« Philippe III, roi de France »

En non de sainte Trinité, dou Pere, dou Fils et dou Saint Esperit, amen. Philippe, par la grace Dieu, rois de France. Nous faisons savoir que nous, par la grace Dieu sain et haitié de cors, avons por le salu de nostre ame ordené nostre testament en la maniere qui s’ensuit ci aprés, en rapelant touz autres testamenz que nous avons fez ou tens passé.[1] Premierement nous volons et commandons que toutes noz detes soient paiées, et tuit nostre tort fet amendé par les executeurs de cest nostre testament, qui aprés sunt nomméz, ou par autres, si comme il verront que bien sera a fere.[2] Apres nous commandons et donnons nostre ame a Dieu.[3] Et laissons a l’abaie de Cistiaus  cinquante l. t. por fere en cele abbaie nostre anniversaire perpetuelment ; a l’abaie de Realmont seur Aise , deus cent l. t. pour fere perpetuelment nostre anniversaire, et por establir ilec un moine prestre, qui por nos chantera messes aprés nostre decés ; a vint autres abbaies de cele ordre meismes et de Clerevaus  en noz demaines cinc cens l. t. ; as nonnains de Pontoise , deus cenz l. t. por fere perpetuelment nostre anniversaire et por establir un frere chapelain qui chantera ilec messes por nos aprés nostre decés ; as nonnains de l’abaie dou Lis delez Meleun  cens l. t. por fere perpetuelment nostre anniversaire ; as nonnains de Saint Antoine delez Paris  cens l. t. por ce meisme fere ; a autres abbaies de nonnains de cele ordre meismes, en noz demaines sis cens l. t. ; a la meson Dieu de Paris deus cens l. t. de rente, et deus cens l. en deniers por fere perpetuelment nostre anniversaire en ladite meson, et por establir ilec un chapelain qui chantera messes por nous aprés nostre decés ; a la meson Dieu de Pontoise  sexante l. t. ; a la meson Dieu de Vernon  sexante l. t. ; a la meson Dieu de Compiegne  sexante l. t. ; a deus cens autres mesons Dieu plus besoigneuses et plus chargiees dou reaume, en noz demaines, deus mile l. t. a departir entr’eles selonc le sens et l’ordenance de noz executeurs ; a huit cens maladeries plus besoigneuses et plus chargiees dou reaume, en noz demaines, deus mile l. t. ; as Freres meneurs de Paris cinc cenz l. t. por fere perpetuelment nostre anniversaire, et por establir un frere qui chantera por nous aprés nostre decés ; a autres Freres meneurs en noz demaines sis cenz l. t. a departir par le conseill dou menistre provincial de France et dou gardian et dou lecteur de Paris ; as Freres preescheeurs de Paris, cinc cenz l. t. por nostre anniversaire fere, et por establir un frere autresi comme il est dit des Freres meneurs ; a autres mesons des Freres preescheeurs ou reaume en noz demaines sis cenz l. t., a departir par le conseil dou prieur provincial de France, et dou prieur et dou plus ancian lecteur de Paris ; a l’abbaie de l’Umilité Nostre Dame delez Saint Cloout , cinquante l. t. por fere perpetuelment nostre anniversaire ; au prioré de Saint Morise de Senliz  cinquante l. t. por faire autresi nostre anniversaire ; as sereurs Saint Dominique de lez Montargi  cent l. t. por fere ausi nostre anniversaire ; as sereurs de cele ordre meisme delez le Pont de Roam  cinquante l. por fere ce meismes ; a l’abbeie de Fontevraut  por ce meismes cent l. t. ; as prioréz de cele ordre meismes en noz demaines, trois cens l. t. a departir selonc le sens et l’ordenance de noz executeurs ; a l’abaie de Premonstré  trente l. t. por nostre anniversaire fere perpetuelment ; a l’abbaie de Joieval  trois cens l. t. por fere perpetuelment nostre anniversaire, et por establir un chapelain qui chantera por nos ; a l’abbaie d’Aubecort  vint l. t. ; as autres abbaies de cele ordre meismes en noz demaines deus cenz l. t., a departir selonc l’ordenance de noz executeurs ; a la meson de l’ordre de la Trinité de Paris  sexante l. t. por fere perpetuelment nostre anniversaire ; a la meson de la Trinité de Fonteinebliaut  quarante l. t. por fere aussi nostre anniversaire ; as autres mesons de cele ordre meisme en noz demaines sexante l. t. a departir selonc l’ordenance de nos executeurs ; as freres dou Val des Escoliers  de Paris sexante l. t. por fere perpetuelment nostre anniversaire ; as mesons de cel orde meisme en noz demaines sexante l. t. a departir par noz executeurs ; a l’abbaie de la Victoire delez Senliz  sexante l. t. por fere perpetuelment nostre anniversaire ; as nonnains de Nemos  quarante l. t. por fere autresi nostre anniversaire ; a l’abbaie Saint Victor de Paris  quarante l. t. pour ce meisme ; as freres des Sas de Paris  vint l. t. ; as freres dou Mont dou Carme de Paris  vint l. t. ; as freres hermites de l’ordre Saint Guillaume de Montrouge  vint l. t. ; as freres hermites de l’ordre Saint Augustin de Paris  quinze l. t. ; as freres de l’ordre Sainte Croiz de Paris  vint l. t. ; as freres de l’ordre Nostre Dame de Paris  vint l. t. ; as Filles Dieu et as Repenties de Paris  cinquante l. t. ; a la congregation des povres avugles de Paris  cinquante l. t. ; as Escoliers de Saint Thomas dou Louvre  quinze l. t. ; as Escoliers de Saint Honoré  dis l. t. ; as Bons Enfanz de Paris  sexante l. t. ; a autres menuz escoliers de Paris cent et cinquante l. t., a departir par le prieur des Preescheeurs et par le gardian des Freres meneurs de Paris ; as povres beguines de Paris vint l. t. ; as autres povres beguines en nostre demaine cent l. t. a departir par noz executeurs.[4] A povres damoiselles et povres dames veves marier, et a povres gentils hommes honteus soustenir en la terre de Gastinois et d’Orlenois, mil et cinc cens l. t. ; a autres povres femmes marier ou assener et orfelins et autres povres soustenir es autres terres dou reaume en noz demaines trois mile l. t. a departir par l’ordenance de noz executeurs ; por buriaus  et solers  acheter, a departir a povres en noz demaines, sept cenz l. t.[5] As oevres des yglises parroissiaus de Paris sis cens l. t. a departir par l’ordenance de noz executeurs ; a acheter aornemenz por povres yglises dou reaume en noz demaines, cens et cinquante l. t., a departir par noz executeurs. [6] Derechief nos lessons a la mesniée de nostre ostel trois mile l. t. a departir par noz executeurs, c’est a savoir a noz serjanz qui n’auront eu nul guerredon  de leur servise, ou qui n’auront pas esté souffisanment guerredonné , si comme il sauront que sera a fere. [7] Et requerons les chapelains de nostre chapelle de Paris  qu’il, aprés nostre decéz, facent tozjorsmés por nos chanter par un de leur chapelains chasque jor la messe que l’an chante por les trespasséz, et fere sollempnellement tozjorsmés nostre anniversaire chascun an le jor de nostre trespassement ; et nous por ce leur donnons et lessons dis l. t. de rente a prendre en nostre prevosté de Paris, chasque an le jor de l’anniversaire.[8] Derechief, nos donnons et laissons a l’abaie Saint Denis en France , la ou nos eslisons nostre sepolture, pour nostre anniversaire fere dou jor de nostre trespassement en avant, quarante l. t. de perpetuel rente a prendre le jor devant nostre anniversaire, chascun an, en nostre prevosté de Paris, en deniers por fere pitence au couvent le jor de nostre anniversaire ; et si laissons encore a l’abaie Saint Denis rente en cele meisme prevosté por establir par noz executeurs un cierge qui ardra  perpetuelment en l’iglise Saint Denis. [9] Derechief, nos laissons a Blanche , nostre suer, quatre mile l. t. a prendre chascun an au Temple a Paris, tant comme ele vivra apres nostre descés, se einsi n’estoit que ele peust recouvrer son doaire d’Espaingne ; quar se ele le recouvroit, nous volons que ele cesse de prendre les quatre mile l. tant comme ele porra joïr dou doaire.[10] Et si volons et commandons que chascuns des clers et des chapelains qui seront a nous ou tens de nostre trespassement et ne seront porveu en benefice d’yglise, aient chascun an de nostre hoir qui sera rois de France, vint l. t. de rente chascun an, tant que il soient porveu par nostre hoir en benefice d’yglise ou en autre souffisanment.[11] Et por la grant devotion que nos avons a la Terre sainte, s’il avenoit que Diex ne vueille que nos trespassissions de cest siecle avant que nos eussions fet nostre pelerinage d’outremer, nos lessons au secors de cele terre quarante mile l. t. a metre et a despendre ou profit de cele terre par nostre hoir qui sera rois de France ; et se il en estoit negligent, nous volons que il en ce soient mis et despendu par ceus que nostre executeurs verront qui mieuz le porront et sauront fere, selonc ce que cil nostre executeur en porront et sauront mieuz ordener au salut de nostre ame ; et por l’ame de la reine Isabelle jadis nostre femme, soient envoié ou secors de la Terre sainte, au premier general passage aprés nostre trespassement, dis chevaliers as despens nostre hoir, si comme nostre executeur ordeneront.[12] Derechief nos volons et commandons que toz les lés et les dons devant diz soient paié des biens que nos aurons ou reaume de France ou tens de nostre decéz.[13] Et a toutes ces choses tenir et accomplir, nos obligeons nostre hoir et nostre terre, et volons et commandons que se ceste nostre ordenance ne valoit comme testament, qu’ele vaille comme desreniere volenté, ou en autre maniere en quoi elle porra mieuz valoir.[14] Derechief nos ordenons et commandons que se aucunes choses estoient douteuses ou oscures en cest testament, que nostre executeur desoz nommé aient pooir, et nos icelui pooir leur donnons, d’esclarcir et de fere ce que il verront a fere por le salu de nostre ame ; et volons encore que a noz torz fez, prover souffise tel preuve comme il leur samblera que bien soit.[15] Et de cest nostre testament nos establissons executeurs noz amez feaus Gui, evesque de Lengres, Thibaud, evesque de Dol, les abbéz de Saint Denis en France et de Reaumont, noz améz cousins, Jehan, bouteillier, et Imbert, connestable de France, mestre Jehan de Puiseuz, chanoine de Chartres, nostre clerc, Pierre de Chambli et Jehan Poucin noz chambellans ; as quex quant a ceste execution fere nos volons et commandons que nostre hoir qui sera nostre successeur ou reaume porvoie en despens ausi a eus comme a ceus qu’il metront en leu d’eus : et se il tuit ne pueent ou en vuelent estre a fere l’execution, ou se il avient que aucuns d’eus trespasse de cest siecle avant, la gregneur partie en nombre de ceus qui demorront ou trois de ceus, ou se tuit trespassoient, li dui abbé et le tierz que il voudroient apeler avec eus aient pooir de fere l’execution de cest testament. [16] En tesmoing de la quel chose nos avons fet metre nostre seel a ces presentes lettres. Ce fut fet a Paris en l’an nostre Seigneur mil deus cens quatre vinz et quatre, ou mois de marz.