« bullarium-franciscanum-4812 »

Dilecto filio Petro Patricelli de Fano converso ordinis fratrum Minorum.

Zelus amoris, quem de intimis ad Altissimum direxisti, sic in te magnum devotionis spiritum suscitavit, quod tibi delectabile reputas, prout ex fide dignis testimoniis accepimus, ad ipsius obsequia operosa sollicitudine personam propriam exponere et pericula non timere ac subire laborum multiplicium gravitatem. Sane petitio pro parte tua nobis nuper exhibita continebat, quod tu olim zelo devotionis accensus pro fide Christi tuenda cum certo armigerorum numero, ex quibus viginti unus fuerunt de genere tuo, te in ultramarinis partibus transtulisti et ibidem ultra biennium residendo ferventibus studiis bella contra Turcaruma foedam perfidiam, christianae religioni crudelissime inimicam, intrepidus frequentasti, quodque duo fratres, unus nepos et quinque consanguinei tui in bellis eisdem interfecti fuerunt, quodque tu vita comite proponis tamquam athleta fidei dictae ad easdem redire partes et ibidem prout hactenus famulando Altissimo ad exaltationem ipsius fidei contra Turcas eosdem militare, donec, si voluntati divinae placuerit, Christi fidelibus assistendo, dictorum Turcarum rabies prosternatur: pro illo martyrizari appetens, qui pro nostra redemptione immortalitatis obtinens potestatem sponte voluit crucifigi. Quare nobis humiliter supplicasti, ut, si ab aliquibus Christi fidelibus aliquid tibi pia largitione dari contingat in suffragium huiusmodi tui devoti propositi et defensionem eiusdem fidei, de huiusmodi datis et obtentis suffragiis possis gentes armorum stipendiare et stipendiatas tecum ducere ad praemissum fidei negotium prosequendum, tibi concedere de benignitate apostolica dignaremur. Nos igitur huiusmodi tuum laudabile propositum multipliciter in Domino commendantes ac volentes praemissorum intuitu votis tuis in hac parte annuere favorabiliter et benigne, huiusmodi supplicationibus inclinati, ut sub dispositione sanctae Romanae ecclesiae, huiusmodi negotii prosecutione durante, ex quibuscumque suffragiis tibi pia largitione eorumdem fidelium conferendis vel alias undecumque seu quomodocumque concedendis possis gentes praedictas stipendiare ac tecum ducere ad prosecutionem negotii saepedicti, obedientia tamen sanctae matris ecclesiae ac legatorum eius in eisdem partibus existentium pro tempore per te in integrum humiliter et fideliter observata, devotioni tuae auctoritate apostolica tenore praesentium de speciali gratia indulgemus. Nulli ergo etc. Datum Avinione VII idus iunii anno sexto.