Godefroid IV de Bouillon, duc de Basse-Lotharingie, corrobore la restitution à l'abbaye de Gorze, de l'église Saint-Dagobert de Stenay enlevée par le comte Arnoul.

l.1 [In nomine sancte et individue Trinitatis, Patris et Filii et Spiritus Sancti],
l.2 Godefridus, divina propiciante clementia dux et marchio. Justum et utile nobis esse scire et considerare debemus ut quoniam secularis militiae
l.3 negociis occupati, divinis intendere prout expedit nequaquam valemus, saltem Deo et sanctis peculiarius in monasteriis deservientibus consilium
l.4 nostrum et auxilium exhibentes, per hoc beneficientiae eorum pariterque mercedis, ipso Deo donante, participes existere valeamus. Unde notum
l.5 esse volumus sanctae universalis aecclesiae filiis et fidelibus tam futuris quam praesentibus quia dux Godefridus, avus meus, cum Beatrice,
l.6 uxore sua, apud Satanacum juris sui villam, in aecclesia Sancti martyris Dagoberti, pro suarum animarum remedio, monachos de monasterio Sancti
l.7 Gorgonii constituerunt eisque inter alia ad supplementum victus et vestitus aecclesiam villae Mosaci quae sine contradictione suae proprietatis erat
l.8 legaliter condonaverunt, quam etiam ipsi monachi tota vita ipsius avi mei et filii sui avunculi mei quiete et pacifice possederunt.
l.9 Postquam vero ipsis defunctis in nostras manus honor eorum per successionem devenit et pene omnis regio ipsis ante subjecta in odium nostri atque
l.10 inimicitias gratuitas conjuravit, ipsi tunc hostes nostri causa odii in nos assumpti, in ipsos quoque monachos insurrexerunt eisque per summam
l.11 injusticiam atque violentiam ipsam aecclesiam de manibus abstulerunt eamque alteri alteris in beneficium tradiderunt multisque annis usque dum videlicet
l.12 erga nos in gratiam redirent, coeptam injusticiam Deo sanctisque sibique famulantibus intulerunt. Super qua re cum apud Satanacum nobis
l.13 praesentibus questio oborta fuisset et ipsis etiam coessantibus qui ipsam violenciam exercebant, contio monachorum nos super hac interpellari coepisset
l.14 seque jam super hoc apud synodum Trevirensem proclamationem fecisse et judicio synodali ipsam aeclesiam suo juri adjudicatam fuisse, et auctoritate ponti-
l.15-ficali pacem et quietem possidendi sibi imperatam esse dixisset, simulque adhuc superesse testes qui predictae donationi avi mei interfuissent efficaciter
l.16 affirmasset, ipsos testes undique evocari et ante nos coadunari effecimus, et ipsis testificantibus vera esse que ipse asseverabant omni parte
l.17 repperimus. Quibus omnibus auditis et diligentius consideratis visum est nobis comitem Arnulfum qui princeps ipsorum fuerat ecclesie pervasorum
l.18 sub nomine sacramenti et fidei conjurare utrumnam hec omnia cognosceret vera esse, an potius ea vel vellet vel posset veraciter impugnare. Qui
l.19 sane ipsa adjuratione accepta confessus est haec, ita ut diximus acta esse seque et interfuisse et audisse et vidisse et ipso avo meo hanc donatio-
l.20-nem faciente laudasse. Hac ejus confessione percepta subsequenter eum monuimus ut sancto et nobis exinde faceret quod facere jure deberet
l.21 et ipsam invasionem coram Deo et sanctis emendans, deinceps ab ipsa aecclesia cum omnibus sibi subjectis perpetualiter abstineret, et ipse jure obniti non
l.22 valens ad opus Dei et sancti Dagoberti sibique deservientium monachorum ipsam aecclesiam nobis integre et sine omni in posterum reclamatione reddidit et
l.23 werpivit, et nobis ipsius aecclesiae donum sancto Dagoberto super altare suum restituentibus ipse spontaneus interfuit et laudavit. Unde ut haec
l.24 rerum gestarum memoria per tempora succedentia firma permaneat et inconvulsa, hanc descriptionem memorialem fieri jussimus, et sigilli nostri impressione
l.25 ac testium idoneorum affixione roborari statuimus.
l.26 [croix] Signum Godefridi, Dei gratia ducis et marchionis. Signum Amalrici. Signum Symonis fratris sui. Signum Vualteri. Signum Ottonis. Signum Dudonis.
l.27 Signum Gerardi. Signum Isembardi. Signum Aleranni. Signum Symonis. Signum Ursionis. Signum Helberti. Signum Arnulfi. Signum Heriberti. Signum Ragineri. Signum Oilardi.
l.28 Signum Guigfridi. Signum Franconis. Signum Hugonis. Signum Harmanni.
l.29 Acta Bullioni, anno dominicae incarnationis millesimo XCoIIIo, indictione I,
l.30 anno regni Heinrici quarti XXXoVIIo, imperii Xo, pontificante domno Eilberto Trevirorum archiepiscopo,
l.31 anno sui pontificatus Xo [sceau].

1

D'HERBOMEZ (A.), Cartulaire de l'abbaye de Gorze, Paris, 1898, (Mémoires et documents publiés par la Société Nationale des Antiquaires de France. Mettensia; 2), p. 242-244, n° 139.

LESORT (André), Les Chartes du Clermontois conservées au Musée Condé à Chantilly (1069-1352), Paris, 1904, p. 56-58, n° 2.

ERKENS (Franz-Reiner), "Vuenricus cancellarius scripsit et subscripsit". Eine unedierte Urkunde des Erzbischofs Egilbert von Trier, in Rheinische Vierteljahrs-Blätten, 56(1992), p. 79-96.