« bullarium-franciscanum-4798 »

Dilecto filio Fortanerio ministro generali fratrum ordinis Minorum.

Pro parte dilectae in Christo filiae Margaritae de Monte-Catheno, monialis monasterii Corporis Christi Neapolitani ordinis sanctae Clarae, nobis extitit humiliter supplicatum, ut, cum ipsa Margarita et Margarita de Urtano et Francisca de Gaieta, moniales monasterii et sociae Margaritae praedictae, ex certis iustis causis de dicto monasterio, in quo fuerunt professae et benedictae et per tempus XXV annorum conversatae, cum eisdem habitu et regula, quibus per dictum tempus fuerunt in ipso monasterio conversatae, ad monasterium reginale de Petralbis prope muros Barchinonen. dicti ordinis cupiant se transferre et super eo habeant assensum carissimae in Christo filiae nostrae Elisendis reginae Aragonum illustrisa, fundatricis dicti monasterii de Petralbisb et amitae Margaritae praedictae de Monte-Catheno, eidem Margaritae et dictis eius sociis transeundi ad dictum monasterium de Petralbis et gestandi habitum, quem in dicto monasterio Corporis Christi gerebant (non obstante habitu scapulari, qui in dicto monasterio de Petralbis geritur et habetur), et quod ad omnes actus legitimos et promotiones monasterii de Petralbis et ordinis praedictorum cum ipso habitu, quem praedicta supplicans portat, admitti et promoveri valeant, licentiam concedere de benignitate apostolica dignaremur. Nos igitur discretioni tuae, de qua in his et aliis plenam in Domino fiduciam obtinemus, per apostolica scripta committimus et mandamus, quatenus Margaritae de Monte-Catheno et Margaritae de Urtano ac Franciscae de Gaieta praedictis licentiam postulatam, si tibi visum fuerit expedire, non obstantibus quibuscumque consuetudinibus et privilegiis nec non constitutionibus et consuetudinibus monasteriorum et ordinis praedictorum contrariis, auctoritate nostra concedas. Datum Avinione VIII kalendas martii anno quinto.