« bullarium-franciscanum-4590 »

Dilecto filio Fortanerio Vassalli fratrum ordinis Minorum, sacrae theologiae professori, curam et administrationem ministeriatus generalis eiusdem ordinis apostolica auctoritate gerenti.

Dudum ordine fratrum Minorum pro eo generalis ministri gubernatione carente, quod nos venerabilem fratrem nostrum Geraldum patriarcham Antiochenum, tunc ipsius ordinis generalem ministrum, in patriarcham de fratrum nostrorum consilio praefecimus Antiochenae ecclesiae tunc vacanti, nos ordinem ipsum intra nostra et sedis apostolicae praecordia recumbentem remanere nolentes utilis gubernatoris solatio destitutum et ad te, quem margaritis scientiae, morum venustate, discretionis et probitatis maturitate aliisque donis virtutum insignivit Dominus quique zelum ferventem ad ordinem ipsum habere dignosceris, dirigentes intuitum mentis nostrae, curam et administrationem ministeriatus generalis eiusdem ordinis, quousque foret ei de ministro generali provisum, tibi per nostras litteras duximus committendas, sicut in eisdem litteris plenius continetur. Sane cum instet capitulum generale praelibati ordinis Massiliae celebrandum, in quo dicti ministri electio imminet de nostro beneplacito facienda, nostraeque intentionis fuerit et existat, quod tu in eodem capitulo ac electoribus et fratribus ibidem congregandis velut gerens curam et administrationem huiusmodi praesideas, donec per electionem concordem et utilem fuerit de ministro generali provisum (quibusvis privilegiis apostolicis ac consuetudinibus, statutis et observantiis ipsius ordinis contrariis nequaquam obstantibus, quibus tamen propter hoc super aliis vel alias non intendimus in aliquo derogare), discretioni tuae per apostolica scripta mandamus, quatenus ad praedictum capitulum accedens tuumque huiusmodi officium ibidem fideliter et sollicite exercens, ut tam circa electionem praedictam quam alia in capitulo ipso agenda pacis et charitatis vigeat unitas et omnia secundum Deum et ipsius utilitatem ordinis salubriter dirigantur, partes tuae sollicitudinis interponas: ita quod ex tua directione uberes fructus assistente divina gratia proveniant tuque perennis mercedem praemii consequaris. Datum Avinione XI kalendas iunii anno secundo.