« bullarium-franciscanum-4480 »

Venerabili fratri archiepiscopo Nidrosien.

Officii nostri debitum exigit, ut quibusvis poscentibus iustitiae complementum impendamus. Ex tenore siquidem querulosae petitionis dilectorum filiorum ministri provincialis et fratrum ordinis Minorum provinciae Daciae, iuxta morem ipsius ordinis nominatae, nobis oblatae percepimus, quod venerabilis frater noster Petrus archiepiscopus Upsalen., qui ordinis fratrum Praedicatorum existit, eosdem fratres Minores persequitur toto posse ipsisque gravamina plurima una cum Sighfrido decano, Laurentio Unga, magistro Amero, Odhino et Iordano canonicis ecclesiae Upsalen. intulit et inferre continue non desistit. Nam idem archiepiscopus certos homines, qui quemdam apostatam eorum de ecclesia loci dictorum fratrum Minorum in Stokholm Upsalen. dioecesis per violentiam extrahendo libertatem ecclesiasticam et immunitatem eorum violarunt, nec non illos, qui dictum apostatam excommunicatum scienter admiserunt ad divina officia et communicaverunt eidem, punire atque corrigere ipsisque fratribus super his iustitiam facere denegavit et nihilominus subditis suis inhibuit, ne praefatis fratribus eleemosynas erogarent; neve carissimus in Christo filius noster Magnus rex Sveciae illustris, qui tunc coronari debebat quique in loco praedicto ipsorum fratrum Minorum in Stokholm, ubi habet clarae memoriae regem avum et reginam aviam suam sepultos, disposuerat coronationis suae recipere diadema, in eodem loco eorumdem fratrum Minorum in Stokholm coronari valeret, impedivit; locum etiam dictorum fratrum Minorum in Enecopiaa dictae dioecesis sine aliqua iusta causa canonico supposuit interdicto; nec his contentus quoddam aedificium ipsorum fratrum Minorum, tunc situm in civitate Upsalen., poni fecit sine aliqua causa rationabili in ruinam; dicta quoque sacerdotum suorum prohibentium aliquos peccata sua eisdem fratribus Minoribus confiteri nec posse nec debere approbavit et non desinit approbare, favet etiam in hoc sacerdotibus antedictis; aliaque ipsis fratribus Minoribus gravamina et iniurias plurimas irrogavit. Praefatus insuper decanus sub nomine capituli eiusdem ecclesiae Upsalen. contra dictum ordinem Minorum libellos diffamatorios edidit et per illas partes publice divulgavit, suo tamen sigillo tantummodo sigillatos; ipsi etiam canonici dilectis filiis guardiano et fratribus loci eorum Upsalen. graves iniurias et violentias intulerunt et familiares ipsorum canonicorum, eis mandantibus et praecipientibus et ratum habentibus, in nonnullos ipsorum fratrum Minorum, ipsos spoliando rebus eorum, manus atrociter iniecerunt Dei timore postposito temere violentas. Quare nobis ipsi minister et fratres ordinis Minorum eiusdem provinciae Daciae humiliter supplicarunt, ut adversus archiepiscopum, decanum et canonicos supradictos providere eis super praemissis de opportunis remediis ex apostolica clementia dignaremur.

Quocirca fraternitati tuae per apostolica scripta committimus et mandamus, quatenus (vocatis, qui fuerint evocandi, et auditis simpliciter et de plano sine strepitu et figura iudicii hinc inde propositis) auctoritate nostra facias ipsis partibus super praedictis et singulis et ab illis emergentibus et dependentibus ipsisque annexis iustitiae complementum, contradictores auctoritate nostra, appellatione postposita, compescendo; testes autem, qui fuerint nominati, si se gratia, odio vel timore subtraxerint, per censuram ecclesiasticam, appellatione cessante, compellas veritati testimonium perhibere: non obstantibus, si eisdem episcopo, decano et capitulo vel quibusvis aliis communiter vel divisim ab eadem sit sede indultum, quod interdici, suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mentionem. Datum Avinione kalendis septembris anno quarto.