« bullarium-franciscanum-5920 »

Dilecto filio Leonardo ministro generali ordinis fratrum Minorum.

Cum, sicut nuper dolenter accepimus, in insulis Corsicae ac Sardineae sint quamplures haeretici minus recte in diversis articulis fidei sentientes et inibi multas haereses contra fidem catholicam temerariis ausibus asserere praesumentes, nos cupientes, prout ex debito tenemur pastoralis officii, huiusmodi pestifero morbo congruam adhibere medelam, discretioni tuae, de qua in hiis et aliis gerimus in Domino fiduciam specialem, per apostolica scripta committimus et mandamus, quatenus aliquem virum tui ordinis professorem, litteratum, providum et discretum ac timentem Deum, quem ad hoc duxeris eligendum, super quo tuam conscientiam oneramus, auctoritate apostolica, hac vice, inquisitorem haereticae pravitatis in insulis praedictis constituas et deputes, qui huiusmodi inquisitionis officium sollicite, viriliter ac prudenter exerceat tam iuxta privilegia et indulgentias inquisitoribus pravitatis eiusdem auctoritate apostolica deputatis seu officio eiusdem inquisitionis a sede apostolica concessa quam etiam secundum canonicas sanctiones: ita quod per ipsius inquisitoris per te deputandi sollicitudinis studium, radice pravitatis praedictae de praefatis insulis penitus evulsa et exterminatis inde vulpeculis, quae vineam domini Sabaoth demoliri nituntur, fides inibi catholica prosperetur. Per hoc autem locorum ordinariis, quominus ipsi inquisitionis officium super huiusmodi labe iuxta sanctiones praefatas libere exercere valeant, ac praedictis et quibusvis aliis privilegiis dicto ordini vel huiusmodi officio inquisitionis, si qua sint eis a praedicta sede concessa, non intendimus in aliquo derogare. Datum Anagniae IX kal. augusti anno septimo.a