IRHT

Ordonnances de l'hôtel du roi

> Ordonnance de l'Hôtel [ Bois de Vincennes, 1286, n.st. 23 janvier ]

Ordonnance 1>

Paris, Archives nationales, JJ 57 F. 1-1. Paris, Bibliothèque nationale, latin, 12814 F. 61-69 anc.49-57.

C'est l'ordenance de l'ostel le roy Ph. pere mons. le roy qui ore est, faite à Vincene landemain de la Saint Vincent en l'an mil cc iiixx v.

Ordonnance

  • Premièrement. Paneterie
    • 1.Panetiers. 3. C'est assavoir 1 pour le roy et 2 pour le commun ; et doivent querre le pain et servir en et estre au poier toutes les fois il y porront estre, et prendra chascun des panetiers du commun pour fain, pour avene et pour toutes autres choses 3 s. 3 d. par jour et aura 1 valet mengant a court et prendra chascuns une quarte de vin pour son couchier et une torche par 4 et 12 menues chandeles, et li panetiers qui sera devers le roy aura 4 s. 4 d. par jour pour toutes choses et vin et chandele si comme il seut. Et est ordené que il n'en aura que 3 a court qui aient gaiges, et serviront par mois se plus en y vient.
    • 2.Galerans des Napes, qui fait le siege le roy, prendra par jour une provende de 6 d. pour son cheval, pour fain et pour herbergage et 30 s. pour robe par an et forge et restor pour un cheval.
    • 3.Li dui somelier des napes auront chascuns une provende et 6 d. par jour pour fain, pour littere et pour herberger leur chevaus. Et auront li dis sommelier et li dis Galerans 1 valet a gaiges pour garder leur 3 chevaus, et auront li sommelier chascuns 30 s. pour robe par an et auront cil 3 une torche par 4 et 9 chandeles menues pour garder leur napes et 12 d. pour moustarde et pour vinaigre et pour chascun cent de napes laver 3 s. et seront les touailles lavees davantage, et fera l'en savoir au mestre de l'ostel le nombre des napes et n'en changera nulle sanz son congié ne n'achatera.
    • 4.Portes chapes : 3, dont chascun prendra 3 d. de gaiges en lieu de livroison pour eus heberger et mengeront a court et prendront cil 3 chascun jour 9 chandeles ensemble et chascuns 30 <s>a pour robe par an.
    • 5.Li pastoiers fera les pastés le roy et du commun, et en prendra la façon si comme il seut, et mengera seul a court ; et quant il n'i sera, cil que fera le service pour lui mengera et n'aura plus riens.
    • 6.Li oubloiers prendra une provende d'aveine et 3 d. pour le fain a son cheval et 100 s. pour robe par an et 12 d. par jour pour nuilles.
    • 7.La lavendiere des napes aura une provende d'aveine et 12 menues chandeles et 3 s. pour le cent de napes laver si comme il est dessus dit, et pour vivre et de sa maisnie et pour le fain a son cheval et pour toutes autres choses 3 s. par jour.
    • 8.La charreste de la paneterie et li cheval sont au charretier pour le pris qui y a esté mis, mais il doit pour chascun cheval 12 £ au roi ou le cheval, et prent pour toutes choses pour chascun cheval 20 d. par jour et 40 s. par an pour une charrete sanz autre chose nulle.
  • Eschançonnerie
    • 9.Il est ordené que il n'ait a court que 4 eschançons ensemble, qui prengnent gaiges, 1 pour le roy, 3 pour le commun, et doivent querre le vin et acheter et servir ent et estre au traire, mesmement aus grans festes et doivent estre au poier toutes fois que il porront et prendront autelz gaiges et seront de tele condicion en toutes choses comme les panetiers.
    • 10.Li clers de l'eschançonnerie comptera a la paneterie et en fera la paie et aura 1 roncin de une provende d'aveine et 6 d. de gaiges pour son valet et pour le fain a son roncin et 3 d. pour le heberger et 30 s. pour robe par an et aura 1 valet qui menra son sommier.
    • 11.Barilliers, 2, et merront les sommiers en leurs propres personnes et aura chascuns une provende d'aveine pour son sommier et 4 d. pour le fain et pour le herbergaige et chascuns 2 d. pour son coucher et 30 s. pour robe par an.
    • 12.La charete a bous a 3 chevaus prendra par jour pour toutes choses 5 s. et sont li cheval rendu quant il meurent ou service pour le pris qui y est mis..
    • 13.Boutiers, 2, qui feront le service en leurs propres personnes et aura chascuns 3 d. de gaiges par jour.
    • 14.Li potiers aura le jour pour ses pos 12 d. et mengera seul a court et n'i aura nus voirres se n'est aus festes annieus.
  • Cuisine
    • 15.Yzembart et 4 autres queus, dont li 2 seront devers le roy et li autre 2 devers le commun avec Ysembart et doivent estre a la viande querre et achater et depecier et servir ent et doivent veoir la ou les pieces charront et aura sire Ysembars tiex gaiges comme il souloit et li autres 4 keus ausit et aura sire Ysembart un sextier de vin au soir pour la veue de la gent de la cuisine et li autre queu auront chascun une quarte de vin au soir pour couchier et 2 provendes d'aveine et 12 d. pour fain, pour litere et pour hostel pour leurs chevaus et une torche par 4 et 8 menues chandeles et 1 valet mengant a court et 1 a gaiges, et li dui keu qui sont devers le roy n'auront pas les torches du dreçor, ainçois seront aportees au cofre et nulz des queus n'aura nul droit.
    • 16.Aideurs : 4, c'est assavoir 2 pour le roy et 2 pour le commun et aura chascuns une provende et 6 d. de gaiges et 6 chandeles menues et 1 valet mengant a court et forge.
    • 17.Hasteurs : 4, qui prendront leurs drois en la cuisine et mengeront a court des quiex li uns prendra pour lui et pour ses compengnons heberger en lieu de livoirson, 4 d. par jour.
    • 18.Paiges : 4, qui mengeront a court et prnedra chascuns pour soy heberger 4 d. par jour et 2 soulz le mois pour chaucemente et ensemble 6 chandeles menues et leur droit en la cuisine.
    • 19.Souffleurs : 2, dont li uns sera maignens et mengeront a court et prendront le flambart sanz autre chose prendre fors 6 menues chandeles et prendront le flambart en tele manere que li potaige n'en vaille pis.
    • 20.Enfans : 4 pour tout l'ostel, qui vivront de la court sanz ce que il ne seront point servi.
    • 21.Li saussiers du commun aura une provende d'aveine et 6 pour fein et pour soy et son cheval heberger et n'aura que 2 vallés qui prendront le pain du sel et auront ensemble 6 d. de gages pour toutes choses et se prengne garde li maistres de l'ostel que l'en ne face trop de pain de sel.
    • 22.Li saussiers devers le roy mengera a court et prendra le pain de sel la ou il a acoustumé a prendre et 2 s. 6 d. par jour pour sausses et 30 s. pour sa robe par an.
    • 23.Li garde mengiers fera la paie
    • 24.Sommiers : 2 en la cuisine et cil qui les gardera aura 6 d. pour le fein des 2 sommiers et pour son vivre et pour eus heberger 8 d. par jour et 2 provendes de aveine.
    • 25.Li poulailliers servira pour le marchié que l'en fera a lui.
    • 26.Huissiers : 2, 1 devers la cuisine le roy et 1 devers le commun et menferont a court et auront chascuns 4 d. par jour.
    • 27.Les 2 grans charettes de la cuisine auront chascune a 4 chevaus pour toutes choses 8 s. par jour, mais il doivent pour chascun cheval 16 £ au roy ou le cheval.
    • 28.La charette du petit disner a 3 chevaus, aura le jour 5 s. pour toutes choses et le restor des chevaus par le pris qui mis y est.
  • Fruiterie
    • 29.Fruitier : 1 et 3 valés qui feront la chandele, desquiex li 1 aidera a servir de fruit et cil 3 mengeront a court et aura chascuns 60 s. pour robe par an, et cil 3 une quarte de vin par jour au couchier et 6 chanceles menues. Li fruitiers aura 2 provendes d'aveine et 12 d. par jour pour fain, lettere et ostel pour lui et pour ses chevaus et le remors et le remanant du cierge si comme il est acoustumés et une quarte de vin de couchier et 30 s. pour robe par an et aura 1 garchon mengant a court et ne baudra point de toise en l'eschançonnerie.
    • 30.Sommiers : 2 dont li uns menra le fruit et li autres menra la chandele et gierront cil 2 sommier avec les sommiers de la chambre le roy et cil qui les garderont ausy.
    • 31.La charrette du fruit sera ostee.
    • 32.L'en servira a la table du roy et de ses freres du fruit ainsi comme il a esté acoustumé et aus tables des noix tant seulement, fors que en quaresme dont l'en les servira de figues, de nois et de roisins tant seulement.
    • 33.L'en fera 12 grans torches, 8 pour le roy et 4 pour ses freres, et ne seront bailliees a nullui pour porter hors et les autres torches seront auteles comme au temps le roy Loys.
  • Escuierie
    • 34.Escuiers : 4. Rogier pour le cors le roy, Denise pour le tinel, Pierre Gencien et 1 autre pour acheter les chevaus et aura chascun 2 chevalz, 2 provendes, 1 valet mengant a court, 1 a gaiges, une torche par 4, 12 menues chandeles et une quarte de vin de couchier et penra chascuns en l'ostel des escuiers fain, littere et lit sanz gaiges et li uns d'eus sera touz jours a achater le fain et la littere et au livrer, et fera l'en de chascun sextier d'aveine a la mesure de Paris 12 provendes et seront bien mesurees et li demourans sera le roy.
    • 35.Mareschaus : 2 qui auront en toutes choses autant que li escuier fors que il n'auront entre eus dui que 1 valet mengant a court et la deferre sera le roy.
    • 36.Valés de forge : 3 mengans a court et menront 3 sommiers et auront 1 valet a gaiges qui gardera leurs 3 sommiers.
    • 37.La charete de la forge sera ostee.
    • 38.Valés des estables : 4 sans plus, et en lieu de celui qui aloit aus osteix ira li uns de ces 4 et aura chascuns 30 s. pour robe par an et mengeront a court.
    • 39.Valés du tinel, a 2 palefrois 1 valet, et ausi des autres chevaus et seront tuit a gaiges.
    • 40.Li boureliers aura 8 d. de gaiges et sera avec les sommeliers.
    • 41.Il est ordené que li rois aura 6 coursiers pour ceux qui iront avec lui en bois, et pour sons cors tant comme il li plaira.
    • 42.Item que nus restors de chevaus ne soit fais fors que en deniers si comme il a esté acoustumé, excepté que li maistre de l'ostel et cil qui porte le seel auront chascuns pour restor de palefrois 40 £ et pour restor de sommiers 16 £.
    • 43.Item que l'en n'achate nulz chevaus sanz le congié du maistre de l'ostel et quant il seront acheté, que l'en les li monstre et que il saiche combien chascuns aura cousté, et de qui, et il les fera metre tele part que il verra que il sera a faire et que il deffende que nul ne soit baillié se par lui n'est.
    • 44.Li clers de l'escuierie sera a livrer l'aveine.
    • 45.Item 1 valet qui mesurra l'aveine a 7 d. de gaiges.
  • Fourière
    • 46.Colinset Guillos de Pontoise, seront fourrier et aura chascuns une provende d'aveine et 12 d. de gaiges et 100 s. pour robe par an et auront 4 valés pour aides dont chascuns aura 4 d. de gaiges et mengeront a court.
    • 47.Li charrios le roy a 5 chevaus aura chascun jour pour toutes choses 8 s. 3 d. de gaiges et restor de chevaus au pris qui y est mis, mes il doit pour chascun cheval au roy 16 £ ou le cheval.
    • 48.Huissiers de sale : 2. Chascuns aura 2 s. de gaiges et 1 valet mengant a court et 100 s. pour robe par an et une torche par 4 et 8 menues chandeles et forge pour 2 chevaus et restor de palefrois et de roncins et partiront aus poignieees et ne doivent estre envoié nulle part en messaige.
    • 49.Portiers : 3. Chascuns aura 6 d. de gaiges et une provende d'aveine et 1 valet mengant a court, et 40 s. pour robe par an et restor de roncin.
    • 50.Valés de porte : 3, sanz chevaus et mengeront a court et auront chascuns 60 s. pour robe par an.
  • Chambellens
    • 51.Pierres de Chambli aura 4 provendes d'aveine et 4 s. 6 d. de gaiges et 8 £ pour robe par an.
    • 52.Pierres de Machau, Hues de Bouville et Perros de Chambly prendront chascuns 3 provendes d'aveine et 9 d. par jour pour le fain a ses 3 chevaus, et en lieu de livroison et des choses qu'il souloient prendre en la fourriere, prendra chascuns pour soy et pour ses chevaus heberger et pour le vivre de 2 garçons 2 s. 3 d. par jour et aura chascuns 1 autre valet mengant a court. Somme que chascuns prendra pour ces choses dessus dites, 3 s. par jour ; et forge et sale, chandele si comme il seulent, et mengeront touz en sale.
    • 53.Jehans Poucins a 3 provendes, 18 d. de gaiges et 1 valet mengant a court et 2 a gaiges.
    • 54.Valés de chambre : 6, desquiex il y aura 2 barbiers, 1 taillieur et 3 autres et n'auront nulz sommiers et metront leurs robes ou chariot a autiex gaiges comme devant.
    • 55.Gaites : 2, chascuns a 6 d. de gaiges, une provendreb et 1 valet a gaiges et n'auront nulz sommiers et metront leurs robes en la charrette de la chambre.
    • 56.Serjans d'armes : 30, desquiex il aura touz jours sans plus a court 2 huissiers d'armes et 8 autres serjans et mengeront a court et li 4 de ceus feront le guet quant li rois mengera et porteront tuit touz jours leurs carquais plains de quarriaus et ne se porront partir de court sanz congié.
    • 57.Li clers des arbalestriers et li sommiers des quarriaus seront ostés et mestre Pierres de Condé fera la paie aus arbalestiers.
    • 58.La lavendiere le roy aura 2 s. de gaiges et 2 provendes d'aveine, 8 denrees de pain, 2 pieces de char, une geline et 3 quartes de vin.
    • 59.Sommeliers : 10, pour la chambre le roy, 14 ; pour la chapelle, 2, se il plait au roy ; pour les registres et pour les escrips, 2 ; pour le fruit 2. Chascuns de ces 10 aura une provende pour son sommier, et pour son vivre 8 d., et pour le fein au sommier 3 d., et pour cinture 1 d. Somme que chascuns prent par jour pour les choses dessus dites 12 d., et chascuns 30 s. pour robe par an, fors que ceus de la chapelle qui ont chascuns 100 s. pour ce qu'il ne montent nulle fois sus leurs sommiers.
    • 60.Li maistres des sommeliers prendra pour lui et pour son valet 12 d. par jour et une provende d'aveine et 10 s. pour robe par an.
  • Clers
    • 61.L'evesque de Senlis prent ses manteaus hors et ens.
    • 62.Cil qui porte le seel a 7 s. de gaiges par jour sanz aveine, et a forge et restor de 4 chevaus.
    • 63.Li archediacres de Sologne, Guillaume de Crespy : chascuns a 4 provendes d'aveine et 18 d. de gaiges et forge et restor de 3 chevaus et 2 valés a gaiges et 1 valet mengant a court et chandele si comme il seulent.
  • Notaires
  • <Chambre aux deniers>d
    • 69.Maistre Goeffroy du Temple a 2 s. de gaiges et 4 provendes et forge et restor, et 1 valet mengant a court et 3 a gaiges, et chandele.
    • 70.Maistre Alliaumes de Silly a 18 d. de gaiges, 3 provendes et 1 valet mengant a court et 2 a gaiges, et forge et restor et chandele.
    • 71.Messire Symons, qui fait les escrips le roy pour le bouteillier a 12 d. de gaiges, 2 provendes, 1 valet mengant a court et 1 a gaiges et forge, restor et chandele.
    • 72.Masitre Pierres de Condé a 3 provendes pour lui et pour le sommier de ses escris et 18 d. pour fain et pour littere, 1 valet mengant a court et 2 a gaiges, et forge et restor et chandele. Item pour Jehannot son neveu, son clerc, une provende et 6 d. de gaiges.
    • 73.Messire Pierre de Mauloué a une provende d'aveine et 6 d. de gaiges,; et 1 valet mengant a court.
  • Fisiciens, 3
    • 74.Maistre Fouques de La Charité, devers Madame, aura 18 d. de gaiges, 3 provendes d'aveine, 1 valet mengant a court, et 1 a gaiges et forge.
      Mestre Dude aura autant de gaiges comme mestre Fouques.
      Item devers le roy deuz, mestre Dudes, et aura autels gaiges comme mestre Fouques.
  • Chapelains
    • 75.Messire Aleaumes, messire Nicholas, messire Jehans : chascuns aura 6 d. de gaiges,; 2 provendes d'aveine, 1 valet mengant a court et 1 a gaiges, etc.
  • Clers de la chapelle
  • Clers de conseil
  • <Autres officiers>f
  • <Venerie>g
    • 90.Li fuiretiers a 18 d. de gaiges hors et ens et pour robe pour lui et pour sa maisnie 60 s., et pour filé et raiseus 20 s., et mengera a court quant il venra.
    • 91.Li oisseleurs a 12 d. de gaiges hors et ens et 40 s. pour robe, et pour rois, 12 s. et mengera a court quant il y venra.
    • 92.Li louviers prendra tiex gaiges comme il a par la lettre le roy.
    • 93.Fauconniers, 6. Chascuns aura 2 s. 6 d. de gaiges pour toutes choses et ne mengeront pas a court et auront pour restor de cheval 14 £ et chascuns 100 s. pour robe.
    • 94.Veneurs, 3 et aura chascuns 3 s. de gaiges hors et ens et chascuns 100 s. pour robe et pour heuses et pour hasches 17 s. et pour restor de chavel 14 £.
      Le valet a ces veneurs, 1, qui aura 18 d. de gaiges hors et ens et pour robe 4 £ et pour restor de chevaus 8 £.
    • 95.Valés a chiens, et a chascuns 6 d. de gaiges hors et ens et mengeront a court.
    • 96.Archiers, 2 et a chascuns 2 s. de gaiges hors et ens et 100 s. pour robe et li maistres aura pour restor de cheval 14 £ et li autre 8 £.
    • 97.Brachés, 6 et auront par jour 6 d. et les 2 valés qui les gardent 16 d. ensemble hors et ens.
      Item 12 chiens pour faire la chace, qui auront 12 d. le jour.
  • Chevaliers de l'ostel
    • 98.Ceux qui sont maistre du conseil et les maistres de l'Ostel et les maistres de l'Ostel la reine auront touz les jours 4 s. comme devant et livroison de chandele et 2 quartes de vin de couchier, li autre chevalier si comme il seulent.
    • 99.Les maistres de l'ostel le roy, mesire Hue de Villers, et li maistres de l'ostel Madame, messire Jehans du Chastelier auront chascuns 1 escuier mengant a court sanz plus et n'auront point de chambre en l'ostel.
    • 100.Il est ordené que il n'i ait que 20 valés a court ensemble, tiex comme il plaira au roy. Et ceus et touz les autres auront leurs robes a Pasques et a la Toussains, se il sont a la feste a court ; autrementh.
    • 101.Item, que nus n'ait chambre en l'ostel le roy, fors cil qui porte le seel et li grans maistres de l'ostel et la Chambre aus Deniers et li chapellain et li confessors le roy et li aumosniers.
    • 102.Li confessors le roy aura pour lui et pour son copeignon 3 chevaus sans plus et 1 valet mengant a court qui les servira, et leurs chevaus seront mis devers les escuiers et li valés qui les gardera ausi, et cil frere et tuit li autres frere qui y vendront mengeront en sale.
    • 103.Genciens Acheterai touz les dras et les panes pour le roy et pour madame et gardera les clés des aumaires ou li drap seront et saura combien il baudra de drap au tailleur pour le roy et pour madame et prendra le remanant des dras et sera au compte quant li tailleur compteront de la façon des robes.
    • 107.Li tailleurs le roy apelera avec lui, toutes fois que il taillera les robes le roy, Robert de Paris quant il i porra estre et penra cil Robert louier de cousturier.
    • 108.Goupil s'en voit en son hostel.
    • 109.Item que nus ne menjuce en chambre, ne n'ait viande hors de sale.
    • 110.Item, que toutes les fames qui demeurent en l'ostel le roy a Paris soient ostees, c'est assavoir la coutepointiere ou celle que est en son lieu, la fame Boudray et toutes les autres qui ne sont en certein office.
  • L'ostel Madame la Reine
    • 111.Madame la reine aura 2 dames et 3 damoiselles, et aura la dame 20 £ pour robe et pour toutes autres choses, par an ; et la damoiselle, 15 £.
    • 112.Madame 1 char a 5 chevaus pour lui, et 1 autre a 4 chevaus pour ses damoiselles.
    • 113.Item 3 palefrois pour son cors, et son chariot pour son harnois de ses femmes, et prendra l'en espiecerie par devers maistre Richart.
    • 114.Li tailleires madame aura une provende d'aveine et 6 d. de gaiges et 1 valet pour garder son cheval a 7 d. de gaiges et 1 valet cousturier qui mengera a court. Nul autre couturier ne mengeront a court.
    • 115.Item, un valet qui se tendra au char madame et mengera a court, et aura 40 s. pour robe.
    • 116.Item, madame aura 3 sommiers et 3 sommeliers qui seront valés de chambre et n'auront autres chevaus et mengeront a court.
    • 117.Valés pour madame, 4. Chascuns une provende d'aveine et 6 d. de gaiges et 1 valet a gaiges.
    • 118.La lavendiere madame prendra 12 d. de gaiges, 12 pains et 1 sestier de vin, 2 pieces de char et une geline.
    • 119.La contesse de Joigny, madame Ameline de Serilly et son fil le clerc s'en yront en leur maison.
  • Paneterie
    • 120.Gombaus servira madame de l'escuelle comme panetiers et aura 12 d. de gaiges, 2 provendes, 1 valet mengant a court et 1 a gaiges et une torche par 4 et 12 menues chandeles et une quarte de vin de couchier et l'un des valés madame servira le commun du pain.
    • 121.Et aura 1 valet en la paneterie a 2 d. de gaiges qui mengera a court et gardera le pain et menra le sommier de la paneterie.
    • 122.Et 1 porte chape a 3 d. de gaiges qui mengera a court.
    • 123.Et 1 oubloier sanz garçon qui mengera a court et aura 3 d. de gaiges et fera les pastés madame et de son commun et en prendra la façon tele comme il devra.
    • 124.La lavendiere des napes prendra pour le cent de napes laver 3 s. et lavra les toueilles davantaige et prendra pour livroison 6 pains, 2 quartes de vin, une piece de char et une poule.
  • Eschançonnerie
    • 125.Madame aura autant d'eschançons comme de panetiers et a tiex gaiges qui serviront du vin et l'acheteront et le paieront et i aura 2 sommiers et 2 sommeliers, chascuns a 2 d. de gaiges et servira li uns des barilz et li autres devers le commun et mengeront a court.
    • 126.Item, 1 boutier qui portera les bous et aura 3 d. de gaiges et mengera a court.
  • Cuisine
    • 127.Keus, 2. L'un a 2 provendes et l'autre a une provende et gaiges a l'avenant et 1 valet mengant a court et une torche par 4 et 8 menues chandeles, et ne prendront pas les torches du dreçoir ains seront rapportees aus coffres et ne prendront nul gaiges.
    • 128.Aideur, 1, a 6 d. de gaiges, une provende, 6 menues chandeles et 1 valet mengant a court.
    • 129.Hasteurs, 2 sanz chevaus, qui prendront leurs drois et mengeront a court.
    • 130.Paiges, 2, et aura chascuns 3 d. de gaiges et mengeront a court.
    • 131.Saussier, 1, qui aura 3 d. de gaiges pour lui et pour son valet et le pain de sel et non plus, et mengera lui seul a court.
    • 132.Ly potiers mengera a court sanz plus et li poulailliers aussi.
    • 133.Pour faire la paie de touz les maistiers de l'ostel, aura 1 clerc a 6 d. de gaiges, une provende, et 1 valet mengant a court et 100 s. pour robe par an.
  • Fruiterie
    • 134.Fruitier a 6 d. de gaiges, une provende et 1 valet engant a court et 1 valet qui menra le sommier du fruit et mengera a court.
  • Escuierie
  • Fourriere
    • 137.Fourrier, 1 qui aura 6 d. de gaiges, une provende et 1 valet mengant a court.
  • Chapelle
    • 138.Li chapellains madame aura 6 d. de gaiges, 2 provendes, 1 valet mengant a court et 1 a gaiges et n'aura pas le remanant des cierges, ainz seront portés au coffre et pour cele cire il aura 10 £ par an, et sera aumosnier et li dira l'en quiex aumosnes il devra faire.
    • 139.Thomas, li clers de la chapelle le roys sera devers madame et aura 6 d. de gaiges et une provende et 1 valet mengant a court.
    • 140.Et aura en la chapelle 1 sommelier mengant a court.
  • <Chambre aux deniers>j
    • 141.Maistre Michiel de Morgneval aura 2 provendes, 12 d. de gaiges, 1 valet mengant a court, 1 a gaiges et une torche par 4, et 12 menues chandeles.
    • 142.Item, 1 sommelier des deniers qui mengera a court, et cil et li sommeliers de la chapelle garderont la chambre aus clers, li uns aus premiers et li autres aus derreniers.
      Et li chapellains et tuit li clerc dessus dit gerront ensemble, en une chambre, c'est assavoir li chappelains, lui et 1 valet, li clers de la chapelle touz seus ; maistre Michiel et son valet, le fusicien et son valet, et li sommeliers de la chapelle et cil de la chambre aus deniers sans plus.
      Li chapellains et tuis li clerc dessus dit mengeront en sale devers les clers le roy quant le roy et madame seront ensemble hors de Paris et quant elle sera sanz le roy, il mengeront ensemble avec le commun madame.
    • 144.Portier : 1 a cheval, en liu d'uissier, a une provende et 6 d. de gaiges et 1 valet mengant a court.
    • 145.Item 1 valet de porte a pié mengant a court.
    • 146.La gueite a une provende et 6 d. de gaiges, et 1 valet a gaiges.
    • 147.Il est ordené que nus, ne chevaliers ne autres, ne gira avec sa fame en l'ostel madame.
    • 148.Li chevaliers maistres de l'ostel madame aura autel comme 1 des chevaliers le roy.

      Apparat critique

      a s, omis.

      b provendre, sic.

      c Lire Gorjut.

      d Chambre aux deniers, omis.

      e Sic, pour Chartres.

      f Autres officiers, omis.

      g Venerie, omis.

      h Sic, pour anciennement non.

      i Sic, pour achera.

      j Chambre aux deniers, omis.

      Comment citer cette notice

      Elisabeth   Lalou . " Ordonnance de l'Hôtel ( Paris, Archives nationales, JJ 57 F. 1-1. Paris, Bibliothèque nationale, latin, 12814 F. 61-69 anc.49-57. )", dans Ordonnances de l'hôtel du roi , Elisabeth   Lalou , Benjamin   Suc , éds, Orléans : Institut de Recherche et d'Histoire des Textes , 2006 . (Ædilis, Publications scientifiques, 5). [En ligne] http://www.cn-telma.fr/ordonnances/ordonnance 1 / .

      Mentions légales | Colophon | Contacts | Haut de page