« bullarium-franciscanum-4892 »

Dilectis filiis guardiano et fratribus ordinis Minorum de Crema Placentinae dioecesis.

Laudabilis vestra religio promeretur, ut vos illius favoris gratia prosequamur, per quam sub tranquillitatis commodis liberius divinis obsequiis insistere valeatis. Oblata siquidem nobis vestra petitio continebat, quod vos dudum vigore cuiusdam concessionis venerabili fratri nostro Fortanerio archiepiscopo Ravennaten., tunc ordinis fratrum Minorum generali ministro, factae, quod fratres ipsius ordinis possent sex loca, ubicumque vellent, de novo recipere, quemdam locum in castro de Crema Placentinae dioecesis recepistis ac in eo ecclesiam, dormitorium et officinas alias, dictae concessionis forma servata, aedificare coepistis dictumque locum iam per plures annos pacifice possedistis, quodque a paucis temporibus citra dilecti filii prior et fratres ordinis Praedicatorum de dicto castro Cremae asserentes, eumdem locum vestrum a loco ipsorum nonnisi per centum triginta quinque cannas distare, cum tamen, ut asseritis, secundum mensurationem per vos factam loca ipsa in debita distantia fore noscantur, vobis super hoc moverunt voluntarie quaestionem et per venerabilem fratrem nostrum Ioannem archiepiscopum Mediolanensem, conservatorem privilegiorum dicto ordini Praedicatorum concessorum, mandari fecerunt, quod dictum locum vestrum destrui faceretis: a quo mandato pro parte vestra fuit ad sedem apostolicam appellatum, dictusque archiepiscopus detulit appellationi reverenter. Nosque causam appellationis huiusmodi et negotii principalis ad instantiam dictorum prioris et fratrum Praedicatorum dilecto filio magistro Martino Lachapellia canonico Rothomagen., cappellano nostro et causarum palatii apostolici auditori, audiendam commisimus et fine debito terminandam. Quare pro parte vestra fuit nobis humiliter supplicatum, ut, cum vos pro ampliatione divini cultus et animarum salute locum ipsum receperitis, providere vobis in hac parte, ne, quod ibi aedificatum est, propterea destruatur, de benignitate apostolica dignaremur. Nos igitur huiusmodi vestris supplicationibus inclinati vobis, ut praedictum locum per vos receptum cum ecclesia, dormitorio et officinis aliis, etiamsi ab eodem loco dictorum prioris et fratrum Praedicatorum per quinque cannas minus, quam in privilegio eidem ordini Praedicatorum concesso contineatur, distet, huiusmodi oppositione dictorum prioris et fratrum Praedicatorum ac commissione causae praedictae necnon constitutionibus apostolicis quibuscumque contrariis nequaquam obstantibus, aedificare et aedificatum retinere possitis, auctoritate apostolica tenore praesentium concedimus de gratia speciali. Nulli ergo etc. Datum Avinione, II kalendas maii, anno septimo.