« bullarium-franciscanum-4593 »

Dilecto filio Fortanerio Vassalli ordinis fratrum Minorum, sacrae theologiae professori, curam et administrationem ministeriatus generalis eiusdem ordinis apostolica auctoritate gerenti.

Cupientes in generali ordinis fratrum Minorum capitulo Massiliae in proximo celebrando, in quo generalis ministri eiusdem ordinis electio imminet inter cetera facienda, omnia et singula, quae tam circa electionem praedictam quam quaevis alia ibidem expedienda emergent, ad honorem Dei et ecclesiae sanctae suae ac utilitatem ipsius ordinis et professorum eiusdem perfecte, rite ac iuste agi, ut, si forsan in numero ministrorum et custodum ipsius ordinis, qui secundum privilegia, statuta, consuetudines vel observantias eiusdem ordinis debent in eodem capitulo interesse, aliquis vel aliqui deficerent, loco deficientis vel deficientium huiusmodi alium vel alios fratres praelibati ordinis, quos ad hoc cognoveris idoneos, qui habeant illam quoad praemissa gerenda in eodem capitulo potestatem, quam ipsi deficientes haberent, si praesentes ibidem existerent, deputare valeas, plenam discretioni tuae concedimus tenore praesentium facultatem. Per haec autem eisdem privilegiis, statutis, consuetudinibus et observantiis non intendimus in aliis vel alias quomodolibet derogare. Datum Avinione VII kal. iunii anno secundo.