Ricuin, évêque de Toul, confirme à Gui, abbé de Molesmes, à l'intention des moines de Vaucouleurs, les autels de Tusey et de Chalaines, la chapele du château de Vaucouleurs, ainsi que les autres dons de Hugues, comte de Champagne, de Geoffroi de Joinville, de Sigebert, prévôt de Vaucouleurs, et du comte Eudes, frère de Hugues.

l.1 IN NOMINE SANCTE ET INDIVIDUE TRINITATIS, PATRIS ET FILII ET SPIRITUS SANCTI. Riquinus Dei misericordia Leuchorum episcopus, Widoni venerando Molismensium abbati ejusque dilectis in Christo fratribus. Beatȩ conversationis vestrȩ
l.2 gratiam intuentes, affectum quem debemus omnibus ad vos propensius intendimus, ut quorum merita certius nobis subsidium pollicentur, horum obsequiis devotio nostra studiosius famuletur. Ut ergo beatȩ
l.3 spei vestrȩ particeps inveniar, simulque dilecti filii nostri Hugonis monachi vestri frequenti supplicatione pulsatus, parrochialia altaria de Tuseio, de Casleniis et capellam de castro Vallicoloris ad usus
l.4 monachorum vestrorum nominatim in cella Vallicoloris Deo servientium, vobis vestrȩque ȩcclesiȩ in perpetuum possidenda contradimus, ita videlicet ut conductu fratrum vestrorum in prenominata cella commorantium vica-
l.5-rius ipsorum presbiter deinceps ordinetur, qui contemtus medietate eorum que ad ipsa pertinent altaria, deserviat altariis et de redditibus ac canonicis consuetudinibus episcopo, archidiacono, decano suo, jure canonico res-
l.6-pondeat. Fratres vero cellȩ pro responso beneficii, annuatim in inventione beati Stephani, nomine census ad altare nostri prothomartyris VI denarios representent. Sane hec eadem altaria comes Hugo Campaniȩ
l.7 a nobis in amiciciam habebat; sed salubrius deliberans tam capellam quam et altaria in manu nostra reposuit, nosque ea cum integritate vestrȩ Molismensi inquam ȩcclesiȩ ut predictum est donamus et presenti scripto
l.8 consignamus. Confirmamus vobis preterea que Gaufridus de Jovisvilla, et uxor ejus Hodierna, consensu heredum suorum, vobis donaverunt, mancipia quidem Durandum carpentarium, Hunierum piscatorem, Belli-
l.9-num furnarium et uxores eorum ac filios et filias cum omnibus eorum possessionibus, et Girbertum cum ejus possessione campum etiam totum ubi ȩcclesia fundata est, usque ad mansum Siberti, ejusdem etiam Siberti mansum,
l.10 terram etiam quȩ est ante ȩcclesiȩ introitum ubi dudum plantata fuit vinea, et partem pasnagii Wevrȩ quȩ eum contingebat, et usum ejusdem silvȩ liberum ad monasterii et officinarum indigentiam, et partem furni ban-
l.11-nalis prout ei competebat, et costam totam de tera Letardi, quodque concessit, ut quicumque suorum alodium vel feodum suum eidem cellȩ vestrȩ conferre voluisset, liberam exinde facultatem haberet; item quod dedit
l.12 Sibertus Vallicoloris prepositus, voluntate et consensu predicti Gaufridi, molendinum Ramberti dimidium, et dimidium molendinum desub Roca; item quod dedit Odo comes frater Hugonis comitis ob memoriam sui ac
l.13 suorum in vestra ȩcclesia anniversariȩ recolendam, campum videlicet totum qui est inter ȩcclesiam sancti Teobaldi et villam Tusei, simulque pratum totum quod Marochia vulgo nuncupatur, sicut ab eodem campo ex una parte
l.14 et a fluvio qui Wasia dicitur, ab altera parte terminatur; item partem furni bannalis prout ipsi Odoni inquam comiti competebat. Item confirmamus que donavit vobis comes Hugo scilicet partem
l.15 quam habebat in molendino de Casleniis et Bernardum cum uxore et omnibus filiis ac filiabus ejus, preterea decem jugera terrȩ juxta Bureium que antefatus Gaufridus eidem cellȩ postmodum contulit. Hec igitur
l.16 omnia que tam a nobis quam a prenominatis fidelibus viris tradita vobis presenti pagina continentur, queque in futurum liberalitate principum seu devotione fidelium inspirante Deo, legitime conferentur, nos auctori-
l.17-tate Dei et nostra confirmamus, omnesque eos qui contra presentis tenorem confirmationis ȩcclesiam vestram in aliquo predictorum temere ac violenter spoliaverint, vel certe inquietaverint, admoniti autem semel
l.18 aut bis satisfacere contempserint, anathematis vinculo innodamus; eos vero qui conservaverint, foverint, adjuverint, benedictio et gratia cȩlestis tueatur. Ego Riquinus episcopus subscripsi et confirmo.
l.19 S. Petri abbatis sancti Apri. S. Teomari abbatis sancti Mansueti. S. Stephani primicerii et archidiaconi. S. Berengeri decani sancti Stephani. S. Hugonis archidiaconi. S. Tiecelini archidiaconi. S. Hunaldi archidiaconi.
l.20 S. Haimonis archidiaconi. S. Gotberti cantoris et archidiaconi.
l.21 [sceau].

Cf. art. de Girardot sur les fours et moulins de Vaucouleurs à paraître.

LAURENT (J.), Cartulaires de Molesmes, ancien diocèse de Langres (916-1250). Recueil de documents sur le Nord de la Bourgogne et le Midi de la Champagne, 2 vol., Paris, 1907-1911 (Collection de documents publiés avec le concours des Antiquités de la Côte-d'Or, 1), t. 2, p. 506-507, n° 696.

DOUCHE (Lysiane), Actes de Pibon et de Ricuin, évêques de Toul, de 1069 à 1124, Nancy 2, mémoire de maîtrise, 1985, p. 312-316, n° 96.