< Ordonnance 6>

Paris, Archives nationales, JJ 57 F. 44 V.

C'est l'ordenance que mons qui ores est roy fist ou temps qu'il estoit regent et vouloit qu'elle feust tenue en son hostel et l'envoia a son conseil, d'Yvort a Paris, lors que le roy Jehan fu trespassez au Louvre.

Table

Paneterie , Eschançonnerie , Cuisine , Fruiterie , Fourriere , Ecurie ,

Ordonnance

• <Paneterie>a
  • 1.Premierement en la paneterie n'aura touz jours que deus panetiers et auront chascun 2 prouvendes d'avainne et fain et fuerre et hostelage et forge et livroison chascun pour 2 vallés et 4 porte chappes, desquiex li uns ira touz devant pour faire le pain et li 3 seront tousjours a court et mengeront a court et non plus. Et doivent querir le pain et recevoir par compte, et quant l'en sera a sejour, il acheteront du blé et le feront mosdre et cuire pour essaier quel marchié il ont de pain.
  • 2.Item, 2 sommeliers des nappes, Mallebeste et 1 autre et 2 aides et mengeront a court et non plus. Et jurront sur sains li dis panetiers qu'il ne donrront riens ne feront donner ne n'appelleront aucun pour mengier a court sans le congié des mestres. Et fera chascun panetier sa journee et en rendra compte aus mestres, et sera portee touz les jours par devers le seigneur par un des mestres et n'auront point de clerc fors celui qui leur sera baillié.
  • 3.Memoire qu'il y faut 1 pour faire le pain, les oublies et les pastéz de bouche.
• <Eschançonnerie>b
  • 4.Item en l'eschançonnerie n'aura que 3 eschançons, un pour la bouche et les 2 pour le commun, Et n'auront chascun 2 prouvendes d'avainne et fain et fuerre et hostelage et forge et livroison chascun pour 2 vallés et leur vin de couchier acoustumé et leur chandelle et aussins les panetiers devant dis.
  • 5.Item il n'i aura par devers la bouche que 1 sommelier a cheval et aura une provende d'avainne et non plus.
  • 6.Item, 2 barilliers et une garde huche qui menrront les 3 sommiers de l'eschançonnerie, Et devers le commun deus boutiers, deus portebous, le potier et le maderinier et non plus, et mengeront a vourt et n'auront point de clerc fors celui qui leur sera baillié. Et jurront sur sains li dis eschançons qu'il ne donrront riens ni ne feront donner ne n'apeleront aucun pour mengier sans le congié des mestres et fera chascun sa journee et en renderont commpte aus mestres et sera touz les jours portee devers le seigneur. Et serviront lesdis offices par mois ou ainsinc comme il se voudront ordener, mes qu'il n'i ait touzjours a court que trois ; et se il en y avoit il ne serviroient pas de leur office ne n'auroient ne boire ne mengier ne autre chose.
  • 7.Memoire de l'acheteur des vins.
• <Cuisine>c
  • 8.Item en la cuisine n'aura touzjours que trois keus, 1 pour la bouche, et 2 pour le commun et 1 escuier pour servir Mons. et le commun. Et s'il ne povoit tout ce faire uns des keus li aideroit. Et fera Pierre des Matelins venir toutes les viandes et appellera l'escuier avec lui, et sera li dit P. garde mengier. Et rendront compte aus mestres des dites choses. Et aura devers la bouche, 1 aideur qui prendra une prouvende d'avainne et fain et forge et fourriere et non plus, et 1 hasteur, 1 saussier et 1 souffleur, 1 page et 1 enfant, et devers le commun 2 aideurs et penrront aussinc comme celui de la bouche, 2 souffleurs, 2 hasteurs et 2 pages et 3 enfantz et 1 saussier et mengeront a court et non plus. Le gardemengier P. de Matheny doit estre a la char despecier et au poisson rechevoir et le doit par compte livrer quant on la met cuire et par compte recevoir et les aideurs doivent la char despecier et doit on garder qu'elle soit de droite moison. Et jurront sur sains lesdiz keus qu'il ne donrront riens ne ne feront donner ne n'appelleront aucun pour mengier a court avec eulz sanz le congiet des mestres et feront vuidier touz ceus de la cuisine forz ceus qui ce dessouz sont ordenez et estrangeront de touz poins et de ce ne font, li sires, leur en demandera les courppes, et penrront li dit keu leur vin acoustumé ou temps de monsseigneur.
• <Fruiterie>d
  • 9.Item en la fruicterie n'aura touz jours a court que 1 fruictier et penrra autant comme 1 panetier. Item 4 vallés du fruit et 1 chauffecyre et non plus et mengeront a court et non plus. Et jurra sur sains li dis fruictiers qu'il ne donrra riens ne ne fera donner ne n'appellera aucun pour mengier a court sanz le congié des mestres et ne baudra a nul des mestres quel qu'il soit nulles torches sanz le congié des mestres, ne ne serviront de fruit fors les chiees des mestres et les chevaliers.
• <Fourriere>e
  • 10.Item en la fourriere aura touz jours 2 fourriers et penrront aussinc comme les panetiers et 2 vallés a cheval et penrront chascun une prouvende d'avainne et mengeront a court et non plus, et fera li uns office de clerc. Item, 8 aides qui aueront les gages acoustumez. Et jurront sur sains lesdis fourriers que il ne donrront riens ne ne feront donner sanz congié fors tant seullement a ceus qui doivent avoir fourriere et n'aura nulz chambre en l'ostel mons. sanz son congié, se ce ne sont les chevaliers qui en auront une tant seullement, et se il sont hors de l'ostel il ne penrront rien et de la busche a l'ordenance des mestres et en renderont compte sur le buriau.
• <Ecurie>f
  • 11.Item en l'escuierie aura touzjours 2 escuiers, 1 escuier pour le cors et l'autre pour le commun et non plus et penrront touzjours ce que il ont accoustumé a penrre devers mons. Item 2 vallés de estables, 3 chevaucheurs et le clerc et mengeront a court et non plus, et les autres vallés a gages acoustumez devers mons. et autant de vallés et non plus. Et jurront sur sains qu'il ne donrront riens ne ne feront donner ne n'apelleront aucun pour engier a court avec eulz sanz congié des mestres.
  • 12.Item huyssiers : trois, touz jours a court et auront chascun avainne pour 1 cheval et non plus et fain et forge et hostelage et fourriere, et livroison chascun pour un vallet et non plus. et jurront sur sains qu'il ne lairront entrer vallet en salle qui ait livroison ne autre qui ne doie entrer, et ne soufferont que nulz menjusse en salle ne s'i assiece fors ceus qui sont en l'ordenance, se ce n'est par congié des mestres et que nulz ne menjusse avec les chiez des mestiers, et que tous vallés d'office menjussent ensamble a une table ou a deus.
  • 13.Item, il seront touz jours a court 2 portiers et penrra chascuns une prouvende d'avainne et forge et fourriere et non plus.
  • 14.Item 2 vallés de porte qui mengeront a court et non plus, ne n'aura cheval a court s'il n'a avainne du seigneur sus painne de perdre le cheval et le service.
  • 15.Item l'aumosnier aura 3 prouvendes d'avainne et mons. Guillaume deus et 6 vallez, desquiex il y aura deus pour l'aumosnier et feront touz les 6 ensamble l'office de l'aumosne et mengeron a court et non plus.
  • 16.Item chascun chambellenc prendra 4 prouvendes d'avainne et fain et forge et 2 escuiers menganz a court et 1 sommelier et 2 vallez a livroison.
  • 17.Item la chambre aus deniers : Guillaume de Pieronne, mestre Brice paieur de la Chambre : avainne a chascun pour 2 chevaus et 1 vallet mengant a court et 1 autre a livroison. Item mestre Arnoul contre escriseur 2 prouvendes et 1 vallet a livroison.
  • 18.Item li mestre de l'ostel penrront chascun avainne pour 3 chevaus et fain et forge et fourriere et hostelage et 2 escuiers mengans a court et 2 vallez a livroison.
  • 19.Item les chapelains, trois, touz joursz a court, et 2 provendes et 3 clers et chascun une provende et les gages acoustumez au temps du roy Phelippe. Item 2 sommeliers de chapelle qui mengeront a court et non plus.
  • 20.Item li chanceliers mengera a court quant il pourra et quant il mengera en son hostel, il prendera ce qu'il convendra pour sa personne et pour 2 compaignons et 2 escuiers et le remanant de sa mesnie vendra mengier a court, et de remanant ainssi comme il a acoustumé.
  • 21.Item les clers des resquestes 1 touzjours a court et 1 chevalier et penrront si comme il est acoustumé et des notaires le nombre que l'en a acoustumé et ne prendront chascun que 2 prouvendes d'avainne et les gages acoustumez au temps le roi Phelippe et n'auront nulz vallez ne clers menganz a court ne de secret ne d'autres.
  • 22.Item des vallés mons. 12, touz jours a court et aura chascun une prouvende d'avainne et 13 d. de gages et non plus et serviront mons. et les chevaliers et les bonnes genz de ceenz.
  • 23.Les vallés trenchans devant mons. et les salles qu'il a retenus pour son cors auront chascun 2 prouvendes d'avainne et 19 d. de gages pour fain, pour hostel et pour vallés et non plus, ainssinc comme il avoient au temps le roy Phelippe son pere.
  • 24.Item 2 vallés de chambre, 1 espissier et 1 barbier qui penrront autant comme les vallés mons. servant en salle.
  • 25.Item, une gueite et 1 corduanier qui prendront autel comme les vallés de chambre.
  • 26.Item les sommeliers de la chambre mengeront a court.

Comment citer cette notice

Elisabeth   Lalou . " Ordonnance de l'Hotel de Philippe V régent ( Paris, Archives nationales, JJ 57 F. 44 V. )", dans Ordonnances de l'hôtel du roi , Elisabeth   Lalou , Benjamin   Suc , éds, Orléans : Institut de Recherche et d'Histoire des Textes , 2006 . (Ædilis, Publications scientifiques, 5). [En ligne] http://www.cn-telma.fr/ordonnances/ordonnance 6 / .