protectione suscipimus et presentis scripti privilegio communimus.
In primis siquidem statuentes, ut ordo monasticus, qui secundum Deum et beati Augustini regulam in eadem ecclesia institutus esse dinoscitur perpetuis ibidem temporibus inviolabiliter observetur. Preterea quascumque possessiones, quecumque bona eadem ecclesia impresentiarum iuste et canonice possidet aut in futurum concessione pontificum, largitione regum vel principum, oblatione fidelium seu aliis iustis modis prestante domino poterit adipsci, firma vobis vestrisque successoribus et illibata permaneant, in quibus hec propriis duximus exprimenda vocabulis. Locum ipsum, in quo prefata ecclesia sita est cum omnibus pertinentiis suis et parrochia, que a Raynaldo, episcopo Esculano, vobis concessa et certis finibus terminata, ecclesiam Sancte Lucie de Silua Corua cum omnibus possessionibus et pertinentiis suis, quam prefatus Raynaldus, Esculanus episcopus, capitulo assentiente vobis concessit sicut in eorum autentico continetur. Ius etiam, quod in predicta ecclesia domini de Osian. et de villa Main. vobis et ecclesie vestre episcopo consentiente dederunt, campum , quod habetis in Panical. et terram, quam dedit vobis Iacobus de Milian. in sexto, casam et vineam, quam dedit vobis Sanaricus, hospitale, quod habetis inter aquam ...am et castrum Ripei cum omnibus pertinentiis suis. Sane novalium vestrorum, que propriis manibus aut sumptibus colitis sive de nutrimentis animalium vestrorum nullus a vobis decimis exigere vel extorquere presumat. Licet quoque vobis clericos et laicos liberos et absolutos e seculo fugientes ad conversionem recipere et eos absque contradictione aliqua retinere. Prohibemus insuper, ut nulli fratrum vestrorum post factam in eodem loco professionem fas sit absque prioris sui licentia nisi artioris religionis obtentu de eodem loco discedere. Discedentem vero absque communium litterarum cautione nullus audeat retinere. Cum autem generale interdictum terre fuerit, liceat vobis clausis ianuis, exclusis excommunicatis et interdictis non pulsatis campanis supressa voce divina officia celebrare. Libertates preterea et immunitates eidem ecclesie a bone memorie Transmundo Esculano episcopo rationabiliter concessas et hactenus observatas, ratas habemus et eas futuris temporibus illibatas manere sancimus. Inhibemus etiam, ne quis in vos vel ecclesiam vestram sine manifesta et rationabili causa excommunicationis vel interdicti sententiam promulgare presumat. Chrisma vero, oleum sanctum, consecrationes altarum seu basilicarum, ordinationes clericorum et cetera ecclesiastica sacramenta a diocesano catholico suscipiatis episcopo, que vobis gratis absque aliqua pravitate precipimus exhiberi. Sepulturam quoque ipsius loci liberam esse decernimus, ut eorum devotioni et extreme voluntati, qui se illic sepeliri deliberaverint, nisi forte excommunicati vel interdicti sint nullus obsistet salva tamen iustitia illarum ecclesiarum, a quibus mortuorum corpora assumuntur. Obeunte vero te nunc eidem loci priore vel tuorum quolibet successorum nullus ibi qualibet surreptionis astutia seu violentia preponatur, nisi quem fratres communi consensu vel fratrum pars consilii sanioris secundum Dei ..... et beati Augustini regulam providerint eligendum. Decernimus ergo, ut nulli omnino hominum fas sit prefatam ecclesiam temere perturbare aut eius possessiones auferre vel ablatas retinere, minuere seu quibuslibet vexationibus fatigare sed omnia integra conserventur eorum pro quorum gubernatione ac sustentatione concessa sunt usibus omnimodis profutura salva sedis apostolice auctoritate et diocesani episcopi canonica iustitia. Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita, nisi reatum suum congrua satisfactione correxerit potestatis honorisque sui dignitate careat reamque se divino iudicio existere de perpetrata iniquitate cognoscat et a sacratissimo corpore ac sanguine Dei et domini redemptoris nostri Iesu Christi aliena fiat atque in extremo examine districte ultioni subiaceat. Cunctis autem eidem loco sua iura servantibus sit pax domini nostri Iesu Christi, quatenus et hic fructum bone actionis percipiant et apud districtem iudicem premia eterne pacis inveniant. Amen, Amen, Amen.
Ego Innocentius catholice ecclesie episcopus.ss.
+ Ego Octavianus Hostiensis et Velletrensis episcopus.ss.
+ Ego Petrus Portuensis et Sancte Rufine episcopus.ss.
+ Ego Pandulphus basilice XII. apostolorum presb. card. ss.
+ Ego Petrus tit. Sancte Cecilie presb. card. ss.
+ Ego Iohannes tit. Sancti Clementis ac ca.. Viterbi.. et Tusculan....
+ Ego Guido Sancte Marie trans Tyberim tit. Calixti presb. card.ss.
+ Ego Hugo presb. card. Sancti Martini tit. Equitii. ss.
+ Ego Iohannes tit. Sancti Stephani in Celio monte presb. card. ss.
+ Ego Cinthius tit. Sancti Laurentii in Lucina presb. card. ss.
+ Ego Soffredus tit. Sancte Praxedis presb. card. ss.
+ Ego Iohannes tit. Sancte Prisce presb. card. ss.
+ Ego Gratianus Sanctorum Cosme et Damiani diac. card. ss.
+ Ego Gerardus Sancti Adriani diac. card. ss.
+ Ego Gregorius Sancte Marie in Aquiro diac. card. ss.
+ Ego Gregorius Sancti Georgii ad Velum aureum diac. card. ss.
+ Ego Nicolaus Sancte Marie in Cosmidyn diac. card. ss.
+ Ego Bobo Sancti Theodori diac. card. ss.
+ Ego Hugo Sancti Eustachii diac card. ss.
+ Ego Gerardus Sancti Nicolai in carcere Tulliano diac. card. ss.
Datum Laterani per manum Raynaldi domini pape notarii cancellarii vicem agentis, XIII. Kal. Aprilis, indictione II, incarnationis dominice anno MoCoXCoVIIIIo, pontificatus vero domini Innocentii pape III anno secundo. -
Inconnue de Potthast.
Informations
Acte
Laurent
Vallière
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 193411 (aposcripta-41102), http://telma.irht.cnrs.fr/chartes/aposcripta/notice/193411 (mise à jour : 25/10/2024).