Pibon, évêque de Toul, notifie qu'il a consacré la chapelle élevée à Port du temps de l'abbé de Gorze Henri, et déclare cette chapelle libre de cens comme l'église-mère de Varangéville.

l.1 IN NOMINE SANCTE ET INDIVIDUE TRINITATIS, PATRIS ET FILII ET SPIRITUS SANCTI,
l.2 omnibus christiane fidei cultoribus, PIBO, gratia Dei Tullensis ȩcclesiȩ episcopus, in vinculo pacis uniri ut possint Christo incorporari.
l.3 Supernorum civium societas, quot quibusque commoditatibus exuberet, humani ingenii facultas evoluere gestiens succumbit, cum scriptum sit: in cor
l.4 hominis non ascendit quȩ preparavit Deus diligentibus se. Ad quam variarum gradibus virtutum devotioni fidelium facilis patet progressus, veritate adtestante
l.5 quȩ ait: jugum enim meum suave est et onus meum leve. Sed caritatis virtus, cujus opus in proximi dilectione perpenditur, velut quodam privilegio specialem
l.6 introducendi optinet dignitatem. Spe igitur illius desiderabilis societatis et fraternȩ dilectionis amore, homines de porto tociens raptorum sevicia afflictos
l.7 [et] fere omnibus casibus expositos non sine grandi dolore recolentes, intervallo quippe et frequenti intercurrentis fluvii magnitudine a monasterio divisi,
l.8 nec prout erat dignum sacris pasci misteriis, nec necessitatis tempore in atrio poter[an]t habere refugium, ȩcclesiam quam piȩ memoriȩ abbas HEINRICUS eis edificare
l.9 concesserat, in eadem libertate quam antiquitus et nostris temporibus optinet mater ecclesia Warengesi Villȩ, scilicet a censu et omni exactione immunem, cleri nostri
l.10 consilio consecravimus. Homines ejusdem villȩ prepositus tali dispensatione juramento astrinxit ne propter vicinam ȩcclesiam a servicio fratrum liberiores se crederent,
l.11 ne decimas vel ceteros redditus minuerent, sed licet in atrio habitarent, quicquid antiqua consuetudine soliti [er]ant absque refragatione persolverent. Si alicujus
l.12 necessitatis causa ibidem missam audire vellent, vicarium monasterii familiaritas vel obsequium eorum interpellaret, sin autem ad monasterium sicut prius convenirent,
l.13 et prepositus qualiter ibi divinum obsequium ageretur ordinaret, siquidem ad locum illum de pastorali cura nichil adtinet, sed velut quodlibet altare monasterii hoc
l.14 ita fratrum dispositioni concessimus. Prepositus ibidem custodem deputabit, qui si quid fidelium d[evot]io Deo [sanctoque Nicholao] presentaverit in usus fratrum fideliter servet,
l.15 nisi quod vicario monasterii oblationis quȩ quidem in missa ad manum offeretur mediam partem tr[ibuet. Videtur etiam id]oneum vestre insinuare dilectioni quod prefata ȩcclesia
l.16 Warengesi Villȩ antiquitus possidet mediam partem decimarum de novem quartariis de Lherimon[tis, quicumque eos colat. Possi]det etiam in barrochiis circumjacentibus de omnibus
l.17 corvadis suis omnem decimationem, de ancingis mediam partem. Apud villam autem et apud [Mannonis Curtem et apud Belloi]s de corvadis et ancingis suis omnem
l.18 decimationem, et de aliis terris ad eandem ȩcclesiam pertinentibus mediam partem. Hec ne vetustatis [situ aboleret oblivio, s]cripto memoriȩ commendare curavimus. Quod autem
l.19 misericordia quidem cooperante caritatis affectu impendimus, ne quis successorum immutare presumat, pontificali auctori[tate su]b anathematis vinculo cum sigilli nostri impressione
l.20 confirmare decrevimus, addito etiam probabilium virorum testimonio, quorum nomina subnotantur. Signum domni Pibonis episcopi. Signum Riquini primicerii. Signum Brunonis cardinalis
l.21 archidiaconi. Signum Stephani ejusdem loci archidiaconi. Signum Reinbaldi archidiaconi. Signum Hugonis archidiaconi. Signum Tieszelini archidiaconi. [Signum] Alberonis cancellarii. Signum Albrici capellani.
l.22 Signum Widrici abbatis Sancti Apri. Signum Temari abbatis Sancti Mansueti. Signum Seheri abbatis Sancti Leonis. Signum Odelrici abbatis Sancti Michahelis. Signum Hubini decani.
l.23 Signum Teoderici ducis. Signum Gerardi fratris ejus. Signum comitis Reinardi. Signum Odelrici de Brissei. Signum Petri filii ejus. Signum Morandi de Altirei. Signum Teoderici de Nancei.
l.24 Acta Tulli, in majori ȩcclesia, in plena synodo, V idus octobris, anno ab incarnatione Domni millesimo CoI, indictione [VIIII], anno ordinationis nostrȩ XXXII interveniente
l.25 domno Adelone ejusdem loci preposito.
l.26 [sceau].

D'HERBOMEZ (A.), Cartulaire de l'abbaye de Gorze, Paris, 1898, (Mémoires et documents publiés par la Société Nationale des Antiquaires de France. Mettensia; 2), p. 343-345 et 591-594, n° 203.

CHOUX (abbé Jacques), L'épiscopat de Pibon : 1069-1107.- Nancy : Société d'Archéologie Lorraine, 1952, p. 231-232, n° 81.