Description
-
Clément VI (1342-1352)
-
Cancellario Parisien. mandat, ut Austencio de s. Columba ord. Min. honorem magisterii conferat.1
-
1352, martii 31, Avinione.
-
1352
-
Dilecto filio cancellario Parisien.
Sicut debetur benemeritis etc. Cum itaque, sicut exhibita nobis pro parte dilecti filii Austencii de sancta Columba ordinis fratrum Minorum, in sacra theologia baccalaurei, petitio continebat, idem Austencius, qui in eiusdem theologiae studio longis temporibus insudavit, adeo in ipsius theologiae scientia iam profecerit, quod digne meretur honorem magisterii recipere in eadem, ipseque librum sententiarum nunc Parisiis actu legat: nos de praemissis ac sufficientia et idoneitate dicti Austencii notitiam non habentes discretioni tuae, de qua specialem in Domino fiduciam obtinemus, eiusdem Austencii supplicationibus inclinati, per apostolica scripta mandamus, quatenus, si eumdem Austencium finito cursu lectionis dicti libri per tuam et aliorum magistrorum in dicta scientia existentium in studio supradicto, prout est in talibus consuetum, diligentem examinationem ad hoc sufficientem et alias idoneum esse repereris, non obstantibus quibuscumque statutis et consuetudinibus studii et ordinis praefatorum contrariis, quibus per hoc quoad alios nullum volumus praeiudicium generari, servatis nihilominus constitutionibus Viennen. concilii et aliis solemnitatibus in talibus consuetis, magistralem honorem conferas et docendi licentiam auctoritate nostra concedas. Datum Avinione II kalendas aprilis anno decimo.a
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°611., pp.-266
-
Reg. Vat. t. 209 (Clem. VI a. 10, l. 3, p. 2), ep. 462; Wadd. l. c. reg. pont. Clem. VI, p. 2, n. 113. Cfr. Chart. Univ. Paris. III, 13, n. 1203.
1 -
(a) Qui Austencius 24 sept. 1361 in episcopum Sarlaten. promovetur. Cfr. infra n. 811.