Description
-
Grégoire XI (1370-1378)
-
Nicolaum Baldatiae de Eugubio ord. Min., mag. theol., inquisitorem haer. prav. in ducatu Spoletano instituit.1
-
1377, iulii 21, Anagniae.
-
1377
-
Dilecto filio Nicolao Baldatiae de Eugubio ordinis fratrum Minorum professori, in sacra theologia magistro, in provincia ducatus Spoletan. inquisitori haereticae pravitatis per sedem apostolicam deputato.
De persona tua, quam, sicut ex testimoniis fidedignis accepimus, religionis zelo, fidei puritate, maturitate morum et litterarum scientia Altissimus specialiter praedotavit, specialem fiduciam obtinentes et cupientes, quod in provincia ducatus Spoletan. negotia catholicae fidei iugibus profectibus (elisis et omnino eradicatis erroribus) prosperentur et inibi fides catholica propensius invalescat, te, quem ad hoc sufficientem et idoneum reputamus, inquisitorem haereticae pravitatis in eadem provincia usque ad biennium a data praesentium computandum, auctoritate apostolica, tenore praesentium constituimus et etiam deputamus: discretioni tuae per apostolica scripta mandantes tibique in remissionem peccaminum iniungentes, quatenus, in spiritu caritatis virtutem induens hominumque timore postposito, praedictum inquisitionis officium in dicta provincia, prout tanti negotii utilitas persuadet, sub spe retributionis aeternae sic efficaciter prosequi et exequi studeas diligenter, quod per tuae sollicitudinis studium radix pravitatis praedictae exinde penitus evellatur et vinea Domini exercituum (exterminatis vulpeculis, quae demoliri conantur eandem) fructus uberes afferat catholicae puritatis: processurus in huiusmodi inquisitionis negotiis tam secundum indulgentias et privilegia inquisitoribus pravitatis eiusdem auctoritate apostolica deputatis seu officio inquisitionis eiusdem a sede apostolica concessa quam etiam secundum canonicas sanctiones. Per huiusmodi autem constitutionem et deputationem de te huiusmodi officio per nos factam locorum ordinariis, quominus ipsi inquisitionis officium super labe praedicta iuxta praedictas sanctiones possint libere exercere, ac praedictis vel quibuscunque aliis privilegiis ordini tuo vel inquisitoribus pravitatis praedictae seu officio inquisitionis huiusmodi, si qua sint eis a praedicta sede concessa, non intendimus praeiudicium aliquod generari. Datum Anagniae XII kal. augusti anno septimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°1480., p.587
-
Reg. Vat. ser. Avin. t. 201 (Greg. XI a. 7), f. 203. Cfr. supra n. 1458.
1