Calixte II, pape, confirme les possessions et les privilèges de l'abbaye Saint-Remi de Reims et la place sous la protection du Saint-Siège.

l.1 CALIXTUS, EPISCOPUS, SERVUS SERVORUM DEI, DILECTO IN CHRISTO FILIO ODONI, ABBATI VENERABILIS MONASTERII SANCTI REMIGII, QUOD SECUS URBEM REMENSEM SITUM EST, EJUSQUE
l.2 SUCCESSORIBUS REGULARITER SUBSTITUENDIS IN PERPETUUM. Apostolicȩ sedis auctoritate debitoque compellimur pro universarum aecclesiarum statu satagere et earum quieti, quȩ specialius Romanȩ adherent
l.3 aecclesiȩ, auxiliante domino, providere. Ea propter, fili in Christo karissime ODO abbas, tuis petitionibus annuentes, Beati Remigii monasterium cui, Deo auctore, presides, ad exemplar domini predecessoris
l.4 nostri sanctȩ memoriȩ PASCHALIS pape, decreti presentis auctoritate munimus. Statuimus enim ut quȩcumque predia, quȩcumque bona idem cenobium in presenti legitime possidet, vel
l.5 in futurum, largiente Deo, concessione pontificum, liberalitate principum, vel oblatione fidelium juste poterit adipisci, firma vobis vestrisque successoribus et illibata permaneant. In quibus
l.6 haec propriis duximus nominibus exprimenda, videlicet: aecclesiam Sanctȩ Mariȩ quȩ sita est extra muros castelli, cui Regis Testis vocabulum est, cum omnibus ad eam pertinentibus,
l.7 sicut eam venerabilis frater noster Rodulfus, Remensis archiepiscopus, a comite HUGONE dimissam vestro monasterio contulit, et scripti sui munimine confirmavit; aecclesiam Sancti
l.8 TIMOTHEI cum parochia burgi et suis appendiciis, et burgum. In episcopatu Leodiensi, alodium Mersenam cum aecclesiis et omnibus ad alodium pertinentibus. Item in eodem,
l.9 Litam cum aecclesia et omnibus quȩ ad alodium pertinent. In episcopatu Maguntino, Coslam cum aecclesiis et appendiciis alodii. In teritorio Fretensi, in episcopatu Avenionensi,
l.10 et in episcopatu Aquensi, alodia beati REMIGII, cum aecclesiis et possessionibus suis; censum Codiciaci castri sexaginta solidorum; mansiones Pontis Vidularii, in alodio beati REMIGII
l.11 sitas, quas FREDERICUS, ejusdem loci institutor, vestro monasterio contulit. Decernimus ergo ut nulli omnino hominum liceat idem cenobium temere perturbare, aut
l.12 ejus possessiones et bona quȩlibet auferre, vel injuste habita retinere, alienare, minuere vel temerariis vexationibus fatigare, seu aliquo repentino incessu abbatem vel
l.13 fratres in suis causis perturbare. Illud preterea districtius interdicimus, ne quis deinceps in mercato, quod duodecimo kalendas novembris penes burgum beati REMIGII fieri
l.14 consuevit, preter abbatem aut abbatis ministros, quicquam violenter accipiat, ne quis eo convenientes ledere, aut bonis suis expoliare presumat. Cenam etiam, quam
l.15 in duabus beati Remigii sollemnitatibus apud cenobium vestrum Remenses archiepiscopi immodeste accipere consueverunt, cum suis sumptibus, ab eodem cenobio removemus.
l.16 Haec enim venerabilis frater noster RODULFUS, aecclesiȩ Remensis antistes, in presentia predicti domini nostri sanctȩ memoriȩ PASCHALIS pape, concessit, sicut in ejusdem domini nostri
l.17 cyrografo continetur. Si qua igitur in futurum aecclesiastica secularisve persona, hanc nostrȩ constitutionis paginam sciens, contra eam temere venire temptaverit, secundo
l.18 tertiove commonita, si non satisfactione congrua emendaverit, potestatis et honoris sui careat dignitate, reamque se divino judicio existere de perpetrata iniquitate
l.19 cognoscat, et a sacratissimo corpore ac sanguine Dei et domini redemptoris nostri Jhesu Christi aliena fiat, atque in extremo examine districtȩ ultioni subjaceat.
l.20 Cunctis autem eidem loco justa servantibus, sit pax domini nostri Jhesu Christi, quatenus et hic fructum bonȩ actionis percipiant, et apud districtum judicem prȩmia
l.21 aeternȩ pacis inveniant. AMEN. AMHN. AMEN.
l.22 [rota] Ego Calixtus, catholicȩ ȩcclesiȩ episcopus, subscripsi [benevalete].
l.23 Datum Remis, per manum Grisogoni, sanctȩ Romanȩ ecclesiȩ diaconi cardinalis ac bibliothecarii, IIII idus novembris, indictione XIIIa,
l.24 incarnationis dominicȩ anno MoCoXVIIIIo, pontificatus autem domni Calixti secundi pape anno primo.
l.25 [sceau].

1

JAFFE-LOEWENFELD, n° 6782.

ROBERT (Ulysse), Bullaire du pape Calixte II : 1119-1124, 2 vol., Paris, 1891, t. 1, p. 150-151, n° 103.