« bullarium-franciscanum-4490 »

Dilectis filiis ministro generali et fratribus ord. Min.

Devotionis vestrae sinceritas promeretur, ut petitionibus vestris in hiis praesertim, quae digne postulatis a nobis, quantum cum Deo possumus, favorabiliter annuamus. Sane dudum pro reformatione boni status ordinis vestri inter cetera statuendum duximus,... quod nullus frater dicti ordinis aliquod novum opus, scil. theologicum, iuridicum vel philosophicum, vel librum seu libellum, summam, compendium, postillam, expositiones, glossas, tractatum, collationem seu compilationem quaestionum vel sermonum, a quocumque editus vel edita seu editum foret, sine subscripto examine ac ministri et capituli generalis prius obtenta licentia speciali intra vel extra dictum ordinem publicare, communicare vel copiare praesumeret, et quod praedicti operis examen fieret per quatuor fratres dicti ordinis in theologica facultate magistros ad hoc per generale capitulum ipsius ordinis specialiter deputatos. Cum autem, sicut petitio vestra continebat, huiusmodi examinatio per dictos quatuor magistros non possit fieri sine magnis gravaminibus et expensis ordinis memorati, nobis humiliter supplicastis, ut ad parcendum gravaminibus et expensis huiusmodi dictorum quatuor magistrorum numerum quoad examinationem dicti operis faciendam modificare et ad minorem numerum reducere dignaremur. Nos itaque vestris supplicationibus in hac parte benignius annuentes volumus et apostolica auctoritate concedimus, ut tres ex huiusmodi magistris possint examinare opus huiusmodi iuxta praedictam formam in eisdem ordinationibus comprehensam. Nulli ergo etc. Datum Avinione, VIII kal. februarii, anno quinto.