IRHT

Ordonnances de l'hôtel du roi

> Ordonnance de l'Hôtel [ 1306 septembre -1307 septembre ]

< Ordonnance 4>

Paris, Centre historique des Archives nationales, JJ 57 F. 49.

C'est l'ordenance de l'ostel le roi

Ordonnance

    • 1.Les 6 chambres anciennes de l'ostel demourront, c'est assavoir le seel, le confesseur, l'aumosnier, les chapelains, le mestre de l'ostel souverain et la chambre aus deniers. Et seront herbregiez par nos fourriers et prendront par deviers la fourriere ce que appartient a l'office de leur chambre, si comme il est acoustumé et n'auront nulz fourriers fors que les mestres.
    • 2.Nuls autres n'auront chambre avecques le roy fors les dessus nommés, et se il estoit einsi que le roy fust herbregiez loing de ville ou de mesons et monseigneur de Valoys ou monseigneur de Evreux ou monseigneur de Saint Pol venoient a court et l'en leur prestast l'ostel de grace en l'ostel le roy, rien ne lor seroit livré de nos mestiers, ainçois facent lor pourveance par lor gens.
    • 3.Les chambellans seront ordené selonc l'estat ancien, c'est assavoir le principal chambellen aura 4 provendes d'avainne et 3 s. 6 d. de gaiges et pour sa chape 8 £ par an, et chascuns des autres chambellens aura 3 provendes d'aveinne, et 3 s. de gaiges par jour et chascuns un vallet mengant a court et chascun de eus forge pour tant de chevaus si comme il prendront de prouvendes et livroison de chandelle selonc ce que il ont acoustumé, et n'auront point de keu et seront servis au dreçoer par devers la bouche sanz ce que il preignent rien par devers le commun et auront chascun pour ce que li roys les souloit monter, restors.
    • 4.Le mestre souverain de l'ostel aura un vallet mengant a court et pour toutes autres choses 10 s. par jour et aura livroison de vin et de chandelle.
    • 5.Li autre mestre de l'ostel auront chascun un vallet mengant a court et livroison de vin et de chandelle, c'est assavoir chascun 2 quartes de vin et chandelle selonc ce que il est acoustumé et 4 s. de gages par jour pour toutes autres choses.
    • 6.Le confessour mengera en sa chambre et aura livroison pour soy et pour son compaignon, c'est assavoir potage et 2 paires de mes et au jour qu'il jeunera il aura des herens avec son potage et 2 souldees au jour qu'il jeunera, et 3 soldees au jour que il ne jeunera, et avec ce aura il 2 pains de bouche chascun jour et se freres li croissent il aura pour chascun frere 6 danrees de pain et aura par jour 7 quartes de vin, c'est assavoir 1 setier par devers le commun du vin de quoi les chevaliers seront servis et 3 quartes par devers le roy. Et aura 4 chevaus qui seront mis en l'escuierie et son valet chevauchant et 1 autre qui menrra le sommier mengeront en sale.
    • 7.Les chapelains, Monseigneur Gile de Condé, le mestre chapelain, aura 3 prouvendes d'avainne et n'aura nulz vallés menganz a court, mes il prendera pour 3 vallés, pour chascun 8 d. par jour et aura pour soi ses gages acoustumez.
    • 8.Les autres 2 chapelains et les trois clers de la chapelle auront chascuns 2 prouvendes d'avainne et pour 2 vallez, pour chascun 8 d. par jour, et auront pour euls leur gages acoustumez et mengeront par devers le roy.
    • 9.Cil qui portera le seel ne mengera point a court et aura pour toutes choses sanz ce que il ne preigne riens a court, 16 s. p. par jour.
    • 10.Mestre Pierre de Laon, mestre Pierre de Latilli, mestre Ph. Le Convers et mons. Girart de Courtonne ne mengeront point a court, mes il auront pour toutes choses quant il seront a court chascun 10 s. p. par jour, et n'en doit avoir que 2 a court se il ne sont especialement mandez.
    • 11.Maillart, notaire le roy, mengera avec les chapelains et prendera avainne pour 3 chevaus et aura pour 2 valles 16 d. par jour, qui ne mengeront point a court et aura pour soi 19 d. de gages.
    • 12.Vallez de chambre mengeront par devers le roy et prenderont avainne chascun pour 1 cheval et 2 pour un sommier, et auront chascun pour 1 vallet 8 d. par jour, qui ne mengera point a court, et auront euls tous ensamble un vallet qui les servira et ne mengera point a court.
    • 13.Huyssiers d'armes mengeront devers le roy et auront 5 s. 4 d. de gages par jour.
    • 14.Serganz d'armes mengeront a court par devers le commun, et y en aura 2 qui feront la garde devant le roy et doivent gesir en sale et avoir avec eulz leur harnois et leur grans chevaus, la ou li roys sera, et auront leur gages acoustumez, c'est assavoir ceus de arbaleste 5 s. 4 d., et les autres 5 s. et si ne pourront partir de court sanz congié.
    • 15.Les sommeliers du cors mengeront en la garde robe par devers les chambellens et auront 8 d. de gages.
    • 16.Les gueites et le corduanier le roy prendront avainne chascun jour pour 1 cheval et mengeront a court par devers le roy et auront chascun 13 d. de gages.
    • 17.Les autres sommeliers de la chambre le roy, qui sont 4, mengeront devers le commun et auront chascun 8 d. de gages.
    • 18.Les sommeliers de la chapelle 3 et les sommeliers de la chambre aus deniers 2, mengeront a court, par devers le commun et auront chascun 8 d. de gages.
    • 19.L'aumosnier et son compaignon mengeront en sale et seront servi selonc ce que il est acoustumé anciennement, et prendra 2 s. 6 d. de gages. Il aura 6 vallez pour l'aumosne qui mengeront en sale et n'averont nule aide.
    • 20.Mons Pierre, aide de l'aumosne, mengera a court et prendera avainne pour 2 chevaus et aura pous soi 19 d. de gages et pour 2 vallés 16 d., qui ne mengeront point a court.
    • 21.Fiziciens et cirurgiens prendront avainne, chascuns pour 2 chevaus et auront chascuns 1 vallet mengant a court et prendront chascun pour un autre vallet 8 d. de gages qui ne mengera point a court, et si auront chascun des fiziciens 32 d. de gages et chascun de cirurgiens 28 d.
    • 22.Le mestre de la Chambre aus deniers mengera a court et prendera avainne pour 3 chevaus et aura pour 2 valles qui ne mengeront point a court 16 d. de gages, et si en aura un autre mengant a court et aura pour fain et litiere 18 d. par jour.
    • 23.Mestre Ansel, clerc des mestiers, mengera a court et prendera avainne pour 2 chevaus et aura pour 2 vallés qui ne mengeront point a court 16 d. de gages et pour soi 19 d.
    • 24.La lavendiere de chiés le roy, Mabilete, aura sa livroison acoustumee et prendra avainne pour 2 chevaus et aura 2 s. de gages.
    • 25.Nul ne prendra en l'ostel le roy livroison, se n'est par essoine de maladie ou de seingniee cil qui ont acoustumé a l'avoir et ne durra la seingnie que 1 jour.
  • Paneterie
    • 26.Robert de Meudon mengera a court et prendera avainne pour 4 chevaus et aura pour 3 vallez qui ne mengeront point a court 2 s. de gages et pour soy 3 s. et chandelle et vin de couchier si comme il sieult.
    • 27.Deus panetiers pour le commun mengeront a court et prenderont avainne pour 2 chevaus chascun et auront chascun pour 2 vallez qui ne mengeront point a court 16 d. de gages et pour eulz chascun 2 s. et chandelle et vin de couchier si comme il seulent et doivent querir le pain et recevoir par compte et quant li roys sejournera et il le pourront bonnement faire, il devront blé acheter pour essaier se il auront bon marchié de pain et auront 5 portechapes qui mengeront a court, mes il n'auront nulz gages.
    • 28.Arnoulet des Napes qui fait le petit disner apportera au matin les parties par devers les mestres et mengera a court et prendra avainne pour 1 cheval et prendra 14 d. de gages et les 2 sommeliers des napes mengeront a court et auront chascun 3 d. de gages, ne n'auront nulles aides et doit l'en donner pour laver le cent de napes 3 s. et seront les toailles lavees davantage et fera l'en savoir aus mestres de l'ostel le nombre des nappes et non changera l'en nulles sans leur congié, et quant il sera mestier que l'en ait de neuves l'en rendera les viés et ne fera l'en que 10 soldees de pain de bouche par jour et si gardera ledit Arnoulet les froumages et en rendera compte chascun jour sur le burel et du pain aussi.
    • 29.La pasteirie de l'ostel sera bailliee a ferme selonc ce qu'il est acoustumé et mengera le pasteier a court tout seul.
    • 30.L'oublaier mengera a court et prendera avainne pour 1 cheval et 13 d. de gages et 2 s. pour oublees.
  • Eschançonnerie
    • 31.Renier de Senliz pour le roy, mengera a court et prendra avainne par 3 chevaus et aura pour 3 vallez qui ne mengeront point a court 2 s. de gages et pour soi 3 s. et si aura livroison de vin et de chandelle.
    • 32.Deus eschançons pour le commun mengeront a court et prenderont avaine, chascun pour 2 chevaus et si auront chascun pour 2 vallés qui ne mengeront point a court 16 d. de gages et pour chascun d'eus 2 s., et si auront chandelle et vin de couchier et si doivent commander le service a cil qui quiert le vin et, des ce que li roys vient au lieu la ou il doit disner ou gesir, les eschançons doivent savoir de cil qui a quis le vin quel marchié il a trouvé et prendre le meilleur marchié pour le roy, et doivent regarder que les bouz soient souffissaument empliz et que il soient de droite moison et ne feront livreson ne delivrance nulle de vin fors aus bouz en sale.
    • 33.Il y aura a court 1 sommelier pour le roy qui mengera a court et prendera avainne pour 1 cheval et 14 d. de gages.
    • 34.Il y aura 2 barilliers, 2 boutiers et 2 portebouz qui mengeront a court et aueront chascuns 3 d. de gages et fera chascun son service en sa propre personne sanz nulle aide.
    • 35.Gilet de Chauni qui querra les vins en la maniere que il est dessus dit, mengera a court et prendera avainne pour 1 cheval et aura 13 d. de gages.
    • 36.Le potier aura pour poz 3 s. par jour et mengera a court.
    • 37.Le mazelinier mengera a court et aura 3 d. de gages et doit recueillir et garder les hanas d'argent.
  • Cuisine
    • 38.Raoul de Beaumont mengera a court et prendera avainne pour 3 chevaus et aura pour 3 vallés qui ne mengeront point a court 2 s. de gages. Et si y aura Pierre de Martigny et 1 autre keu pour le commun, qui auront avainne chascun pour 2 chevaus et si auront pour 2 vallés qui ne mengeront point a court chascun 16 d. de gages et pour euls chascun 2 s. et livreson de vin et de chandelle selonc ce que il seulent. Le devant dit Raoul prent ses gages en son hostel, c'est asavoir 3 s. par quoi il n'en prendra nul a court.
    • 39.Pierre de Martegni, garde menger, doit estre a la char depechier et au poisson rechevoir, et le doit livrer par compte et par compte recevoir.
    • 40.Il aura 2 aideurs pour le commun qui mengeront a court et prendront chascun avainne pour 1 cheval et auront 2 d. de gages chascun, et doivent la char depechier de leur mains et faire pieches de droite moison.
    • 41.Il aura 2 hasteurs pour le commun, 3 souffleurs, 4 pages et 8 enfanz qui mengeront a court et auront les pages pour sollers chascun 2 s. de mois en mois, et les enfanz chascun 5 oit. de gages en 2 jours.
    • 42.Il y aura un huissier de la cuisine du commun qui mengera a court et aura 4 d. de gages.
    • 43.Il y aura un keu pour le roy qui mengera a court et prendra avainne pour 1 cheval, et aura 20 d. de gages.
    • 44.Item, 1 souffleur, 1 hasteur, 2 pages et 3 enfanz et prendront les pages et les enfanz aussi comme les autres devant dis.
    • 45.Petit clerc, garde mangier pour la bouche, mengera a court, et liverra par compte toutes les viandes et les recevra au dreçouer par compte en son garde mengier et ne sera nullui servi par devers la bouche fors la table le roy et les chambellens et les mestres de l'ostel. Et si doit Petit clerc garder les espices et recevoir et les livrer a poys et compter touz les jours sur le burel et aura pour robe 100 s. par an a 2 termes.
    • 46.Il y aura 1 huissier en la cuisine par devers la bouche qui mengera a court et aura 4 d. de gages.
    • 47.Il y aura 1 saussier pour le roy qui mengera a court et aura avainne pour 1 cheval et 4 d. de gages et doit aporter les escuelles d'argent sur le dreçouer et les compter en la presence de l'un des keus et après mengier les requellir et compter et n'en bailler nulle par son serement, fors a servir par devers le roy et en sale et en la chambre aus chambellans, et se aucunes en failloit, il meismes les querroit par les chambres et raporteroit touz les jours les fautes aus mestres de l'ostel et aura 1 vallet qui ne mengera point a court, mes il aura le pain du sel devers le roy tant seulement.
    • 48.Il y aura un saussier devers le commun, qui mengera a court et prendra avainne pour 1 cheval et aura 2 vallés qui auront le pain du sel mes il ne mengeront point a court. Et si aura pour soi 4 d. de gages. Et avant qu'il moille les escuelles il les doit eschier et compter en la presence de l'un des keus ou des aider et faire requeillir par ses vallés les escuelles a l'huis de la sale et les escuelles qui auront esté othees et comptees ne doivent pas estre comptees l'endemain.
    • 49.Le bouchier et le poulaillier mengeront en sale.
  • Fruiterie
    • 50.Il aura un fruictier qui mengera a court et prendera avainne pour 2 chevaus et aura 19 d. de gages et livroison si comme il seult, et si aura 2 sommeliers l'un pour le fruit et l'autre pour la chandelle et 4 vallez qui ouverront de cire et querront le fruit et mengernt a court, mes il n'auront nulz gages.
    • 51.Nul ne sera servi de fruit fors la table le roy, la table aus chambellens si comme il a esté acoustumé et les tables des chapelains des vallés de chambre, des mestres de l'ostel et de chevaliers en seront aussi servies, si comme l'en seult, et le commun de noiz tant seulement. Et en quaresme de figues et de roysins et de noiz seulement. Et aideront les sommeliers a faire le service a l'ostel sanz nulle autre ayde.
  • Escuierie
    • 52.Il y aura 4 escuiers, c'est assavoir Pierre de Machau pour le cors le roy, et Gile de Clamart pour acheter les chevaux, et mengeront a court et prenderont avainne chascun pour 3 chevaux et montera le roy Pierre de Machau de palefroy et de 2 chaceurs et aura son valet restor de 1 cheval qui sera soingné, et ledit Gile sera aussi monté de palefroy, de roncin et de sommier. Et les autres 2 escuiers auront avainne pour 2 chevaux et restor de palefroy et de sommier qui seront soingnez et mengeront a court, et si auront les 2 maistres escuiers chascun 2 vallez mengant a court qui serviront leur mestres et les autres et sera li uns des 2 autres escuiers a achater le fain et l'avainne et au livrer.
    • 53.Item il y aura 2 mareschaus qui mengeront a court et prenderont chascun avainne pour 2 chevaus et auront pour 2 vallés qui ne mengeront point a court chascun 16 d. de gages et la defferre sera le roy.
    • 54.Il y aura 3 vallez de forge qui mengeront a court et ne penront nulz gages et se menrront les 3 sommiers de la forge, mes il auront pour toutes choses 100 s. par an a 2 termes.
    • 55.Vallés d'estables : 4, qui mengeront a court et auront pour robes chascun 60 s. par an sanz autres gages.
    • 56.Chevauceurs : 4, qui mengeront a court, mes il n'auront nuls gages. Mauclerc pour le roy mengera a court et aura son cheval en l'escuierie et aura pour robes 60 s. a 2 termes.
    • 57.Ce sont les chevaus qui seront en l'escuierie : premierement pour le roy 3 palefrois et 3 coursiers, pour Pierre de Machau 3 chevaus, pour Gile de Clamart 3, pour les autres 2 escuiers, 4 ; pour 2 mareschaus, 4 ; pour les sommiers de la forge, 3 ; pour vallés d'estable et pour chevauceurs, 8 ; pour Mauclerc, 1 ; pour les sommiers de la chapelle, 3 ; pour le cors le roy 2 et pour sa chambre 4 ; pour les sommiers de la Chambre aus deniers, 3 ; pour le confesseur, 4 ; pour les nappes, 2 sommiers ; pour la sausserie, 1 ; pour la fruicterie, 2 ; pour l'eschançonnerie, 2 ; et pour les armeures le roy, 1 sommier.
    • 58.Il aura en l'escuierie pour garde 2 chevaus 1 vallés a gages du roy, c'est assavoir 8 d. par jour.
    • 59.L'en ne achatera nulz chevaus se n'est du commandement du roy ou sanz le congié du mestre de l'hostel, et quant il seront achetez, que l'en les monstre audit mestre et que il sache combien chascun aura cousté et de qui il auront esté acheté et il les fera mettre telle part que il verra que sera a faire et deffendera que nulz n'en soit bailliez se n'est par lui.
    • 60.Toute foiz que les escuiers laisseront en chemin chevaus pour essoine de maladie ou pour autre cause, il le feront savoir le jour meismes a l'un des mestres de l'ostel en la Chambre aus Deniers.
  • Fourriere
    • 61.Il aura 1 fourrier qui mengera a court et prendera avainne pour 2 chevaus et aura 19 d. de gages, et si aura 2 vallez a cheval qui mengeront a court et prenderont chascun avainne pour 1 cheval et auront chascun 13 d. de gages et feront le service de leur mains, l'en y merra autres, et aueront 8 aides qui ne mengeront point a court, mes il auront chascun 8 d. de gages et porteront le feurre, les couste et la bouche la ou il devront et ne feront nulz liz la ou il les porteront fors en la chambre le roy et n'auront nulles autres aydes et se il en prenoient aucunes il les paieroient du leur, et si ne liverront rien a nulle personne fors seulement a 6 chambres.
    • 62.Il aura a court 3 huyssiers de sale qui mengeront a court et auront chascun avainne pour 3 chevaus et si auront 2 s. de gages et livroison si comme il seulent.
    • 63.Il y aura 3 portiers qui mengeront a court, et auront avainne chascun pour 1 cheval a 13 d. de gages.
    • 64.Il y aura 3 vallés de porte qui mengeront a court, mes il n'auront nulz gages ne avainne.
  • <Clers et vallets divers>a
  • <Venerie>b
    • 74.Il y aura 8 veneurs, c'est assavoir Jehan Le Veneur, mestre, et Guillaume de Franconvillequi auront chascun 4 s. de gages ; item, Oudenet Malegeneste, Jehennot Malegeneste, Durant, Renaut de Franconville et Coquelet qui auront chascun 3 s. de gages ; item Robinet de Franconville qui aura 2 s. de gages.
    • 75.Et si y aura 7 archiers, c'est a savoir Fichon, mestre, qui aura 3 s. de gages ; item Symart, Pinel, Adenet Butin, Jehan de Dreue, Guillot Rougeau et Harenc qui auront chascun 2 s. de gages. Si mengeront touz a court durant le temps que li roys ira en son deduit tant seulement et non plus se il ne sont mandés. Et ceus qui sont souz eus et sont au roy, desqueux il doivent baillier les nons par escript, avant que il viegnent mengier a court doivent estre monstrez au roy, et si seront lesdiz veneurs et archiers montez du roy.
    • 76.Item il y aura 10 vallés des chiens qui mengeront a court et auront 8 d. chascun de gages. Et si il y aura 6 vallez pour les breschez qui mengeront a court et auront aussi bien 8 d. de gages.
    • 78.La charrete qui va en boys aura 4 s. de gages et le charretier 10 d. Mulet, ayde des veneurs, aura 20 £ p. pour restor de son cheval. Robert de Meudon sera monté du roy de palefroy et de coursier. Le louvier aura 40 £ de restor pour son cheval.
    • 79.Il y aura 6 fauconniers qui mengeront a court durant le temps que li roys yra en son deduit et auront l'un 5 s. de gages et les autres chascun 3 s. et pour restor de lor chevaus chascun 20 £.
    • 80.Vallés de faucons, tant comme il porteront les faucons le roy mengeront a court et auront chascun 3 s. de gages.
    • 81.Crasses Joes et Escuier son compaignon qui quierent la vesselle d'argent auront 2 s. de gages et ne mengeront point a court.
    • 82.Les 2 grans charretes de la Cuisine et la charrete du disner, le chariot de la garde robe, le chariot du Fruit, le chariot des nappes, la charrete de la Chambre aus deniers et la charrete de la forge prendront par jour 54 s. 4 d.
    • 83.Maquereau le fureteur mengera a court et aura hors et enz 18 d. de gages et li doit on paier fuirez et fillé.
    • 84.Le perdrieur mengera a court et aura hors et enz 18 d. de gages.
    • 85.Les brilleurs auront chascun 10 d. par jour de la Pentecouste jusques a la Chandeleur et mengeront a court.
    • 86.Charpentiers 3 et maçons 3, prennent chascun par jour 4 s. hors.
    • 87.Li huyssier de sale tantost comme l'un aura crié au keu, doivent faite widier la sale de touz, fors de ceus qui y doivent mengier et les doivent livrer a l'uis de la sale aus vallez de porte et les vallez de porte aus portiers et les portiers doivent tenir la court nete et les livrer au roy des ribaus et le roy des ribaus doit garder que il n'entrent plus en la porte, et cil qui sera trouvé defaillant de faire son office sera pugni par le mestre de l'ostel qui servira a la journee.
    • 88.Les mestiers de l'ostel jurront que il tendront ceste ordenance en la maniere que elle est ordenee et faite, ne n'auront pour euz chevaus ne gent a court plus que il est ci dessus ordené. Et se il savoient aucuns qui le fesissent autrement il seront tenuz par leur sairement a le dire aus mestres de l'ostel ou autrement il seront privés de leur service ; et si doivent lesdis mestiers faire leur serivce en la maniere que il est dessus ordené et vendront aus jours que li roy sejournera dedens la premiere messe le roy pour compter, et, se le roy chevauche, le clerc de chascun des mestiers prendra dés le soir ses parties et vendra avec l'un de smestiers compter l'endemain a heure de la messe le roy, et se il sont defaillanz il seront pour ce pugniz par les mestres de l'ostel et perderont leur gages et leur avainne de la journee.
    • 89.Les mestiers et les vallés des mestiers demourront a court le temps de uns gages et seront au compte d'iceus gages avant que il partent de court et se il lessoient ou oublioient aucune chose a compter pris ou despendu ou temps de ses gages, il leur seroit refusé a compter es gages ensuians et les recouverroit on sur eus sanz ce que li roys en paiast riens.
    • 90.Par ceste ordenance li roys n'entent pas a nulz des mestiers ou des offices a donner congié, mes il li souffist le nombre devant dit. Et pour ce, quant l'un des diz mestiers sera hors, l'autre de celui mestier aprés li pourra retourner, si que le nombre des personnes soit tel comme il est dessus dit.
    • 91.Touz sommeliers et touz vallés, exceptez ceus qui sont du roy, et touz garçons mengeront par terre.

Apparat critique

a Clers et vallets divers, omis.

b Venerie, omis.

Comment citer cette notice

Elisabeth   Lalou . " Ordonnance de l'Hôtel ( Paris, Centre historique des Archives nationales, JJ 57 F. 49. )", dans Ordonnances de l'hôtel du roi , Elisabeth   Lalou , Benjamin   Suc , éds, Orléans : Institut de Recherche et d'Histoire des Textes , 2006 . (Ædilis, Publications scientifiques, 5). [En ligne] http://www.cn-telma.fr/ordonnances/ordonnance 4 / .

Mentions légales | Colophon | Contacts | Haut de page