Description
-
Clément VI (1342-1352)
-
Thomam de Birago ord. Min. ecclesiae Syben. (Syba in regno Ziquiae) neo-erectae praeficit in episcopum.1
-
1349, maii 22, Avinione.
-
1349
-
Venerabili fratri Thomae de Birago episcopo Syben.
Romani pontificis etc. Nuper siquidem ex certis rationabilibus causis locum vocatum Syben., in regno Ziquiae consistentem, populosum, insignem, aptum et congruum, ad divini nominis laudem et gloriam ac exaltationem ecclesiae sanctae suae animarumque profectum de fratrum nostrorum consilio et apostolicae plenitudine potestatis in civitatem ereximus et civitatis vocabulo insignivimus eamque civitatem Syben. voluimus in perpetuum futuris temporibus nuncupari ac in ipsa civitate fore constituendam ecclesiam cathedralem ipsamque dignitatis episcopalis titulo duximus decorandam, prout in nostris litteris inde confectis plenius continetur. Nos igitur, cupientes dare operam efficacem, ut tanti boni commodum valeat feliciter provenire, considerantes quoque, ad prosecutionem eiusdem boni fore utilem, quinimo necessariam personam eruditam in sacra pagina et expertam, in te ordinis Minorum professorem, in sacerdotio constitutum, sufficienter instructum in dicta pagina, prout testimonio fide dignorum didicimus, et expertum, religione conspicuum, vitae ac morum honestate decorum et aliarum multiplicium virtutum meritis laudabiliter insignitum, aciem direximus nostrae mentis. Quibus omnibus attenta meditatione pensatis de persona tua, nobis et eisdem fratribus nostris consideratione praemissorum accepta, dictae Syben. ecclesiae de fratrum ipsorum nostrorum consilio auctoritate apostolica providemus teque illi praeficimus in episcopum et pastorem, curam et administrationem eiusdem Syben. ecclesiae tibi in spiritualibus et temporalibus plenarie committendo; et consequenter per venerabilem fratrem nostrum Talhairandum episcopum Albanen. apud sedem apostolicam tibi fecimus munus consecrationis impendi: sperantes in virtute Altissimi, quod tu velut bonus pastor in conversione schismaticorum et aliorum infidelium praedictorum prudenter ac solerter et sollicite laborabis, oves recuperabis deperditas, et quas errorum caligo traxit in devium, miserante divina clementia ad semitam reduces iustitiae et per praedicationis ministerium eis lumen veritatis ostendes. Sollicitudinem itaque pastoralis officii a Deo crediti tibi devote suscipias ac eam ferventibus studiis prosequaris, circa haec exhibendo te sine intermissione pervigilem et fidelem, ut gregem tuae fidei creditum perducas ad pascua vitae, ubi sol iustitiae nescit occasum, tuque proinde inter beatorum agmina colloceris, felicitatis aeternae gloria potiturus, et nihilominus, donec cursum praesentis vitae peregeris, nostram et apostolicae sedis benedictionis gratiam uberius merearis. Datum Avinione, XI kalendas iunii, anno octavo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°503., p.229
-
Reg. Vat. t. 192 (Clem. VI a. 8, l. 1), ep. 91; Wadd. l. c. reg. pont. Clem. VI p. 2, n. 55. Cfr. infra n. 504. — Aliis litteris eodem die datis (l. c. t. 194, f. 323, ep. 879) S. P. fama publica et etiam fide digna relatione certior factus, quod quamplurimi fratres ord. Min. zelo fidei et devotionis accensi ad certas partes orientales et specialiter ad regnum Ziquiae, quod a scismaticorum et gentilium diversis populis incolitur, ab olim de superiorum suorum licentia se personaliter transtulerunt multaque loca partium et regni illorum non vitatis laboribus peragrarunt et in illis sunt multorum annorum decursis temporibus commorati ac multos ex iisdem populis ad fidem cath. per praedicationis ministerium converterunt et adhuc, ut speratur, convertent, locum Syben. in dicto regno existentem tamquam aptum et congruum in civitatem erexit, decernens, in ipsa civitate fore constituendam ecclesiam cathedralem eamque titulo dignitatis episcopalis decorandam. — Ecclesiae Syben. et Lucucen. (cfr. infra n. 504) suffraganeae erant ecclesiae Matrigen. paulo ante erectae. Cfr. supra n. 490.
1