Robert, évêque de Langres, donne à Saint-Bénigne les églises de Germainvillers, Rigny, Memont, Occey, Chaignay, Epagny, Is[-sur-Tille], Audeloncourt et une église nouvellement construite près du château de Clefmont.

l.1 IN NOMINE PATRIS ET FILII ET SPIRITUS SANCTI. Quoniam omnis potestas a Deo ordinata est, et omnis sublimitas nutibus divinȩ [providentia subjaceat, dignum est ut] ex credita potestate Deum honorare studeat, quisquis vivendi normam aliis
l.2 subministrat, hoc enim modo subjecti quique ad elemosinam facile poterunt provocari, si prepositum suum avariciȩ nodo nequaquam viderint obligari. Quocirca ego Rotbertus gratia Dei Linguonicȩ sedis episcopus, subjectos mihi ad elemosinam incitare desiderans, predeces-
l.3-sorum etiam meorum qui ȩcclesias vel fundaverunt vel fundatas ab aliis, de rebus propriis ditaverunt imitator fieri cupiens, trado et concedo Deo et sancto Benigno Divionensis ȩcclesiȩ patrono, ȩcclesias quasdam: ȩcclesiam videlicet de Germani villare, ȩcclesiam de Ri-
l.4-niaco, ecclesiam de Magno Monte, ȩcclesiam de Oceio, ecclesiam de Casnedo, ecclesiam de Spaniaco, ȩcclesiam de villa nomine Iz, ȩcclesiam Adeleni curtis, et ȩcclesiam novam sub castro Clari Montis. Omnes has ȩcclesias integras tradidi Divionensi ȩcclesiȩ,
l.5 cum synodis et paratis ad jus episcopi pertinentibus. Hȩc omnia tradidi Divionensi ȩcclesiȩ, ob remedium animȩ meȩ, et omnium antecessorum meorum, omniumque pontificum Linguonensis ȩcclesiȩ, et ob id quam maxime ut anniversaria dies obitus mei
l.6 in Divionensi monasterio perpetuo celebretur, tam pro hoc beneficio quam pro aliis quȩ eidem ȩcclesiȩ a me collata sunt.
l.7 Ego Rotbertus episcopus Linguonensis, hanc cartam sigilli mei impressione confirmo. S. Amalrici decani. S. Jocelmi, archidiaconi. S. Lantberti archidiaconi. S. Vuarnerii archidiaconi. S. Norgaudi archidiaconi. S. Widrici decani.
l.8 S. Gerardi decani. S. Widonis cognomento Pagani. S. Vualonis canonici. S. Hugonis archidiaconi. S. Teoderici decani. S. Ulrici capellani.
l.9 S. Stephani, cancellarii. S. Duranni cognomento Colpaped.
l.10 Actum anno dominicȩ incarnationis MXCoIIo, indictione XVa, epacta VIIII, concurrente IIII, in Romana sede presidente papa URBANO, in Francorum regno regnante PHYLIPPO, Divionensem
l.11 abbatiam gubernante domno JERENTONE abbate venerando.
l.12 [sceau].