« bullarium-franciscanum-4992 »

Venerabilibus fratribus Carpentoraten. et Uticen. episcopis ac dilecto filio abbati mon. s. Rufi prope Valentiam.

Grandis nobis adest laetitia miraque nostra praecordia gaudiorum suavitate replentur et a nobis magna gratiarum actionum ac laudum Deo debentur impendia, dum caelestis Rex ipse, sub cuius ditione cuncta subsistunt, sanctos suos per exemplaris vitae doctrinam et sanctitatis merita venerandos, de praesentis vitae carcere ad aeternam beatitudinem evocatos, crebris coruscare facit miraculis, per quae suos fideles et in fidei constantia perseverantes efficiat et ad sanctorum ipsorum sectanda vestigia lucidasque semitas incedendas invitet apertius, quos de multitudine miserationum suarum ad eorum vult consortium pervenire. Sane pro parte venerabilium fratrum nostrorum Aquen. et Arelaten. archiepiscoporum et nonnullorum episcoporum Aquen. et Arelaten. provinciarum et dilectorum filiorum praelatorum ecclesiarum religiosorumque et baronum ac nobilium et universitatum earumdem provinciarum et Provinciae ac Forcalquerii comitatuum pridem in consistorio propositum extitit coram nobis, quod recolendae memoriae Elzearius de Sabrano, comes Ariani ac baroniae Ausoisii dominus, de dicta provincia Provinciae oriundus,a generis nobilitate praeclarus, adeo in exemplari vita et castitate perfecta in huiusmodi peregrinatione saeculi, eius abiectis voluptatibus carnisque illecebris procul pulsis, per castos mores virtutumque placitos actus Domino gratum famulatum impendere ac eiusdem vitae merito sibi ipsi et aliis proficere studuit per exemplum, quod omnipotens ipse Dominus virtutis suae in eodem Elzeario opem manifestans per sancta sua merita in civitate Apten. in loco fratrum Minorum, ubi corpus requiescit eiusdem, et alibi plures suscitavit mortuos, caecos illuminavit, mundavit leprosos, surdis auditum, mutis loquelam et paralyticis ac contractis restituit sanitatem, honorans in terris, quem, ut pie creditur, coronavit in caelis.

Quare nobis fuit pro parte praedictorum humiliter supplicatum, ut, cum de praedictis, quae in dictis provinciis et comitatibus quasi notoria et manifesta fore dicuntur, posset fieri per fide dignos et solemnes viros ac factorum evidentiam plena fides, super eis per alios probos viros mandaremus inquiri, ut veritate comperta et certitudine habita praemissorum, cum non deceat apud homines sine veneratione relinqui, quem merita et miracula sanctum monstrant, ipsumque dignaremur sanctorum catalogo aggregare. Nos igitur, quos in certis festinos et lentos convenit in dubiis inveniri, de praedictis notitiam non habentes, huiusmodi supplicationibus inclinati, discretioni vestrae, de quorum circumspectione plenam in Domino fiduciam obtinemus, de fratrum nostrorum consilio per apostolica scripta committimus et mandamus, quatenus vos vel duo vestrum de vita et meritis dicti Elzearii ac eius miraculis et ceteris circumstantiis circa interrogatoria, quae sub bulla nostra transmittimus interclusa, veritatem diligentius inquiratis et nobis, quae super his inveneritis, scripta fideliter sub vestris sigillis cum vestrarum litterarum, harum seriem continentium, testimonio intimare curetis. Datum Avinione kalendis septembris anno decimo.